1 Naa Santiagü, rtzon xtziiñ Dioz no xtziiñ Jesucrist ni rtzoo mdad, ganin diux lo xmeññ Dioz ni nu-raꞌdz gydo lo guiedzylie.

2 Dirman yahcaꞌ, hor-tedy laꞌd nitisy ni nadz, lâ gyxihly xtahl, 3 porni ba nann laꞌd bâḻ tedy laꞌd ni nadz sinn di csaꞌn de ni rlíladzy laꞌd Dioz, were zacnou laꞌd ma ctibladzy laꞌd. 4 Per lâ ctibladzy xtâ ru gydibylgaau, lehdy gyniꞌzy laꞌd zaꞌgndzi lo xtiidz me par gac laꞌd meññ-tziaawy ni nehx guiaadz mbehty leññ xguîlmbahñ.

5 Bâḻ dxuhch de laꞌd nehx nann xnahc ctzoo, gnab me lo Dioz lehdy gdee guîlriehñ leeme; Dioz, rdee me ni rnab meññ no nehx rreu, no nehx ne me nehx rquihñ gdee me ni rnab meññ leeme. 6 Per hor-gnab me lo Dioz, gylíladzy me gdee Dioz ni ganab me no di yqueꞌladzy me mbehty; porni dxu rqueꞌladzy la, zidguiahc me beeiy oḻ ni rahp nisdoo ni riyno mbeꞌ lee ñaz-rieꞌ ñaz-ru. 7 Meññ ni rqueꞌladzy la, di gynii leññ ihqy me ycaꞌ me behch ni ndee Dioz leeme, 8 porni rlíladzy me no chohp guîlmbahñ no di raḻ gap me tohzy guîlriehñ.

9 Rman ni nehx rahp ni tedydzé, gyxihly me porni rsahc me par Dioz; 10 no dxu ṟicü lee, gyxihly me de ni pobr leeme ñaz-lo Dioz. Porni zidguiahc meññ-ṟicü beeiy xguiee guix, nehx rleeu. 11 Hor-rruu ncübidz no rahc nlay, rqueꞌ gueu no rbihdzyu, no rzaꞌn xguieeu, no rnihty xguîlmosu. No modé gahc‑e meññ-ṟicü, znihty me lóni gayo me gap me ma xtahl medy.

12 Dxu ñahc beeiy meññ ni rtibladzy rdedy gyrehzy ni nadz; porni ru ba güdedy meu no nehx byxiññladzy me, Dioz zdee leeme ni zidguiahc beeiy coron ni rdee diidz ba ptzoo me gan, leeu we guîlmbahñ ni nehx zluhx ni ycaꞌ meññ ni rzacbeeiy leeme. 13 Hor-dxuhch rquihly guîlquie lee, di gynii me Dioz‑e gaquihly leeme; porni Dioz nehx nu ni beeiy nquihly leeme ntzoo me ni nadz, no leeme nehx nquihly me meññ ntzoou. 14 Mazyg meññ gahc‑e riuꞌladzy ni nahcsy, no guîlrieñ-wé rquihlyu no rzûbyñuw meññ ctzoo ni neu. 15 No de lo guîlrieñ-nadz naꞌ, ba ziaad guîlquie; no de lo guîlquie ru rahc ni neu, were ba zidnou guîlguhty.

16 No leewe, dirmanaꞌ ni ndzin leeyahc, di guisquiee laꞌd laꞌd gahc. 17 Dioz pur ni mos‑e riscady me meññ, leeme bzaa gyre ni rdee byniꞌ leññ gybaa no nehx ziuꞌ dzé ctzee me mod-nac me. 18 Leeme biuꞌladzy bdee me guîlmbañ-coby nó por xtiidz me ni nac ni uli ni bylídadzy nó, lehdy nier gahc nó ma qysahc de lo gyre ni bzaa me.

19 Lâ guitsêlou laꞌd nirieꞌ, dirmanaꞌ ni ndzin leeyahc: lâ guieññ nieꞌ xñahz ni rnii zrieñ, di gunt gynihzy laꞌd, ni di gydziaꞌdzy laꞌd ngueeḻy; 20 porni hor-gadziaꞌdzy meññ nehx beeiy rtzoo yâme ni riuꞌladzy Dioz. 21 Leewe, lâ csaan gyre ni nahcsy ni ristuꞌ ni rtzoo laꞌd no gyre ni nehx mos, no lâ yquee ihqy laꞌd xtiidz Dioz no to guîlrieñ-ndoo; no xtiidz me ni ba nu leññ xguîlmbahñ laꞌd, leeu beeiy guislaa laꞌd de lo guîlnadz ni ziaad.

22 Per lâ ctzoo ni ne xtiidz Dioz, no di gac laꞌd meññ ni rieññz leeu, ni risquiee leegahc. 23 Dxu rieññz xtiidz Dioz no nehx rtzoo ni neu, zidguiahc me beeiy meññ ni rwieꞌ lo spejü. 24 No luxz güieꞌ lo me lo spejü, stoozy hór ba biaaḻladzy me xnahc nac lo me. 25 Per dxu yquee ihqy ni ba günii Dioz, leeu we ni ma rsahc no rislaau meññ, no bâḻ di csaꞌn me de ni ctzoo me gyre ni neu sinn guiaaḻladzy me ni ba bieññ me la, Dioz zguꞌ xlaꞌy leeme no gyre ni rtzoo me.

26 Bâḻ dxuhch ne rtzoo ni ne Dioz, no luxu cuentz nac rnii me, were leegahcme risquiee me leeme, no ni ne me rtzoo me ni ne Dioz la, nehx rquihñu. 27 Ni ma riuꞌladzy dTad nó Dioz no ni ma xñahzu ctzoo meññ, leeu we nirieꞌ: Gacno meññ meññ-byzahby no ngünaviud hor-gadedy yâme gyrehzy ni nadz, no di ctzubeedy xguîlmbahñ me no ni nahcsy ni nu lo guiedzylie.