Tu yech par lo rë men Hebreo
1
Rë zhë re', kidi'zh Dios lo rë men por Xga'n Me
1 Chi tiemp, nayax wëlt no nayax mod, midi'zh Dios lo rë xuz be xa' tiemp por rë profet, xa' midi'zh por Dios. 2 Per nal, rë zhë lult re', Dios midi'zh lo be por Xga'n Me, porke ya' Xga'n Dios mila' Dios rë kwa'n nzho, no por Xga'n Me ngulo Me rëi. 3 Kuze' lë' Xga'n Dios kinu yub yalnazhon che'n Dios kwa'n maska ñaz bël, no tugaka Xga'n Dios Me nak yubska Dios, mbaino nzen Xga'n Dios rë kwa'n nzho kun widi'zh nazhon che'n Me. No or milox mitsumbe Xga'n Dios be lo rë kwa'n nzë'b xki be lo Dios, nguzob Me lad direch che'n Xuz Me Dios, Me nzho lo yibë', Me nile' mandad lo rë.
Más tsak Xga'n Dios lo rë ganj
4 Kuze', más tsak Xga'n Dios lo rë ganj, porke más tsak xmod ngululë Dios Xga'n Dios lo rë ganj, 5 porke lalta' nagat gab Dios se' lo tu rë ganj:
Lu nak Xga'na; nalse Lu zon par le'l mandad lo rë.
Mbaino ni naga ska di'zh Dios se' lo ni tu rë ganj:
Na nak Xuzal,
no lu nak Xga'na.
6 Per or mixë'l Dios tugaka Xga'n Dios lo yizhyuo re', se' mile' Me mandad:
Rë nak ganj da zuxib lo Xga'na.
7 Ter se' mize't Dios rë ganj che'n Dios:
Mile' Dios nak rë ganj, nela or nzo mbi gat nilu'te.
No rë xa' nile' zhi'n nazhon che'n Dios,
nilu' bixa' nela bël ga'.
8 Per or mize't Dios Xga'n Dios, se' nzhab Me:
Lu nak Dios;
nayot zhë lox le'l mandad,
mbaino dox nali le'le.
9 Nixo'byekal nile'l rë kwa'n nzhakla Dios,
mbaino niyi'l ninel rë kwa'n nile' nzhak nayi'lazh men lo Dios.
Kuze', lë' Dios che'nal ngulel.
No más mile' Dios nizak laxto'l lo rë xa' nichë'lal.
10 No nu se' nzobni' lo Yech che'n Dios:
No Lu, Señor, dizde or galo mizuxkwa'l rë kwa'n nzen yizhyuo.
Mbaino mis Lu mizuxkwa' yibë'.
11 Rë kure' lox nela nilox tu lar ga',
per Lu naban par dubta'.
12 Rë kure' tuzhal nela nituzh men tu lar ga',
no kubile nela nigubi men tu lar go'x,
per Lu, nayot yitlol.
13 No ngayot ngab Dios lo ni tu rë ganj che'n Dios:
Guzob lad direch da,
lu' le' mandad,
haxta or zhin zhë len,
che'ptsa (bi'ch laka) gak rë xa' nidilal xan ni'l.
14 ¿Taxa nanet go, nab tsa sprit nak rë ganj che'n Dios, rë ganj nixë'l Dios par gaknu rë men, xa' ngule la Dios par ban kun Dios par dubta'?