1 Gate gudé Jesús tu lataj, na' blé'ene̱' tu benne' gúlaje̱' la chul-la. 2 Benne' ca' dxuse̱de Jesús buluche̱be̱' Le̱':

―Benne' Wese̱de, ¿bizr chee̱ na' gulaj benne' nigá la chul-la? ¿Naca na lawe' da belún xra xrne̱'e̱ dul-la, che lawe' da be̱n lé̱queze̱' dul-la?

3 Jesús guzre̱' benne' ca':

―Quebe naca na lawe' da be̱n le̱' dul-la, ne quebe naca na lawe' da belún xra xrne̱'e̱ dul-la. Naca na chee̱ gulé'e lau xel-la' szren chee̱ Dios ne̱ chee̱ benne' nigá. 4 Dxácate̱ naca te zra dxal-la' guna' zrin chee̱ Bénnea' nasel-le̱' neda' lawe' da ba za da chul-la gate netú benne' quebe seque' gune̱' zrin. 5 Dxácate̱ ne zua' neda' xe̱zr la xu nigá, naca' xel-la' naxaní' chee̱ bénneache.

6 Ca gudé gunná Jesús da nigá, na' bzre̱'e̱ zrene̱' lu xu, ne be̱ne̱' guna' nen zrene̱' na', na' btupe̱' na xiaj lau benne' la chul-la na'. 7 Nadxa guzre̱' le̱':

―Guxíaj xeajtibe lau' lu beaj nisa nazí le na Siloé. (Dizra' nigá zéaje̱ na: Da Nasel-la Na.)

Benne' la chul-la na' guxíaje̱' xeajtibe lawe̱', na' gate bezrine̱' ba dxelé'ene̱'. 8 Nadxa benne' walízr chee̱' ca', ne benne' ca' belelé'ene̱' le̱' nédxula, naque̱' la chul-la, gulenné̱':

―¿Quegá benne' nigá bénnea' dxebé'e̱ dxenabe̱' guna'?

9 Bal-le̱' gulenné̱':

―Le̱' na'.

Xebal-le̱' gulenné̱':

―Quegá le̱' na', na' ca'an ca dxenné̱'e̱.

Benne' ná'queze gunné̱':

―Neda' na'.

10 Nadxa buluche̱be̱' le̱':

―¿Ájazra na' ba dxelé'enu'?

11 Beche̱be bénnea':

―Bénnea' le̱' Jesús be̱ne̱' guna', ne btupe̱' na xiaj lawa', na' gunné̱': “Guxíaj beaj nisa nazí le na Siloé, xeajtibe lau'.” Guxá'a na', na' gate gudiba' lawa', guca ble'eda'.

12 Nadxa buluche̱be̱' le̱':

―¿Ga na' zua bénnea'?

Le̱' guzre̱' benne' ca':

―Quebe nezda'.

13 Nadxa benne' ca' guleché̱'e̱ bénnea' guque̱' la chul-la lau benne' fariseo ca'. 14 Naca na zra dxulupá'ana judío ca' gate be̱n Jesús guna', ne btupe̱' na xiaj lau benne' la chul-la na'. 15 Chee̱ le̱ na' benne' fariseo ca' buluche̱be̱' bénnea' guque̱' la chul-la ájazra guca dxelé'ene̱'. Le̱' guzre̱' benne' ca':

―Bzrie̱' guna' xiaj lawa', na' bexiba' na, ne dxelé'eda'.

16 Nadxa bal-la benne' judío ca' gulenné̱':

―Bénnea' be̱ne̱' da nigá quebe naque̱' chee̱ Dios lawe' da quebe dxape̱' ba lá'ana zra dxupá'anadxu.

Na' xebal-le̱' gulenné̱':

―¿Ájazra na' dxune̱' xel-la' waca zrente̱ caní che naque̱' benne' dul-la?

Ca'an guca, gulaca chupa la'a benne' fariseo ca'. 17 Xecha lasa buluche̱be̱' bénnea' guque̱' la chul-la:

―¿Bi dxennáu' lue' chee̱ bénnea' bexune̱' lue'?

Le̱' gunné̱':

―Neda' dxennéa' naque̱' benne' dxuchalaje̱' waláz chee̱ Dios.

18 Benne' judío ca' quebe guléajle̱'e̱ guque̱' la chul-la, ne na'a dxelé'ene̱', na' gulenné̱' xra xrna bénnea' bexaque̱'. 19 Na' buluche̱be̱' xra xrna bénnea':

―¿Nácaqueze benne' nigá zrí'inele, dxennale le'e gúlaje̱' la chul-la? ¿Ájazra na' dxaca dxelé'ene̱'?

20 Belexeche̱be xra xrne̱'e̱:

―Nézentu' benne' nigá naque̱' zrí'inentu', ne gúlaje̱' la chul-la. 21 Quebe nézentu' aja guca dxelé'ene̱' na'a, ne quebe nézentu' nu bexún xiaj lawe̱'. Le guche̱be le̱'. Ba nápaqueze̱' iza, ne waca xeché̱bequeze̱'.

22 Caní gulenná xra xrne̱'e̱ lu xel-la' dxelezrebe lawe' da ba zaj nun benne' xíchaje̱ chee̱ judío ca' tuze dizra' xelexebéaje̱' xu'u na' nútete̱ze benne' xeche̱be̱' Jesús naque̱' Cristo. 23 Chee̱ le̱ na' gulenná xra xrne̱'e̱: “Le guche̱be le̱'. Ba nápaqueze̱' iza.”

24 Nadxa benne' judío ca' belenné̱' bénnea' guque̱' la chul-la, na' gulé̱'e̱ le̱':

―¡Gunné̱ da li lau Dios! Nézentu' naca benne' nigá benne' dul-la.

25 Le̱' beche̱be̱':

―Quebe nezda' che naque̱' benne' dul-la, che cabí. Tuze da nezda'. Neda' guca' la chul-la, na' na'a dxelé'eda'.

26 Na' buluché̱bequeze̱' le̱':

―¿Bizra be̱ne̱' chiu'? ¿Ájazra be̱ne̱' chee̱ bexune̱' xiaj lau'?

27 Na' beche̱be bénnea':

―Ba gucha' le'e, ne quebe dxénele chia'. ¿Bizr chee̱ na' dxaca lázrele nnia' xetú? ¿Cá'anqueze le'e dxaca lázrele gácale Le̱' tuze?

28 Nadxa benne' judío ca' gulenné̱' schanni' chee̱ bénnea' guque̱' la chul-la, dxelenné̱':

―Lue' da'u bénnea', na' netu' da'ntu' Moisés. 29 Netu' nézentu' Dios bchálajle̱ne̱' Moisés. Quebe nézentu' ga benne' benne' nigá.

30 Nadxa bénnea' beche̱be̱':

―Da nigá naca na da dxebáneda'. Le'e quebe nézele ga bénnea', na' bexune̱' xiaj lawa'. 31 Nézquezdxu Dios quebe dxenne̱' chee̱ benne' dul-la. Tuze dxenne̱' chee̱ benne' ca' dxulucá'ana szrene̱' Le̱', ne dxelune̱' ca da dxaca lazre' Le̱'. 32 Quebe ne xendxu che nu benne' xexune̱' tu benne' gúlaje̱' la chul-la. 33 Chela benne' nigá quebe naque̱' chee̱ Dios, quebe gaca bi gune̱'.

34 Nadxa gulé̱'e̱ le̱':

―Ca gúlajquezu' dxulé'e na nabagu' dul-la. Na'a, ¿dxaca lazru' guzéajni'inu' netu'?

Nadxa belexebéaje̱' le̱' lu xu'u na'.

35 Jesús benne̱' belexebéaje̱' bénnea' guque̱' la chul-la, na' gate bezrague̱' le̱', guzre̱' le̱':

―¿Dxéajle̱'u lue' chee̱ Zri'ine Dios?

36 Benne' na' guzre̱' Jesús:

―Xran, guzre neda' Nu na', chee̱ chéajle̱'a chee̱'.

37 Beche̱be Jesús:

―Ba blé'equeznu' Le̱'. Neda', dxuchálajle̱na' lue' naca' Bénnea'.

38 Nadxa benne' na' bzu zribe̱' lau Jesús, na' gunné̱':

―Dxéajle̱'a chiu', Xran.

39 Nadxa gunná Jesús:

―Neda' bla'a lu xe̱zr la xu nigá chee̱ guchi'a ca da dxelún bénneache, chee̱ xelelé'e la chul-la ca', ne chee̱ xelexaca ca la chul-la benne' ca' dxelenné̱' dxelelé'ene̱'.

40 Nadxa bal-la benne' fariseo ca', benne' zaj zre̱'e̱ nen Jesús, gate belenne̱' da nigá gunná Jesús, buluche̱be̱' Le̱':

―¿Cá'anqueze netu' nácantu' la chul-la?

41 Jesús beche̱be̱':

―Chela nácale le'e la chul-la quebe nabágale ca naca dul-la da be̱nle. Dxennale dxelé'ele, na' chee̱ le̱ na' nabágale dul-la.