1 Nen dute̱ xel-la' zren lazre' chia' guleza lazra' Xrana' Dios,

na' bze̱ nague̱' chia', ne benne̱' da gunábeda' Le̱'.

2 Bebéaje̱' neda' ca tu lu xe̱dxu situj, ne lu da naca

Bzue̱' ni'a ca tu lu xiaj xre, ne begu'e̱ neda' neza li.

3 Be̱ne̱' dxul-la' tu da cube da naca na da dxue lá'ana'

Benne' zante̱ xelelé'ene̱' da nigá dxune̱', na' xelezrebe̱' Le̱',

ne xuluxrén lazre̱' Xránadxu Dios.

4 Ba neza zrente̱ naca na chee̱ bénnea' dxuxrén lazre̱'

ne quebe dxune̱' ca dxelún benne' ca' dxulucá'ana szrene̱'

ne quegá ca dxelún benne' ca' dxelún lazre̱'.

5 Da zante̱ be̱nu', Xrana' Dios, da dxebánentu',

ne ca zaj naca da dxezá lazru' gunu' chee̱ntu'

Chela nu guzenda' ca zaj naca na,

ne che guchálaja' chee̱ na, quebe baben tu na.

6 Quebe dxezaca ba lazru' béadu ca' gutia' lau',

ne quebe gunabu' béadu ca' guzézxea' lau', u dxen chee̱

san gusálaju' naga' chee̱ xenda' chi'u.

7 Nadxa gunnía': Guná' xque, za'a neda'.

Lu xiche lá'azxa naxúaj na ca naca chia'.

8 Dxezaca ba lazra' guna' ca da dxaca lazru' Lue', Dios chia',

na' da nadxixruj be'u zua na lu xichaj lázrdawa'.

9 Ca naca da xrlátaje chiu' ba bzenda' bénneache

naga zaj nazraga chiu' bénneache zante̱.

Gunná' xque, quebe guzúa zria',

ca nézqueznu' Lue', Xrana' Dios.

10 Quebe bcácheza' ca da xrlátaje chiu' lu lázrdawa'.

Ba bchálajqueza' ca naca xel-la' li lazre' chiu',

Quebe guzúa' zri ca naca xel-la' dxexache lazre' chiu',

ne ca naca da li chiu' ládujla benne' zante̱ zaj nazrague̱' chiu'.

11 Xran, quebe chenu' xexache lazru' neda'.

Xel-la' dxexache lazre' chiu', ne da li chiu'

12 Lawe' da ba guléchajle̱'e̱ da cale̱la ca' neda',

da cale̱la ca' da ba nuna' zaj zria na neda',

Zaj naxándxa na ca zaj naca xicha xíchaja', na' dxedú lazra'.

13 Dxenaba' lau', Xran, guseláu' neda'.

Xran, be̱n ba xuzre gácale̱nu' neda'.

14 Be̱n xelexedué'e, ne xeleque zréaje

xúgute̱ benne' ca' dxelaca lazre̱' xelútie̱' neda'.

Be̱n xeajxaca bzé̱bela, ne xelexedué'e

benne' ca' dxelezá lazre̱' xelune̱' chia' da cale̱la.

15 Be̱n xeleque zréaje̱' lawe' da belún zréaje̱' neda'

benne' ca' gulé̱'e̱ neda': “E, e.”

16 Be̱n xelebé, ne xelezúe lu da ba neza xúgute̱ benne' ca'

ne be̱n xelennáqueze benne' ca' zaj nazrí'ine̱' Lue',

Xelenné̱': “Xegá'ana szrénqueze Xránadxu.”

17 Láqueze sua' neda' lu da ba xa', ne lu da baxache',

guxúequeze Xrana' Dios ájala gune̱' chia'.

Nacu' Benne' dxácale̱ne̱' neda', ne Benne' weselá chia'.

Dios chia', quebe chenu' gácale̱nu' neda'.