1 Lo tiemp-wé Herody, ni nac gobernador lo ṟegioṉ-Galilea, bieññ me diidz lguia Jesúz, 2 no ra me xmós me:

―Mpyquie-wé, Juaṉ ni rchôbnihs‑e leeme; gübahñ me de lahd mînguty gyzac, no leewe beeiyu leeme rtzoo me gyre nirieꞌ yahc ni ngann.

3 Günii Herody ze porni leeme ptzoo mdad bygaꞌ Juaṉ, blihby yâme lee caden, no güluꞌ yâme lee lidzyguiib. Ptzoo Herody ze por xtoḻ Herodíaz ni nac tziahl Felipy; Felipy naꞌ, behtzy gahcme we Herody, 4 no Juaṉ ra me Herody:

―Nehx xñahzu rahpiꞌ tziahl behtzy gahquiꞌ.

5 Herody naꞌ riñlo me igaꞌdy me Juaṉ, per rdzie me, porni gyre meññ ne Juaṉ, profet‑e leeme. 6 Per dze-guhc xilni Herody‑e naꞌ, byeꞌ xindzabdxuur Herodíaz glaꞌy ru dxie yâme, no byxilyno ṟeiy-Herody mod-ptzoo me. 7 Leewe bdee xtiidz me, ra me ndzabdxuur:

―Nitisy gnabiꞌ naa, zdedyaꞌu lii.

8 Were ra xmam me leeme gnab me ihqy Juaṉ ni rchôbnihs.

Leewe, ndzabdxuur ra me Herody:

―Bdee naa leññ to blad ihqy Juaṉ ni rchôbnihs.

9 Bioobu ṟeiy-Herody; per gumm ba bdee xtiidz me ñaz-lo meññ-dxieno me lee ruꞌ miax la, were ptzoo me mdad gac mod-ne ndzabdxuur. 10 No pshahl gahc me meññ ni bicchuꞌ ihqy Juaṉ leññ lidzyguiib; 11 no luxu bidno yâmeu leññ to blad no bdee yâmeu, cuaꞌ ndzabdxuur, no wé ba bdeedyu cuaꞌ xmam.

12 Byluxu, güya xmeññ Juaṉ, gülesy xcuerp me, biycaꞌdzy yâmeu; no luxu güya yâme bigyne yâme Jesúz.

13 Hor-gunn Jesúz ni guhc Juaṉ, byruu coo me de uga tohg me, no za me to leññ barcü diby lad, to ru ndruhty nehx nu. Per hor-gunn meññ bá glo za me, guiedzy ni nu yahc gahsh byruu meññ gazeꞌ, za ru za me. 14 Hor-byruu Jesúz leññ barcü, bwieꞌ me xtahl meññ no bioob me leeyahc, no psiaḻ me meññ-gayac-ure ni ziyno yâme lee. 15 Gumm ba gayahc guiaal la, were gübigy xmeññ Jesúz, ra yâme leeme:

―Neꞌ ba diby lad‑e leeu no ba udzie. Gu meññ-rieꞌ yahc tza yâme guiedzy-yaañ ni nu gahsh de neꞌ, dzicshii yâme ni gahgü yâme.

16 Ra Jesúz xmeññ me:

―Nehx rquihñ tza yâme; lâ gdee ni gahgü yâme.

17 Ra yâme leeme:

―Nehx rahp noꞌ mbehty guîlrahgü, nunzy gaay paṉ no chohp mbaḻ.

18 Ra Jesúz leeyâme:

―Lâ guidno leeu neꞌ.

19 Lux ptzoo me mdad gyre meññ cuia yâme lo yu ru nu guix-ngay. No luxu cuaꞌ me gydiby gaay paṉ-caḻ lo ña me no gyrop mbaḻ, no gülesy lo me gybaa, bdee me xquix Dioz, no ptzulaꞌy meu no bdee meu cuaꞌ xmeññ me, no wé ba güdiiz yâmeu, cuaꞌ meññ-dxie yahc uga. 20 No gyre yâme güdahgü glo bydzeꞌ yâme; no de guîlrahgü ni biaꞌn, ptohp yâme tzipychop dzomby ni bydzeꞌ. 21 Meññ-güdahgü, beeiy gaay mily mpyquie, no nehx güyuꞌ cuent meññ-ngünaa ni mbiux.

22 Bylux nirieꞌ ra Jesúz xmeññ me tzu yâme leññ barcü no tedy yâme stiby chehsh nisdoo sunier ga yâme, eguiid Jesúz gashahl me meññ-bidyo leeme gybiꞌ yâme. 23 Byluxu, güyehpy me chehsh to dahñ, zigynino me Dioz diby lad. No guhc guiaal; biaꞌn me uga lehzyme, 24 eguiid barcü ba za beeiy glaꞌy nisdoo, no guzlo gaguihñ oḻ leeu, porni rxan gaxuu mbedun. 25 Ba nchuulr‑e naꞌ, bydziñgahsh Jesúz ru za xmeññ me, gazeꞌ me xtziguia nzeꞌ lo nisdoo. 26 Hor-bwieꞌ xmeññ me ziaad me gazeꞌ me xtziguia nzeꞌ, bydzie yâme, no de dzieeby pquee yâme riedz ne yâme:

―¡Xguiaḻ meññ‑e nirieꞌ!

27 Per Jesúz ra leeyâme:

―¡Di yqueꞌladzy laꞌd mbehty; naa we, di gydzie laꞌd!

28 Were günii Pedr, ra leeme:

―Bâḻ lii ziaad‑e, Señor, ptzoo mdad guiaḻaꞌ lo nzeꞌ ru ziaadiꞌ.

29 Ra Jesúz leeme:

―Güde.

No biaht gahc Pedr de leññ barcü, no gazeꞌ gahc me lo nzeꞌ par tza me ru ziaad Jesúz. 30 Per hor-bieññ Pedr gaxuu mbedun-ro, bydzie me; no guzlo gahc gayaꞌb me, pquee me riedz, ne me:

―¡Gucno naa, Señor!

31 Were günahzy gahc Jesúz ña me, no ra leeme:

―¡Lii uxiee rlíladzyiꞌ! ¿Bia nacu cueꞌladzyiꞌ?

32 Hor-güyuꞌ yâme leññ barcü, biandzie gahc mbedun. 33 No meññ-nu leññ barcü bisshiby yâme lo Jesúz, no ra yâme leeme:

―Ulihbu we Xiiñ Dioz lii.

34 Hor-ba güdedy yâme stiby chehsh nisdoo, bydzihñ yâme to lo ṟegióṉ ni le Genesaret. 35 Meññ-nu uga, hor-bzaclo yâme Jesúz, psieññ saꞌ yâme gydo lo ṟegioṉ-wé, no güiyno yâme gyre meññ-gayac-ure yahc ru bydzihñ Jesúz. 36 No günab yâme leeme gdee me ñahz can yâme nîcze nieꞌ shab me; no gyre meññ-güdanu, biaḻ gahc yâme de xguîlguihdz.