1 Che agudejd balti dxej, biusac Jesús neṉ guedx Capernaum. Dxejcti biejn diajg rebejṉ arbäjzni. 2 Bidopgajc xhidalduxh bejṉ. Gudxaj neṉ yu'. Nicla rolä' di niajḻ nisiujreni. Dxejcti caguluii Jesús xtidx Dios lo rebejṉ. 3 Dxejcti bidzujṉ tajp bejṉ, nuureni te bejṉ ni digacti guiniib; siädnärenini lo Jesús. 4 Luxh di niajcdi nidzujṉreni cadro suga' Jesús, sa'csi yu' xhidajl bejṉ ro'c. Ni'c baxhalreni yejc yu' nejz cadro sujni. Dxejcru cadro baxhalreni basiäjtreni da' ni naga' beṉracxhuuga lojni. 5 Che bahuii Jesús rililajzreni, dxejc räjpni loj beṉrachxhuuga:

―Xi'nä, agubicaj rextojḻlu.

6 Sas gaii bejṉ ni ruluii leii ni sobga' ro'c bejnreni xhigab neṉ lastooreni, naareni: 7 “¿Xhicuent rnii niguiire scree? Caniyajni Dios; rut rajcdi rudzucaj dojḻ. ¡Diostis rajc rudzucaj dojḻ!” 8 Dxejcti gucbegajc Jesús xhi xhigab cayujnreni. Dxejc räjpni lojreni:

―¿Xhicuent rujntu xhigab si'c neṉ lastootu? 9 ¿La guyasiru gäbni loj beṉracxhuure: “Agubicaj rextojḻlu”, o la gäbni: “Huistie, cua' xta'lu, gusaj”? 10 Baj ṉaj, te gantu rajc rudzucaj Xi'n Dios, nani gujc Niguii, dojḻ lo guedxliujre, caniä loj beṉracxhuure:

11 ―Lojlu rniä, ¡Huistie, cua' xta'lu, huij rolijzlu!

12 Lagajc dxejc huistie beṉracxhuuga, guläzni xta'ni, biriini ro'c nez loj guiraareni. Ni'cni bidxelo guiraareni. Dxejc gulä'preni xpala'n Dios, räjpreni:

―Gajdpacnu guihuii sa' dzuunre.

13 Dxejcru gubisac Jesús ro' nis xten Galilee, luxh che bidojp guiraa rebejṉ lojni, baluiini xtidx Dios lojreni. 14 Sasaj Jesús che bidxaagni Leví, xi'n Alfeo. Sobga'ni cadro rusquijxni rebejṉ. Dxejc räjp Jesús lojni:

―Gudanajl narä.

Sas huisuni, sanajltini Jesús.

15 Dxejc sobga' Jesús cayajwni rolijz Leví. Luxh sobganäj Jesús xhidajl reni rusquijx, näjza rebeṉdojḻ ni di chasanäj leii, näjza rexpejṉpacni, lo mex. Xhidajlreni tre', luxh sanajlreni Jesús. 16 Dxejcru rebejṉ ni ruluii leii näj refarisee, che bahuiireni cayaunäjni renani rusquijx näjza rebeṉdojḻ, räjpreni loj rexpejṉpac Jesús:

―¿Xhicuent rbenäj xmastrtu reni rusquijx näj rebeṉdojḻ, luxh raunäjnireni, ränäjnireni?

17 Che biejn diajg Jesús xhi caniireni, räjpni lojreni:

―Renani nadip nadaan di guiquiin doctoor, per reni racxhuu rquiin doctoor. Dina niädtedxä rebeṉsa'c, biädtedxä rebeṉdojḻ, te gusiech lajzreni.

18 Cagucua'n rexpejṉ Juan näj rexpejṉ refarisee, renani najc rebeṉguidoo loj guedx Israel. Dxejc biääd gaii bejṉ loj Jesús, gunabdiidxreni lojni räjpreni:

―¿Xhicuent cagucua'n rexpejṉ Juan näj rexpejṉ refarisee luxh rexpejṉpaclu di gucua'n?

19 Dxejcti räjp Jesús lojreni:

―¿La rucua'n rebejṉ ni rdoṉ chää cadro ru' yäḻruchṉaa che meer suga' bi'n? Che meer suga' bi'n lojreni, direni gucua'n. 20 Per sidzujṉ dxej sibicaj bi'n lojreni, dxejc sii sucua'nreni.

21 ’Rut rucuaadi tla' ladcoob loj tla' ladyux, sa'csi ladcoob rxu'nni luxh rutiäjzni ladyuxga, dxejc xhiroobruni räjs. 22 Rutza rusäḻdi bin ni gajd guilaj neṉ guidyux ni abigaa. Sa'csi bin ni gajd guilajga sutiäjsni guijdga che guilajni, luxh sinijt binga näjza guijdga. Ni'cni nanab gusäḻni bincoob neṉ guidcoobza.

23 Te sabd, dxej ni rusilajz rexpejṉ Israel, sasaj Jesús nez loj reyuya'n. Sas gusloj rexpejṉpacni caläädx doj lo triuu. 24 Dxejc räjp refarisee, renani najc beṉguidoo loj guedx Israel, loj Jesús:

―Arniä, ¿xhicuent rujn rexpejṉpaclu dzuun ni di guchaag gunni neṉ dxej ni rusilajznu, ä?

25 Dxejcti räjp Jesús lojreni:

―¿La gajdtu goḻ nani bejn toDavid te huält, laani näj resa'ni, ä? Che biäädx xhi gauureni, gulaanreni. 26 Biu' David neṉ xyu' Dios cheni guyu' toAbiatar loj Dios. Abiatar sajcru loj rebixhojz ni guyu' neṉ xquidoo rexpejṉ Israel. Dxejc gudajw toDavid reyätxtiil ni dzuub ro'c. Badeedzanini gudajw rebejṉ ni yunäjni. Luxh rebixhojztis rajc rajw yätxtiilga.

27 Räjpza Jesús lojreni:

―Dios bejn dxe sabd sa'csi najnni naquiinpac gusilajz bejṉ. Dini niujn sabd te gapda bejṉni. 28 Ni'cni narä, Xi'n Dios ni gujc Niguii, näjza sabd rnibeä.