1 Bydohp meññ-nac yahc fariseu Jesúz, no zegahc lahd muextr ni ruuḻ yahc xleiy Moiséz, ni byruu Jerusaléṉ. 2 No bwieꞌ yâme lahd xmeññ Jesúz gayahgü no nehx güdihby ña yâme mod-zidseno gahc meññ-Isṟael, no por leeu byruu yâme contr xmeññ Jesúz. 3 (Porni meññ-nac yahc fariseu no gyre zrieñ meññ-Isṟael, náḻ yâme mod-ne xcostumbr xtadgul yâme ni güyuꞌ yahc ba xtze, no leewe nehx zahgü yâme bâḻ di quiiby nier ña yâme xtahl vuelt. 4 No ru ribyguiat yâme de lóguiaꞌ, rtzoo yâme mod-zidseno gahc yâme, nier rahz yâme, no were rahgü yâme. No nu xtahl zrieñ costumbr-guhl ni rtzoo yâme, sca mod-rguihby yâme vas, no csiht, no vasij-guiib, no luꞌn.) 5 No leewe meññ-nac yahc fariseu no zrieñ muextr ni ruuḻ yahc xleiy Moiséz, ra yâme Jesúz:

―¿Bia nacu nehx rtzoo xmeññiꞌ mod-ne xcostumbr dtadgul nó ni güyuꞌ yahc ba xtze, mazyg rahgü yâme no nehx nye ña yâme?

6 Ra Jesúz leeyâme:

―Laꞌd ni ne meññ-tziaawy lee nîcze nehx uliu, de lehbu we günii profet-Isaíaz de laꞌd, ru bzaa me lo Guehtzy ru queꞌ xtiidz Dioz, ne me:

9 No zegahc ra Jesúz leeyâme:

―¡Lâ güieꞌ xnahc‑e rsaꞌn laꞌd ni rtzoo Dioz mdad ctzoo meññ lehdy guisnáḻ laꞌd xcostumbr-guhl laꞌd! 10 Porni Moiséz naꞌ ne me: “Bzacbeeiy xtadiꞌ no xmamiꞌ”,d7:10 Ex. 20:12; Dt. 5:16 no zegahc ne me: “Dxu gyniwaty lo xtad o xmam la, gaty yâme.”e7:10 Ex. 21:17; Lv. 20:9 11 Per laꞌd, ne laꞌd bâḻ ga to meññ xtad o xmam: “Nehx beeiy gacnon lii, porni gyre ni rapaꞌ ñacnon lii, ni le Corbáṉ‑e leeu” (ni rnii ne: to gun par Dioz‑e leeu); 12 no ne laꞌd zegahc, dxu gynii ze la, ba nehx rahp me de ni ñacno me xtad me o xmam me. 13 No mod-wé we rteedy laꞌd ni ne Dioz ze gâsy no xcostumbr-guhl laꞌd ni cuaꞌ laꞌd glo ba xtze diaa, no luxu rteedy laꞌdu meññ-nu ni naꞌ. No rtzoo laꞌd zrieñ xtahl beeiy leegahcu.

14 No ptohp Jesúz meññ-caḻ yahc gyzac, no ra me leeyâme:

―Lâ guieññ ni ren laꞌd, no lâ gann bia ne ni gayieññ laꞌd: 15 Gyre ni rahgü meññ, dac‑e por leeu rtzoo meññ guîlquie. Mazyg ni rnii meññ no ni rtzoo meññ, wé we rahc guîlquie par leeyâme. 16 Dxu racladzy guieññ bia ganin la, yquee ihqy yâme dtiidzaꞌ.

17 Ru byruu Jesúz lahd meññ no güyuꞌ me leññ yuꞌ, günabdiidz xmeññ me leeme bia we ni günii me ndaagü lo diidz. 18 Ra me leeyâme:

―¿Zegahc nehx rieññ laꞌdu la? ¿Nehx nann laꞌd la, ni rahgü meññ nehx beeiy ñahcu guîlquie par leeyâme? 19 Porni nehx riuꞌu leññ xguîlmbahñ meññ, mazyg riuꞌu leññ meññ, no luxu rruuw de xcuerp meññ sto.

No nirieꞌ günii me, gyre guîlrahgü nyeu we. 20 No zegahc ne Jesúz:

―Ni rnii meññ no ni rtzoo meññ, wé we ni rahc guîlquie par meññ. 21 Porni de leññ xguîlmbahñ meññ rruu guîlrieñ-nahcsy, ni rzeno yâme tziahl meññ, ni rzeno yâme nitisy dxu nehx tziahl yâme lee, guîlrgaꞌdy, 22 guîlgübaan, guîlrzîbyladzy, ni rahc yâme meññ-dirquihñ, ni risquiee yâme, ni rahp yâme vicy, ni rtzumvidy yâme, guîlrnii didz-waty contr zrieñ, ni rguguia yâme leegahc yâme, no guîlgydi xguîlriehñ. 23 Gyre ni nacsy-rieꞌ yahc rruuw leññ xguîlmbahñ meññ, no rahcu guîlquie par meññ.

24 No byruu Jesúz uga. Za me lo ṟegióṉ ru nu ciuda-Tiro no ciuda-Sidóṉ. Bydzihñ me xiryuꞌ to meññ, no nehx gucladzy me ñann ndruhty, per di ñaḻ ñuꞌ me ngaꞌdzy. 25 Per gunn to ngünaa de leeme ni nu to mbenahcsy to xindzaꞌb. Güya gahc xmam ndzaꞌb no bisshiby me lo Jesúz. 26 Ngüna-rieꞌ naꞌ, mbiuhz‑e leeme ni rnii didz-griegü, meññ-Sirofenisy‑e leeme. Ru bydzihñ me, günab me gboo Jesúz mbenahcsy ni nu xindzaꞌb me. 27 Per Jesúz ra leeme:

―Bdee ñahz gahgü gax mbiux, porni nehx xñahzu gboo mu xpaṉ yâme no gdee mu leeu, gahgü mbahcü.

28 Per ra ngüna-rieꞌ Jesúz:

―Uliu we Señor, per zegahc‑e xtâ mbahcü riuꞌ leññ miax, rahgü maꞌ ni rsiahb mbiux.

29 Were ra Jesúz ngüna-rieꞌ:

―Xñahzu we güniiy. Ba beeiy gybiꞌy; mbenahcsy ba byruu xindzaꞌbiꞌ.

30 Were gübiꞌ me xiryuꞌ me, no bwieꞌ me xindzaꞌb me nashluꞌn, no ba byruu mbenahcsy lee.

31 Gyzac byruu Jesúz lo ṟegioṉ-Tiro, no güdedy me lo ṟegioṉ-Sidóṉ no zrieñ guiedzy ni nu lo ṟegioṉ-Decápolis, no bydzihñ me nisdo-Galilea. 32 Uga nu to mpyquie ni nguat no di raḻ gynii me zaꞌgndzi. Güiyno yâme leeme lo Jesúz, no günab yâme Jesúz cshob ña chehsh me lehdy guiaḻ me. 33 Were güiyno Jesúz mpyquie-rieꞌ diby lad de lahd meññ, no güluꞌ ihqy ña me leññ gydiag mpyquie-rieꞌ, no luxu byxîbyshieñ me no güdan me luhdz mpyquie-rieꞌ. 34 Luxu bwieꞌ Jesúz gybaa no cuaꞌ lidzydoo me, no ra me mpyquie-rieꞌ:

―¡Efata! ―ni rnii ne: ¡Byxaliꞌ!

35 No byxal gahc gydiag mpyquie-rieꞌ ni nguat, no guctziaawy gahc luhdz me no günii me zaꞌgndzi. 36 No gu Jesúz leeyâme na di ga yâmeu ndruhty; per nîcze ma ra me meññ-caḻ yahc di gu yâme leeu, ma ru yâmeu lo meññ. 37 No modni rtzunadz gyre meññ, no ne yâme:

―Gyreu rtzoo me mos; xtâ meññ-nguat rshal me gydiag no risnii me meññ-ngop.