1 Na' gunná Jesús:

―Da li dxapa' le'e, bénnea' quebe dxu'e̱ dxu'a dxa xu'u chee̱ le'aj chee̱ zrila' ca', na' dxu'e̱ naga xula, naque̱' gubán, ne tu dxebánzqueze̱'. 2 Bénnea' dxu'e̱ dxu'a dxa xu'u na' naque̱' benne' dxuxúequeze̱' zrila' ca'. 3 Bénnea' zue̱' dxu'a dxa xu'u dxesálaje̱' chee̱ chu'u bénnea' dxuxúequeze̱'-ba', na' zrila' ca' dxelexúnbeaba' chi'e̱. Benne' nigá dxu'e̱ la tu tu zrila' ca', ne dxebéaje̱'-ba' lu le'aj chee̱ba'. 4 Ca dxedé dxebéaje̱' xúgute̱ba', na' dxebía lawe̱' lauba', na' zrila' ca' zjácale̱ba' Le̱', lawe' da dxelexúnbeaba' chi'e̱. 5 Quebe zjácale̱ba' tu benne' quebe zaj núnbeaba'. Dxuluzrúnnujba' lau benne' na' lawe' da quebe dxelexúnbeaba' chi'i benne' quebe zaj núnbeaba'.

6 Bchálajle̱ Jesús benne' ca' da dxulé'e nigá, na' benne' ca' quebe guléajni'ine̱' bi zéaje̱ da guzre Jesús le̱'.

7 Nadxa Jesús guzre̱' benne' ca' da xula:

―Da li dxapa' le'e, neda' naca' dxa xu'u naga dxelú'u bénneache zaj naque̱' ca zrila' chia' ca'. 8 Xúgute̱ benne' dxuluxúe̱' zrila', benne' belelé̱'e̱ nédxudxa ca neda', gulaque̱' gubán, ne tu gulebánzqueze̱'. Zrila' ca' quebe beléneba' chee̱ benne' ca'. 9 Neda' naca' dxa xu'u. Bénnea' chu'e̱ ne̱ chia' neda', láqueze bénnea'. Gaque̱' ca tu zrila' dxu'uba', ne dxuajba' le'aj chee̱ba', na' dxezréleba' zríe̱du dxáguba'.

10 ’Benne' gubán ze̱'e̱ tuze chee̱ cuane̱'-ba', ne chee̱ gútete̱'-ba, ne chee̱ guzría xi'te̱'-ba'. Neda' bla'a chee̱ gápale xel-la' nabán, ne chee̱ gapa xánnele na. 11 Neda' naca' benne' chawe' dxuxúa' zrila' ca'. Benne' chawe' dxuxúe̱' zrila' ca' dxuzúe̱' xel-la' nabán chee̱' chee̱ guselé̱' zrila' ca'. 12 Benne' dxuxúe̱'-ba' lawe' da dxezi'e̱ lazruj, gate dxelé'ene̱' za becu' xi'a, na' dxusane̱' zrila' ca', ne dxuzrúnnuje̱', lawe' da quebe nácaqueze̱' benne' dxuxúe̱' le̱ba', na' zrila' ca' quebe zaj nácaba' be̱ cheé̱zqueze̱'. 13 Benne' nigá dxuzrúnnuje̱' lawe' da dxunze̱' zrin chee̱ si'e̱ lázruje̱', na' quebe dxe'e̱ gunne xue chee̱ba'.

14-15 ’Neda' naca' benne' chawe' dxuxúa' zrila' ca'. Cáte̱ze núnbea Xra' neda', na' neda' núnbe'a Xra', cá'anqueze neda' núnbe'a zrila' chia' ca', na' le̱ba' zaj núnbeaba' neda'. Neda' dxuzúa' xel-la' nabán chia' chee̱ guselá' zrila' ca'. 16 Cá'anqueze zaj zra' zrila' chia' quebe zaj zraba' lu le'aj nigá. Dxal-la' cheajxexri'a-ba'. Zrila' ca' xelunba' ca dxenná xrtizra', ne xelácaba' tu cueze, na' tuze benne' guxúe̱' le̱ba'.

17 ’Xra' nazrí'ine̱' neda' lawe' da dxuzúa' xel-la' nabán chia', na' xecá'a na. 18 Quebe nu seque' cua xel-la' nabán chia'. Neda' xuzúa' na cáte̱ze dxaca lázrequeza' neda'. Napa' xel-la' dxenná bea guzúa' na, ne chee̱ xecá'a na. Da nigá naca na da gunná be'e Xra' neda' guna'.

19 Gate benne' judío ca' belenne̱' dizra' caní, na' gulaque̱' chupa la'a xetú. 20 Benne' zan benne' ca' gulenné̱':

―¿Bizr chee̱ na' dxuzé̱ nágale chee̱ benne' nigá? Xu'e̱ be' xriwe̱', ne nadá xichaj lázrdawe̱'.

21 Xebal-le̱' gulenné̱':

―Tu benne' xu'e̱ be' xriwe̱' quebe séquene̱' guchálaje̱' caní. ¿Waca tu be' xriwe̱' xexún na xiaj lau tu benne' la chul-la?

22 Naca na beu' zaga, na' lu xe̱zre Jerusalén zaj zue̱' laní gate dxulusá lazre̱' ca guca gate gulegú'e̱ xudau' na' lu na' Dios. 23 Jesús dxedé̱' chale'aj xudau' na' naga naca lachila chee̱ Salomón. 24 Nadxa benne' judío ca' guléchaje̱' Le̱', ne gulé̱'e̱ Le̱':

―¿Bátalaqueze québedxa gunu' lue' chupa lázrentu'? Che lue' nacu' Cristo, Bénnea' sel-la Dios, gunnáte̱gala.

25 Beche̱be Jesús:

―Ba gucha' le'e, na' quebe guxéajle̱le chia'. Ca naca da dxuna' neda', ne dxuchíneda' xel-la' dxenná bea chee̱ Xra', dxululé'e na nu naca' neda'. 26 Le'e quebe dxéajle̱le chia' lawe' da quebe nácale zrila' chia', ca ba gucha' le'e nédxula. 27 Zrila' chia' dxelexúnbeaba' chi'a, na' neda' núnbe'a-ba', na' le̱ba' dxelauba' neda'. 28 Benne' zaj naque̱' zrila' chia', dxunézruja' chee̱ benne' ca' xel-la' nabán da zeajlí canna, ne cabáta'quezdxa xelebía xi'e̱, na' quebe nu seque' xecá'a le̱' lu na'a neda'. 29 Xra' be̱nne̱' neda' benne' caní, na' Le̱' nácadxe̱' szren ca xúgute̱ bénneache, na' quebe nu seque' xecá'a benne' ca' lu na' Xra'. 30 Neda', ne Xra' tuze nácantu'.

31 Nadxa benne' judío ca' gulequé̱'e̱ xiaj xetú chee̱ xelútie̱' Jesús. 32 Nadxa Jesús guzre̱' benne' ca':

―Ba bé̱nqueza' da zan da chawe' laule le'e, dxuchíneda' xel-la' waca chee̱ Xra'. ¿Nula chee̱ da chawe' caní güele neda' xiaj?

33 Belexeche̱be benne' judío ca':

―Quebe güentu' lue' xiaj lawe' da nunu' da chawe'. Dxuntu' na lawe' da gunnéu' schanni' chee̱ Dios. Lue' nacu' bénneache, na' dxun cuinu' Dios.

34 Nadxa Jesús guzre̱' benne' ca':

―Lu da nadxixruj bea chee̱le le'e naxúaj xrtizra' Dios, dxenná na: Le'e nácale dios ca'. 35 Quebe gaca tábagadxu ca da naxúaj na lu xiche chee̱ Dios, na' Diósqueze̱' gunné̱' chee̱ benne' ca' gulezí'e̱ xrtizre̱' zaj naque̱' dios ca'. 36 Che Dios bzue̱' neda', ne gusél-le̱' neda' lu xe̱zr la xu nigá, ¿bizr chee̱ na' dxennale le'e gunnéa' schanni' chee̱ Dios lawe' da gunnéa' naca' Zri'ine Dios? 37 Che quebe dxuna' ca naca da dxun Xra', quebe chéajle̱le chia'. 38 Che dxuna' na, lácala quebe dxéajle̱le chia' ne̱ chee̱ da dxennéa', le chéajle̱ chia' ne̱ chee̱ da ca' dxuna', chee̱ nézele Xra' zúale̱ne̱' neda', na' neda' zúale̱na' Xra'.

39 Xetú lasa gulaca lazre̱' xele̱l-le̱' Jesús, na' Le̱' gulé̱' lu na' benne' ca'.

40 Nadxa bezrín Jesús dxu'a xe̱gu Jordán chalá'a naga dxalaj gubizra, na' begá'ane̱' na', naga guzúa Juan nédxute̱ dxuchúe̱' bénneache nisa. 41 Benne' zan xjaque̱' xeajlenné̱'e̱ Jesús, na' gulenné̱':

―Juan, da li quebe bi xel-la' waca zren be̱ne̱', na' xúgute̱ da gunné̱' ca naca chee̱ benne' nigá naca na da li.

42 Benne' zan guléajle̱'e̱ chee̱ Jesús lataj na'.