39
Neda' gunnía': Guxúe xanne' cuina' chee̱ quebe guna' dul-la
lu da guchálaja'.
Tu guxúe xánnezqueza' ca da guchálaja' dxácate̱ na'
zua benne' we̱n da cale̱la naga zua'.
Guzúa' zrize ca tu benne' quebe dxaca nnie̱',
ne québequeze bchálaja' da xrlátaje,
na' bzáladxa xel-la' dxudía chia'.
Guca lázrdawa' ca tu da dxala,
na' lu da dxulaba lazra' guca na ca tu xi'.
Na' gunaba' lau Xránadxu, gunnía':
Xran, ble'e neda' da gaca chia',
ne ájate̱ zra gaca bana'.
Bzéajni'i neda' chadite̱ nazruzre gatia'.
Nunu' chia' sua' bábaze zra,
na' iza chia' québequeze bi naca na lau Lue'.
¡Da líqueze quebe bi zaj naca zra chee̱ xúgute̱ bénneache!
¡Da líqueze zaj naca bénneache ca tu zrúl-laze!
¡Da líqueze dácheze naca zaj dxe' bénneache gunne xue
chee̱ xel-la' nabán chee̱'!
¡Dxulucúdie̱' xel-la' gunní'a, ne quebe zaj nézene̱'
nu chee̱ gaca na!
Na'a, Xran, ¿bízraqueze cueza lazra'?
Tuzu' Lue' dxal-la' cueza lazra'.
Bselá neda' lu xúgute̱ da zrinnaj da be̱na'.
Quebe gu'u lataj benne' xala ca' xelún le̱' chia'.
Guzúa' zrize, ne quebe bi bchálaja'
lawe' da Lué'queze be̱nu' guca caní chia'.
10 Becá'a xízrawe̱' da bzu' lu be̱la' dxen chia'.
Bache gatia' lu da dxusacu' neda'.
11 Dxudéu' ba xa' tu benne' ba nun dul-la
chee̱ dxuzéajni'inu' le̱',
ne ca dxun béadu dxuteba' ladxe' dxuzría xi'u
da nazrí'idxe bénnea'.
¡Da líqueze quebe bi zaj naca zra chee̱ xúgute̱ bénneache!
12 Bene da dxenaba' lau Lue', Xran,
ne bze̱ naga ca da dxuláwizra' Lue'.
Quebe su' zrize gate zua' dxebezra' lau'
lawe' da naca' lau Lue' ca tu benne' dxedaze̱', ne quebe de̱ lizre̱',
ne naca' ca tu benne' quebe de̱ xe̱zr la xu chee̱'
ca gulaca xra xrtawa' ca'.
13 Bsan neda' chee̱ gata' lataj xezí' le dipa'
nédxula ca xexá'a xenitia'.