2
Güieꞌ nó di gynityxñahz nó
1 No leewe rquihñu ma yquee dihqy nó didz-uli ni ba bieññ nó, lehdy di gynityxñahz nó. 2 Leiy ni bdee Dioz ba xtze, pshahl meu no ángel yahc, no guhc mod-neu, no meññ-ptzoo yahc guîlquie no di nzobdiidz, cuaꞌ guîlné ni nac xñahzû. 3 ¿Bia mód‑e naꞌ nlaa nó de lo guîlné ni ziaad bâḻ di yquee dihqy nó de ni ba bylaa nó, to ni xroꞌ we leeu? Porni nier Crist bieno leeu meññ, no meññ ni bieññu bdee yâme diidz nó, ni uli we leeu. 4 No zegahc Dioz bluu me ni uli we leeu por gyre ni ngann no guîlrtzunadz no zrieñ milagür ni ptzoo me, no por Spirt-Sant ni bdee me nó gyre gyzasy mod-racladzy me.
Jesúz rislaa me meññ
5 Dioz nehx ne me ángel yahc ctzoo mdad guiedzylie ni ziaad, ni ganii nó de lee. 6 Per lo Guehtzy ru queꞌ xtiidz Dioz nu ru bdee to meññ diidz ne:
Dioz, ¿dxu we nac meññ, lehdy di guiaaḻladzyiꞌ leeyâme?
¿Dxu we nac meññ lehdy cu ihqyiꞌ leeyâme?
7 Psaꞌniꞌ leeyâme ma uxiee que ángel yahc,
güluguiay leeyâme no psahquiꞌ leeyâme beeiy ni dziib coron ihqy,
no bdeedyiꞌ de ni ctzoo yâme mdad gyre ni bzaay;
8 gyre ni nu lo guiedzylie psaꞌniꞌ lee ladzyña yâme.h 2:8 Sal. 8:4-6
No hor-psaꞌn Dioz gyreu ladzyña yâme, nehx güloo Dioz mbehty diby lad ni di ñuꞌ ladzyña yâme, nîcze nehx ziaꞌ rwieꞌ nó bâḻ gyre cos rtzoo yâme mdad lee. 9 Per rwieꞌ nó Jesúz, ni biaꞌn ma uxiee que ángel yahc, no ba nuguia me no rsahc me porni güdedy me guîlguhty por nó. No mod-rieꞌ, por xlaꞌy Dioz xguîlguhty Jesúz gucnou gyre meññ.
10 Dioz bzaa me gyre ni nu no gyreu nu ladzyña me, no biuꞌladzy me tziyno me xtahl meññ ycaꞌ yâme xguîlbyniꞌ me scâsy xiiñ me. Dioz güdahp me de ni bdee me ñahz güdedy Jesúz ni nadz, no mod-wé gucnza de ni biahd me, porni leeme we ni zunier lahd gyre xiiñ Dioz par guislaa me leeyâme. 11 Porni meññ-nu nunzy par Dioz no zegahcu Jesúz ni rtzoo leeyâme par Dioz, tohzy‑e xTad gyre yâme. No leewe Jesúz nehx rtuꞌ me ga me meññ-wé yahc behtzy me no byzan me leeyâme, 12 mod-ganii lo Guehtzy ru queꞌ xtiidz Dioz, ne me:
Gunon dbetzy yahcaꞌ no dsan yahcaꞌ diidz de lii,
no guḻaꞌ himn par lii glaꞌy ru rdohp yâme.i 2:12 Sal. 22:22
13 No gyzac sto ru neu:
Naa nehx squeꞌdadzyaꞌ mbehty no Dioz.
No gyzac neu:
Naa zuu neꞌ, no meññ ni bdee Dioz naa.j 2:13 Is. 8:17-18
14 No mod-xiiñ gahc to family tohzy biahl no tohzy rieñ leeyâme, no zegahcu Jesúz, guhl me lo guiedzylie lehdy guhty me par bnidylo me bêndzab ni beeiyu lee rgaꞌdy. 15 No mod-wé guislaa me meññ ni zidguiahc beeiy ni nliiby tirgahc porni rdzie yâme guîlguhty. 16 Uliu we Jesúz nehx biahd me lehdy gacno me ángel yahc, mazyg biahd me lehdy gacno me meññ-ziaad de lo xfamily Braṉ. 17 No leewe, güdahp me de ni güyuꞌ me beeiy gahc xmeññ me, lehdy guhc me bahl ni nac jefy ni rioob meññ no ni rtzoo gyreu zaꞌgndzi lo Dioz, no bdee me leegahcme beeiy to gun lehdy gyruu xguîlquie meññ-xguiedzy me. 18 Sca-ze güdedy me gyrehzy ni nadz no gucladzy bêndzab nquihly leeme, were naꞌ beeiy gacno me meññ ni ne bêndzab yquihly lee.