1 Di csaꞌn laꞌd de ni guîntzi saꞌ laꞌd mod-rîntzi saꞌ meññ-rman. 2 Di guiaaḻladzy laꞌd gdee xiryuꞌ laꞌd gydzihñ meññ-mbiuhz, porni niwé ptzoo zrieñ meññ no nehx nann yâme bdee xiryuꞌ yâme bydzihñ ángel yahc.

3 Di guiaaḻladzy laꞌd meññ-nyagü lidzyguiib, scâsy ñahcu beeiy ni nyagü laꞌd tohzy no leeyâme; no lâ cu ihqy laꞌd meññ-rtzoo rsahc meññ lee, scâsy ñahcu laꞌd gatzoo gasahc meññ lee.

4 Rquihñu gyre meññ gap xpeeiy no guîltziahl, no di guisquiee meññ tziahl no seno zrieñ; porni Dioz ctzoo guîlguxtisy chehsh meññ ni rzeno ni nehx tziahl no chehsh meññ ni rzeno tziahl sto.

5 Di gyzîbyladzy laꞌd gap laꞌd xtahl medy; lâ gyxilyno glohdy ni rahp laꞌd, porni Dioz ne me: “Nehx zboodadzyaꞌ lii ni nehx ssanaꞌ lii tohguiꞌ.”f13:5 Dt. 31:6,8; Jos. 1:5 6 No mod-wé sinn di yqueꞌdadzy nó beeiy gynii nó:

7 Di guiaaḻladzy laꞌd meññ-bluu no bieno xtiidz Dioz laꞌd; lâ guitsêlou laꞌd xnahc byruqueꞌ ni mos ni ptzoo yâme no mod-bylíladzy yâme Dioz, no mod-wé gahc‑e gylíladzy laꞌd.

8 Jesucrist nu gahcme dzé ni güdedy yahc, no leegahc me nu ni naꞌ, no dzé ni ziaad ziaꞌr ni nehx zluhx. 9 Leewe, di guisnáḻ laꞌd gyre gyzasy ni rluu meññ ni nehx rnii tohzy no xtiidz Crist. Ma mos‑e gacno xlaꞌy Dioz tzu dguîlmbahñ nó zaꞌgndzi, no di guisnáḻ nó mod-ne leiy lguia guîlrahgü; no leiy-rieꞌ yahc, nehx racnou meññ ni rtzoo leeu.

10 Rahp nó ni zidguiahc beeiy to ltar ru rzacbeeiy nó Dioz, nacu beeiy to gun par leeme, no gyre bahl ni rtzoo dziiñ leññ xiydoo meññ-Isṟael nehx beeiy gahgü yâme ni dxie lo ltar ni rahp nó. 11 Porni xjefy gyre bahl riyno me xrieñ maꞌ leññ ido-caḻ Ru Ma Nda, lehdy csiaaḻladzy Dioz xguîlquie meññ, per xbiahl ma-rieꞌ yahc no xdziht yâmaꞌ, rqueꞌ gue yahcu ruꞌ guiedzy. 12 No mod-wé Jesúz güdedy me guîlguhty stziuꞌ de ciuda, no por xrieñ me ni byxieꞌ ptzoo me nó nunzy par Dioz. 13 Leewe, tzo nó gyo nó Jesúz stziuꞌ de guiedzy, no tedy nó ni nac to guîlrtuꞌ beeiy ni güdedy gahcme. 14 Porni lo guiedzylie-rieꞌ nehx rahp nó ciuda ni nehx znihty, mazyg gayo nó ciuda ni ziaad ziaꞌr. 15 No leewe, di csaꞌn nó de ni cuguia nó Dioz por Jesucrist, nacu to gun ni gdee nó leeme, no ctzoo nó leeu no diidz ni rruu druꞌ nó ni rnii rlídadzy nó leeme. 16 Di guiaaḻladzy laꞌd ctzoo laꞌd ni mos, no lâ gacno saꞌ laꞌd no ni beeiyu laꞌd; porni leeyahcu we gun ni rxilyno Dioz.

17 Lâ gzoob xtiidz meññ-rluu laꞌd no lâ ctzoo ni ga yâme laꞌd, porni leeyâme rguꞌ ihqy yâme xguîlmbahñ laꞌd tirgahc, porni nann yâme gydzihñ dzé gynii yâme lo Dioz gyre ni ptzoo yâme. Lâ yquee ihqy laꞌd leeyâme lehdy beeiy ctzoo yâme xtziiñ Dioz lahd laꞌd no guîlrxihly sinn di gzacno yâme, porni bâḻ gazacno yâme la, nehx zacnou laꞌd.

18 Lâ gnab lo Dioz por noꞌ; nann noꞌ to guîlrieñ-mos‑e rahp noꞌ, porni racdadzy noꞌ gyre ni ctzoo noꞌ gacu mos. 19 No mahbu rnabaꞌ laꞌd gnab laꞌd lo Dioz gdee me ñahz guibyguiataꞌ ru nu laꞌd ngueeḻy.

20 Dioz rguꞌ me meññ dzie tziaawy, no bispahñ me de lahd mînguty Jesucrist ni rtzoo mdad nó, no Jesucrist gahc gayahp me xmeññ me zaꞌgndzi ni zidguiahc beeiy xiily, no por xrieñ me ni byxieꞌ neññ de ni Dioz bdee me diidz ni ctzoo me no meññ, no nehx ziuꞌ dzé znihtyu; 21 Dioz gahc gdee me laꞌd ni rquihñ lehdy ctzoo laꞌd gyre ni riuꞌladzy me por Jesucrist. ¡Di tzu dzé gydibylgaa de ni gayuguia Crist! Modé gacu.

22 Rnabaꞌ laꞌd, rman, ctibladzy laꞌd ni bzan lo guetzy-rieꞌ ni gagun xguîlriehñ laꞌd, porni doozy diidz zidnou. 23 Racdadzyaꞌ gann laꞌd ba byruu dirman nó Timoteu lidzyguiib; bâḻ ngueeḻy gydzihñ me ru nun, were guidnon leeme dze-guiaḻaꞌ ru nu laꞌd.

24 Lâ gynii diux gyre lo meññ-rluu laꞌd, no lo gyre zrieñ xmeññ Dioz. Meññ-rman ni nu Italy gashahl yâme diux lo laꞌd.

25 Dioz cu xlaꞌy gyre laꞌd. Modé gacu.