Guehtzy ni güya
LO MEÑÑ-HEBREU
1
Dioz günino me nó por Xiiñ me
1 Ba xtze xtahl vuelt no xtahl mód, ni ne Dioz, bieno meu profet yahc lehdy guno profet leeu dmeññ yahc nó; 2 per naꞌ ni ba gadziñgahsh gyluhx guiedzylie, Dioz günino me nó por Xiiñ me. No psaꞌn me ladzyña Xiiñ me ctzoo mdad gyre cos, no por leegahc bzaa me guiedzylie. 3 No por leeme rxal lo xguîlbyni-ro Dioz, no nac me mod-nac gahc Dioz, no leegahcme nguña gyre cos por xtiidz me porni beeiyu leeme. Bylux güdihby me dguîlquie nó, gürie me coo Dioz gybaa lad-drech.
Xiiñ Dioz‑e rtzoo mdad gyre ángel
4 Xiiñ Dioz, leeme rtzoo mdad gyre ángel, sca-ze mod-bdee Dioz le me neññ ma rsahc me que gyre ángel. 5 Porni Dioz nehx güyuꞌ dzé gu me ndruhty ángel:
Lii we dShiñaꞌ;
glohdy dzêrieꞌ zieññ dshiñaꞌ we lii.a 1:5 Sal. 2:7
Ni nehx günii me lguia ndruhty ángel:
Naa we gac xTad me,
no leeme gac dshiñaꞌ.b 1:5 2 S. 7:14; 1 Cr. 17:13
6 No dze-pshahl me Xiñ-lguhl me lo guiedzylie, ne me:
Gyre x‑ángel Dioz gzacbeeiy yâme leeme.c 1:6 Dt. 32:43
7 Lguia ángel yahc ne Dioz:
Rtzoo me gyre x‑ángel me beeiy mbedun,
no meññ-rtzoo xtziiñ me, rtzoo me lee beeiy bial.d 1:7 Sal. 104:4
8 Per lguia Xiiñ Dioz ne Dioz gahc:
Lii we Dioz, no de ni rtzooy mdad nehx ziuꞌ dzé zdibylgaau;
no rtzooy mdad xñahzu.
9 Rxilynoy ni nac xñahzû, no néladzyiꞌ ni dirquihñ;
no leewe naa ni nac xDioziꞌ güleꞌn lii,
no gülun guîlrxihly leññ xguîlmbahñiꞌ ma xroꞌ que meññ-nuno yahquiꞌ lee.e 1:8-9 Sal. 45:6-7
10 No zegahc günii Dioz, ne me:
Lii, rtzooy mdad, bzaay guiedzylie,
no lii gahc bzaay gybaa.
11 Znihty yahcu, per lii nehx znihtyiꞌ;
no gyreu ziuhsh beeiy riuhsh shab meññ;
12 ssheꞌdxiꞌu beeiy rieꞌdx shab meññ,
no zdzeeu beeiy rdzee shab meññ.
Per lii naꞌ, nehx rdzee mod-nuy;
no nehx zdibylgaa x‑ihziꞌ.f 1:10-12 Sal. 102:25-27
13 Dioz nehx güyuꞌ dzé gu me ndruhty ángel:
Gürie dcoon lad-drech,
xtâ glo ctzon de ni gyre meññ ni rdziadzyno lii guisshiby yâme loꞌy.g 1:13 Sal. 110:1
14 Gyre ángel, spirt‑e leeyâme ni nu lo xtziiñ Dioz, ni rshahl Dioz leeyahc gacno gyre meññ ni guislaa Dioz lee de lo guîlnadz ni ziaad.