1 Were lahd meññ-nac yahc fariseu no zrieñ muextr ni ruuḻ yahc xleiy Moiséz ni byruu yahc Jerusaléṉ gübigy yâme, ra yâme Jesúz:

2 ―¿Bia nacu nehx rtzoo xmeññiꞌ mod-ne xcostumbr dtadgul nó ni güyuꞌ yahc ba xtze? Porni nehx rguihby ña yâme mod-ne gahcu ctzoo meññ hor-ba dzictahgü yâme.

3 Per Jesúz günabdiidz leeyâme:

―¿Bia nacu zegahc nehx rzobdiidz laꞌd ni rtzoo Dioz mdad ctzoo meññ, no ma náḻ laꞌd xcostumbr-guhl laꞌd? 4 Porni Dioz ne me: “Bzacbeeiy xtadiꞌ no xmamiꞌ”;y15:4 Ex. 20:12; Dt. 5:16 no zegahc ne me: “Dxu gyniwaty lo xtad o lo xmam la, gaty yâme.”z15:4 Ex. 21:17; Lv. 20:9 5 Per ne laꞌd beeiy ga to meññ xtad o xmam: “Nehx beeiy gacnon lii, porni gyre ni rapaꞌ ñacnon lii, ba to gun par Dioz‑e leeu.” 6 No ne laꞌd nitisy dxu gynii ze, ba nehx rahp de ni gacno xtad o xmam. No porni rtzoo laꞌd ni ne xcostumbr-guhl laꞌd, leewe ba nehx rtzoo laꞌd ni rtzoo Dioz mdad ctzoo meññ. 7 Laꞌd ni ne meññ-tziaawy lee nîcze nehx uliu, de lehbu we bisnii Dioz profet-Isaíaz de laꞌd, ru ne me:

10 No ptohp Jesúz meññ-caḻ yahc gyzac, no ra me lee:

―Lâ guieññ, no lâ gann bia ne ni gayieññ laꞌd: 11 Ni rahgü meññ o ni roo meññ, dac‑e por leeu rtzoo meññ guîlquie. Mazyg ni rnii meññ, wé we rahc guîlquie par leeyâme.

12 Luxu gübigy xmeññ Jesúz, ra yâme leeme:

―¿Nanniꞌ la, meññ-nac yahc fariseu bydziaꞌdzy yâme no ni güniiy?

13 Per leeme ra me xmeññ me:

―DTadaꞌ ni nu gybaa, gyre plant ni nehx bdziib me, gylahdzu we. 14 Zî-nu meññ-rieꞌ; ngaḻ‑e leeyâme ni rluu zâ-ngaḻ ñahz. No bâḻ to ngaḻ tziyno me sto zâ-ngaḻ me la, gyrop yâme we ziahb leññ guieryu.

15 Were ra Pedr leeme:

―Gu noꞌ bia rnii nirieꞌ ni ganiiy ndaagü lo diidz.

16 Ra Jesúz leeme:

―¿Zegahc nehx rieññ laꞌd ni rnin la? 17 ¿Nehx nann laꞌd la, gyre ni rahgü meññ zau leññ meññ, no luxu rruuw de xcuerp meññ? 18 Per ni rnii meññ ziaadu de leññ guîlmbahñ, no niwé we ni rahc guîlquie par meññ. 19 Porni de leññ guîlmbahñ rruu guîlrieñ-nahcsy, guîlrgaꞌdy, de ni rzeno meññ tziahl zrieñ, de ni rzeno meññ nitisy dxu nehx tziahl yâme lee, guîlgübaan, guîlmbuxter, no guîlrnii didz-nahcsy contr zrieñ. 20 Nirieꞌ yahc‑e rahc guîlquie par meññ; per de ni nehx rguihby ña meññ hor-ba dzictahgü, nehx guîlquie leeu.

21 Byruu Jesúz de uga no za me lo ṟegióṉ ru nu ciuda-Tiro no ciuda-Sidóṉ. 22 Byruu to ngünaa ni nehx meññ-Isṟael lee, meññ-Canáṉ leeme no nu me lo ṟegióṉ ru bydzihñ Jesúz; bigyo me Jesúz no gaquee me riedz, ne me:

―¡Señor, lii ni ziaad de lo xfamily ṟeiy-Davit, bioob naa! Dindzaꞌbaꞌ nu mbenahcsy lee, no gatzoo gasahcu leeme.

23 Per Jesúz di nsaꞌ lo xtiidz me. Were gübigy xmeññ me, ra leeme:

―Gu leeme gybiꞌ me, porni ziaad me, rquee me riedz chehsh ru zioꞌb nó.

24 Were ne Jesúz:

―Dioz pshahl me naa nunzy par meññ-Isṟael ni zidguiahc beeiy xiily ni ba bynihty.

25 Per ngüna-rieꞌ naꞌ, gübigy me no bisshiby me lo Jesúz, ra me lee:

―¡Señor, gucno naa!

26 Ra Jesúz leeme:

―Nehx xñahzu gboo mu xpaṉ mbiux no gdee mu leeu, gahgü mbahcü.

27 Per ra me Jesúz:

―Ze we leeu, Señor; per zegahc‑e xtâ mbahcü rahgü ni riahb lo yu de ruꞌ xmiax xbixwaan maꞌ.

28 Were ra Jesúz ngüna-caḻ:

―¡Xroꞌ rlíladzyiꞌ! Leewe, beeiy gacu mod-neꞌy.

No lo gahc hor-wé, biaḻ gahc xindzaꞌb me.

29 Byruu Jesúz de uga, no güdedy me diby coo gá nisdo-Galilea; no luxu güyehpy me chehsh to dahñ no gürie me uga. 30 Bydzihñ xtahl meññ ru dxie me, no zidno yâme meññ-ndang, meññ-ngaḻ, meññ-ngop, meññ-nrung ña o nrung nieꞌ, no xtahl zrieñ meññ-gayac-ure. Bistzihñ yâme lee ru dxie Jesúz, no psiaḻ me leeyâme. 31 No rtzunadz meññ hor-bwieꞌ yâme meññ-ngop ba rnii, meññ-nrung ña o nrung nieꞌ ba guctziaawy, meññ-ndang ba rzeꞌ, no meññ-ngaḻ ba rwieꞌ. No guzlo yâme gaguguia yâme xDioz meññ-Isṟael.

32 Luxu günino Jesúz xmeññ me, no ra me leeyahc:

―Rioobaꞌ meññ-rieꞌ yahc, porni ba rahp tzonn dzé nu yâme no naa, no nehx rahp yâme ni gahgü yâme; nehx neu naa cshaalaꞌ leeyâme gybiꞌ yâme no galahn yâme, duhn nre gan leeyâme lo ñahz de guîlrlahn.

33 Ra xmeññ me leeme:

―¿Per bá glo ndzial nó guîlrahgü par xtahl meññ to ru ndruhty nehx nu, beeiy neꞌ?

34 Günabdiidz Jesúz leeyâme:

―¿Blac paṉ rahp laꞌd?

Ra xmeññ me leeme:

―Gahdzyu, no chohp tzonn mbaḻ-yaañ.

35 Were ptzoo Jesúz mdad gürie meññ-caḻ yahc lo yu, 36 no cuaꞌ me gydiby gahdzy paṉ-caḻ lo ña me no mbaḻ zegahc; byluxz bdee me xquix Dioz, ptzulaꞌy meu no bdee meu cuaꞌ xmeññ me par güdiiz leeu, cuaꞌ meññ-dxie yahc uga. 37 No gyre yâme güdahgü glo bydzeꞌ yâme; no de guîlrahgü ni biaꞌn, ptohp yâme gahdzy dzomby ni bydzeꞌ. 38 No meññ-rieꞌ yahc naꞌ, nac yâme tahp mily meññ-mpyquie no nehx güyuꞌ cuent meññ-ngünaa no mbiux. 39 Lux pshahl Jesúz gyre meññ zia yâme, no güyuꞌ gahc me leññ barcü no za me lo ṟegioṉ ni le Magdala.