1 Bylux günii Jesúz gyre nirieꞌ, ra me xmeññ me:

2 ―Ba nann laꞌd, ba schohp dzé gayaadz par gac lni-Pascü; no naa, Mpyquie-Pshahl Dioz Lee, zdee meññ naa lo ña meññ-rdziadzyno naa no yquee yâme naa lo cruzy.

3 Xjefy yahc bahl naꞌ, no muextr ni ruuḻ yahc xleiy Moiséz, no zrieñ mînguhl ni nac guxtisy lahd meññ-Isṟael, bydohp yâme ruꞌ palacy lo xpaty Caifáz ni nac xjefy gyre bahl. 4 Uga ptzoo yâme diidz guisquiee yâme lehdy gynahzy yâme Jesúz ngaꞌdzy gá, no igaꞌdy yâme leeme. 5 Per ne yâme:

―Nehx znahzy nó leeme lo lni, lehdy di gybiiñ meññ-guiedzy.

6 Güya Jesúz guiedzy-Betania, xiryuꞌ to mpyquie ni le Simóṉ ni biudz lady. 7 Lóni dxie Jesúz ruꞌ miax, bydzihñ to ngünaa no to frascü ni güyaa no guie ni le alabastro, no nu to ceitnixye leññu ni modni xguiaꞌ. Ngüna-rieꞌ güluꞌ me ceit-rieꞌ ihqy Jesúz. 8 Hor-bwieꞌ xmeññ Jesúz ni ptzoo ngüna-rieꞌ, bydziaꞌdzy yâme no ne yâme:

―¿Bia nacu bynihtyu xleꞌzy? 9 Ceit-rieꞌ beeiy ndoꞌu xguiaꞌ, lehdy ñacno xmedyu meññ-pobr.

10 Bieññ Jesúz ni ganii yâme, ra me leeyâme:

―¿Bia nacu gatziaꞌdzy laꞌd ngüna-rieꞌ? To ni mos‑e gatzoo me naa. 11 Meññ-pobr, tirgahc‑e nu yâme lahd laꞌd; per naa nehx ziunon laꞌd tirgahc. 12 Per ni ptzoo ngüna-rieꞌ hor-güluꞌ me ceitnixye dladyaꞌ la, gatzoo meu naa de ni igaꞌdzyaꞌ. 13 Gapyaꞌ laꞌd ni uli, rutisy gu meññ dtiidzaꞌ lo guiedzylie, zegahc zu yâme diidz ni ptzoo ngüna-rieꞌ, lehdy guitsêlou meññ leeme.

14 To lahd gydiby tzipychop xmeññ Jesúz, ni le Jud-Iscariot, güya me lo xjefy yahc bahl, 15 ra me leeyâme:

―¿Bla gdee laꞌd naa bâḻ gdedyaꞌ Jesúz lo ña laꞌd?

Were bdee yâme leeme treint medy-plat. 16 No lo hor-wé guzlo gayo me to mód lehdy gdee me Jesúz.

17 Primer dzé ni nac lni ni rtzoo meññ-Isṟael, dze-rahgü yâme paṉ ni nehx rahp levadur, gübigy xmeññ Jesúz, no ra yâme leeme:

―¿Bá glo racladzyiꞌ dziguistziaawy noꞌ gyreu lehdy gotziey ni rahc lo lni-Pascü?

18 Ra Jesúz leeyâme:

―Lâ tza ciuda ru nu to mpyquie-rzaclo laꞌd lee, no lâ ga leeme: “Ze ne Muextr: Ba gadzihñ dzé gac ni por lee biaḻaꞌ; leewe riuꞌdadzyaꞌ ctzon lni-Pascü xiryuꞌy no dmeññaꞌ.”

19 No mod-ra Jesúz xmeññ me, mod-wé ptzoo yâme, no uga bistziaawy yâme gyre ni rahc lo lni-Pascü.

20 Hor-güyuꞌ guiaal‑e naꞌ, gürie Jesúz ruꞌ miax no gydiby tzipychop xmeññ me. 21 Lóni gayahgü yâme, ra me leeyâme:

―Gapyaꞌ laꞌd ni uli, to de lahd laꞌd gdee naa lo ña meññ-rdziadzyno naa.

22 Gyre xmeññ me güyuꞌ trixd no guzlo ganabdiidz yâme leeme, to por to yâme ra:

―Señor, ¿dac naa la?

23 Ra Jesúz leeyâme:

―Dxu gagunihs xpaṉ no naa tohzy leññ blad, wé we gdee naa lo ña meññ. 24 Naa, Mpyquie-Pshahl Dioz Lee, rapaꞌ de ni tedyaꞌ gyre ni ganii lo Guehtzy ru queꞌ xtiidz Dioz de naa. Per ¡baazy dzii de mpyquie-gdee naa lo ña meññ! Ma mos‑e di ñahl me.

25 Luxu byruu Jud, ni ba nu par gdee Jesúz lo ña meññ-rdziadzyno leeme, ne:

―Muextr, ¿dac naa la?

Ra Jesúz leeme:

―Lii ba güniiyu.

26 Lóni gayahgü yâme, cuaꞌ Jesúz paṉ lo ña me, no bdee me xquix Dioz. Luxu, ptzulaꞌy meu, no bdee meu cuaꞌ xmeññ me, no ra me leeyâme:

―Lâ ycaꞌ nirieꞌ, no lâ gahgu; dcuerpaꞌ we leeu.

27 Luxu cuaꞌ me to cop lo ña me, bdee me xquix Dioz, no bdee meu xmeññ me, ra me lee:

―Lâ goo ni nu leññ cop, gyre laꞌd, 28 porni nirieꞌ we drieñaꞌ ni no lee rdee Dioz diidz nu sto mod-coby par tzu meññ tohzy no leeme, no gyxieꞌu par xtahl meññ hor-gatyaꞌ lehdy guiar xguîlquie yâme. 29 Gapyaꞌ laꞌd, ba nehx zibyguiat gooraꞌ nirieꞌ ni riaa no blatzy xtâ dze-ba diaa nunon laꞌd ru rtzoo dTadaꞌ mdad, were goo nó nicoby.

30 Bylux biiḻy yâme himn, byruu yâme, za yâme dañ-Oliv. 31 Hor-ba bydzihñ yâme, ra Jesúz leeyâme:

―Gyre laꞌd csaꞌn naa guial-rieꞌ; porni lo Guehtzy ru queꞌ xtiidz Dioz neu: “Igatyaꞌ mpyquie-gayahp xiily, no gyre xiily gyraꞌdz.”m26:31 Zac. 13:7 32 Per lux gybahñaꞌ, tzan ṟegioṉ-Galilea, nier naa, no luxu tza laꞌd.

33 Ra Pedr leeme:

―Nîcze gyre yâme csaꞌn lii, naa nehx ssanaꞌ lii.

34 Ra Jesúz leeme:

―Gapyaꞌ lii ni uli, guial-rieꞌ gahc‑e, dgueññ ziaꞌ cuiadz rig, lii ba tzonn vuelt güniiy nehx rzacloꞌy naa.

35 Gyzac ra Pedr Jesúz:

―Nîcze gatyaꞌ no lii, per nehx zapyaꞌ di rzacloꞌn lii.

No zrieñ xmeññ me günii mod-ne gahc Pedr.

36 Luxu güya Jesúz no xmeññ me to ru le Getsemaní, no ra me:

―Lâ cuia neꞌ gahc, eguiid naa tzan nú diaa, dzignabaꞌ lo Dioz.

37 No ziyno me Pedr no gyrop xiiñ Zebedeu, no guzlo gayuꞌ me trixd no gazacno me xtâ leññ xguîlmbahñ me. 38 Were ra me meññ-rieꞌ yahc ni ziyno me:

―Leññ dguîlmbahñaꞌ nu to xroꞌ guîltrixd, lé rluu gatyaꞌ. Lâ guiaꞌn neꞌ, no lâ cuianáꞌ no naa.

39 Luxu, za Jesúz stoozy zit-yaañ no bisshiby me lé güdihsh ihqy me lo yu, no günab me lo Dioz, ne me:

―Lii ni nac dTadaꞌ, bâḻ ñahcu ni ñaḻ, bislaa naa de lo ni nadz ni gabiahz naa; per dac‑e gac ni gynin, mazyg ni gyniiy‑e.

40 Luxu, gubyguiat me ru biaꞌn xmeññ me, no bwieꞌ me nishcahsy yâme, no ra me Pedr:

―¿Di ñaḻ dxi mbianáꞌ laꞌd no naa nîcze diby hór la? 41 Lâ cuianáꞌ no lâ gnab lo Dioz lehdy di ctzoo laꞌd ni racladzy bêndzab. Xguîlmbahñ laꞌd racladzy ctzoo ni ulihbu nac xñahzû, per xcuerp laꞌd nehx rtibladzy.

42 Gyzac za me, zignab me lo Dioz ni byrohp vuelt, günii me ne me:

―Lii ni nac dTadaꞌ, guîlné ni ba nac diidz tedyaꞌ, bâḻ di zaḻ tedyu sinn gacu la, were gac ni racladzyiꞌ.

43 Hor-gubyguiat me, gyzac bwieꞌ me nishcahsy xmeññ me, porni bydzeꞌ mpcaaḻ lo yâme. 44 Gyzac psaꞌn me leeyâme, no za me ni bionn vuelt, zignab me lo Dioz mod-günii gahc me. 45 Luxu gubyguiat me ru biaꞌn xmeññ me, ra me lee:

―¿Gagahsy ziaꞌr laꞌd no gayisladzy ziaꞌr laꞌd la? Ba bydzihñ hór ni ba nac diidz gdee meññ Mpyquie-Pshahl Dioz Lee lo ña meññ-guîlquie yahc. 46 Lâ guiahs, tzoꞌ. Lâ güieꞌ, ba gadziñgahsh mpyquie ni gdee naa.

47 Ganii ziaꞌ Jesúz ze, tohzy bydzihñ Jud, ni lee nac to lahd gydiby tzipychop xmeññ Jesúz, bydziñno me xtahl meññ ni zidno yahc spad no garrot ni pshahl xjefy yahc bahl no zrieñ mînguhl yahc ni nac guxtisy lahd meññ-Isṟael. 48 Jud naꞌ, ni gdee Jesúz lo ña meññ, ba bdee me to señ meññ-ziyno me lee, ra me leeyahc:

―Dxu ycurun lee, wé we leeme; wé lâ gynahzy lee.

49 No nehx byleer mazy, scâsy bydzihñ yâme, ra Jud Jesúz:

―¡Diux, Muextr!

No pcuruꞌ me lee. 50 Ra Jesúz leeme:

―Mígü, ni zidtzooy, ptzoo leeu.

Were gübigy gahc meññ-ziyno me lee, no günahzy yâme Jesúz lehdy tziyno yâme lee.

51 Per to lahd meññ-zuno Jesúz, güloo xispad me, no pchug me to gydiag xmós xjefy gyre bahl. 52 Were ra Jesúz leeme:

―Güluꞌ xispadiꞌ xilgaru. Porni gyre dxu rdeḻy no spad la, no spad gahc‑e gaty yâme. 53 ¿Puedy-ladzyiꞌ nehx beeiy nnabaꞌ nshahl dTadaꞌ xtahl ángel yahc ni ñacno naa, no ngueeḻy gahc‑e ntzoo meu? 54 No bâḻ ntzon ze la, ba nehx ñahc ni nu lo Guehtzy ru queꞌ xtiidz Dioz.

55 Luxu ra Jesúz meññ-zidnahzy leeme:

―¿Zidnot spad no garrot lehdy gynahzy laꞌd naa beeiy to meññ-gübaan la? Gyre dzé güyun ruꞌ idoró no laꞌd, blun meññ, no nehx günahzy laꞌd naa. 56 Per gyre nirieꞌ gayahcu ze lehdy gac ni ganii lo Guehtzy ru queꞌ xtiidz Dioz ni bzaa profet yahc ba xtze.

Lo hor-wé byxuunn gyre xmeññ Jesúz, no psaꞌn yâme leeme lehzyme.

57 Meññ-günahzy Jesúz, ziyno yâme leeme li Caifáz ni nac xjefy gyre bahl, no uga bydohp muextr ni ruuḻ yahc xleiy Moiséz no zrieñ mînguhl yahc ni nac guxtisy. 58 Pedr naꞌ, náḻ me ziht gá glo bydzihñ me lo xpaty xiryuꞌ xjefy gyre bahl; no güyuꞌ me, gürie me lahd meññ-rahp ruꞌ idoró, lehdy güieꞌ me bia ctzoo meññ-caḻ yahc.

59 Xjefy yahc bahl, no mînguhl yahc ni nac guxtisy, no gyre zrieñ meññ-nac guxtisy, gayo yâme dxu gynii ni nehx uli contr Jesúz, lehdy tzu mód gaty me; 60 per nehx bydzial yâmeu, nîcze bydzihñ xtahl meññ gayisquiee gyre gyzasy mód. Gyzac bydzihñ schohp meññ mazy ni ganii contr leeme, 61 ni ne yahc:

―Ne mpyquie-rieꞌ: “Naa beeiy nguiñguien xiydoró Dioz, no lo tzonn dzé nzan leeu gyzac.”

62 Were guzli xjefy gyre bahl, no ra me Jesúz:

―¿Nehx neꞌy mbehty la? ¿Bia leeu nirieꞌ ni rnii yâme chehshiꞌ?

63 Per Jesúz ba nehx günii me mbehty. Were ra xjefy gyre bahl leeme:

―Por le Dioz ni mbahñ, gahbyiꞌ noꞌ ni nac ni uli, bâḻ lii we nac Crist, Xiiñ Dioz.

64 Ra Jesúz leeme:

―Lii ba güniiyu. No gapyaꞌ gyre laꞌd, to dzé zwieꞌ laꞌd naa, Mpyquie-Pshahl Dioz Lee, dxien xlad-drech Dioz ni beeiyu lee gyreu. No güieꞌ laꞌd guiaḻaꞌ lo zá ni gyruu gybaa.

65 Were güdiix shab xjefy gyre bahl porni bydziaꞌdzy me, no ra me:

―¡Mpyquie-rieꞌ ganii me didz-nahcsy contr Dioz! ¿Bia mazy racdadzy nó tzu dxu gynii? Ba bieññ laꞌd ni ne me. 66 ¿Bia ne laꞌd naꞌ?

Ra yâme leeme:

―Rahp me doḻ, no rahp me de ni gaty me.

67 No luxu byxîbyshieñ yâme lo me, no güdihñ yâme leeme, zrieñ yâme rgahp lo me, 68 no ra leeme:

―Liix‑e nac Crist. ¡Günii dxu güdihñ lii!

69 Pedr naꞌ dxie me lo paty stziuꞌ, tohzydzi bydzihñ to criad, ra leeme:

―Lii zegahc güyuꞌy tohzy no Jesúz ni byruu lo ṟegioṉ-Galilea.

70 Per günii Pedr “yac”, bieññ gyre meññ-dxieno me lee, no ne me:

―Nehx nannaꞌ de bia ganiiy.

71 No luxu za me ñaz-ruꞌ puert ru bwieꞌ sto criad leeme, no ra ngüna-rieꞌ zrieñ meññ-nu yahc uga:

―Mpyquie-rieꞌ zegahc güyuꞌ me tohzy no Jesúz ni nac meññ-Nasaret.

72 Gyzac günii Pedr “yac”, bzaꞌd me le Dioz, no ne me:

―¡Nehx rzacloꞌn mpyquie-wé!

73 Stoozy hór meññ-dxie yahc sto lad, gübigy yâme Pedr no ra yâme leeme:

―Ulihbu we to de lahd xmeññ mpyquie-rieꞌ lii, porni xtâ mod-rniiy rdee diidz.

74 No guzlo Pedr ganiwaty me, no gyzac bzaꞌd me le Dioz, no ne me:

―¡Nehx rzacloꞌn mpyquie-wé!

Lo gahc hor-wé güriedz rig. 75 Were bitsêlou Pedr de ni ra Jesúz leeme: “Dgueññ ziaꞌ cuiadz rig, lii ba tzonn vuelt güniiy nehx rzacloꞌy naa.” Byluxu byruu Pedr de uga, biin me gyre gylux.