1 Leññ dze-wé yahc gyzac bydohp xtahl meññ Jesúz, no nehx ziyno yâme ni gahgü yâme. Were ptohp Jesúz xmeññ me, no ra me leeyâme:

2 ―Rioobaꞌ meññ-rieꞌ yahc, porni ba rahp tzonn dzé nu yâme no naa, no nehx rahp ni gahgü yâme. 3 No bâḻ naa gapyaꞌ leeyâme gybiꞌ yâme no galahn yâme la, nre gan leeyâme lo ñahz‑e, porni lahd yâme byruu ziht.

4 Ra xmeññ me leeme:

―¿Per bá glo ndzial ni ñahgü yâme to ru beeiy neꞌ ru ndruhty nehx nu?

5 Günabdiidz Jesúz leeyâme, ra me:

―¿Blac paṉ rahp laꞌd?

Ra yâme leeme:

―Gahdzyu.

6 Were ptzoo me mdad gürie gyre meññ-caḻ yahc lo yu; no cuaꞌ me gydiby gahdzy paṉ lo ña me no bdee me xquix Dioz. Byluxu, ptzulaꞌy meu no bdee meu cuaꞌ xmeññ me, lehdy güdiiz yâmeu cuaꞌ meññ-caḻ yahc. 7 No zegahc güdahp yâme chohp tzonn mbaḻ-yaañ. No bylux bdee Jesúz xquix Dioz por leeyâmaꞌ, zegahc ptzoo me mdad güdiiz xmeññ me leeyâmaꞌ. 8 No gyre yâme güdahgü glo bydzeꞌ yâme; no biaꞌn gahdzy dzomby ni bydzeꞌ ni ba nehx güdahgü yâme. 9 No meññ-caḻ ni güdahgü yahc naꞌ, beeiy tahp mily yâme. Luxu ra Jesúz leeyâme gybiꞌ yâme, 10 no güyuꞌ gahc me leññ barcü no xmeññ me, no za me lo ṟegióṉ ni le Dalmanuta.

11 Bydzihñ meññ-nac yahc fariseu no guzlo gadeḻydiidz yâme no Jesúz; no lehdy nwieꞌ yâme bia beeiy rtzoo me, günab yâme ntzoo me to ni ngann ni nunzy Dioz beeiy rtzoo. 12 Cuaꞌ lidzydoo Jesúz, no ra me:

―¿Biahx‑e nacu rnab meññ ni nu yahc ni naꞌ ñahc to ni ngann ni nunzy Dioz beeiy rtzoo? Gapyaꞌ laꞌd ni uli, ba nehx zwieꞌ meññ-ni naꞌ mbehty ni ngann ni ntzunadz yâme lee.

13 Byluxu psaꞌn me leeyâme, no gyzac güyuꞌ me leññ barcü, no za me stiby chehsh nisdoo.

14 Biaaḻladzy xmeññ Jesúz niyno yâme ni ñahgü yâme, nunzy to paṉ ziyno yâme leññ barcü. 15 Ra Jesúz leeyâme:

―Gax lâ güieꞌ; lâ gap laꞌd no ni nac meññ-fariseu no ni nac Herody, ni zidguiahc yahc beeiy levadur.

16 No ra saꞌ yâme:

―Günii me ze, porni di nidno nó paṉ.

17 Per Jesúz naꞌ, nann me ni ganii xmeññ me. Were ra me leeyâme:

―¿Bia nacu ne laꞌd nehx rahp laꞌd paṉ? ¿Nehx ziaꞌ rieññ laꞌd no nehx nann laꞌd la? ¿Ndaagü xguîlriehñ laꞌd la? 18 Rahp lo laꞌd, ¿no di rwieꞌ laꞌd la? No rahp gydiag laꞌd, ¿no di rieññ laꞌd la? ¿Nehx ritsêlou laꞌd la? 19 Dze-güdiizaꞌ gaay paṉ güdahgü gaay mily meññ, ¿blac dzombyu bydzeꞌ ni biaꞌn ptohp laꞌd?

Ra yâme leeme:

―Tzipychopu.

20 ―No dze-güdiizaꞌ gahdzy paṉ, güdahgü tahp mily meññ, ¿blac dzombyu bydzeꞌ ni biaꞌn ptohp laꞌd?

Ra yâme leeme:

―Gahdzyu.

21 Were ra me leeyâme:

―¿Nehx ziaꞌ rieññ laꞌd la?

22 Byluxu bydzihñ yâme guiedzy-Betsaida, no güiyno meññ to mpyquie lo Jesúz, no mpyquie-rieꞌ ngaḻ lo me. No günab yâme cshob ña Jesúz chehsh me. 23 Were günahzy Jesúz ña ngaḻ, no ziyno me lee diby lad de leññ guiedzy. Bylux byxîbyshieñ me lo, no pshob ña me chehsh lo, no günabdiidz me lee bâḻ beeiy rwieꞌ me behch. 24 Guzlo ngaḻ gawieꞌ, no ra me Jesúz:

―Rwien meññ, rluu yâme beeiy yag-rgaꞌy, per ni gazeꞌ.

25 Gyzac pshob ña Jesúz chehsh lo mpyquie-rieꞌ, no bwieꞌ me mos, no biaḻ gahc me; ba gyreu rwieꞌ me zaꞌgndzi. 26 Byluxu pshahl Jesúz leeme zia me xiryuꞌ me, no ra leeme:

―Na di guibyguiatiꞌ leññ guiedzy, no di gahbyiꞌ mbehty ndruhty.

27 Byluxu güya Jesúz no xmeññ me zrieñ guiedzy-yaañ yahc ni nu lo ṟegióṉ ni le Cesarea de Filipo. Lóni za yâme lo ñahz naꞌ, günabdiidz me xmeññ me, ra me:

―¿Dxu we ne meññ naa?

28 Ra yâme leeme:

―Nu yâme ne Juaṉ ni pchôbnihs meññ‑e lii; zrieñ yâme ne Elíaz‑e lii ni güyuꞌ ba xtze; no zrieñ yâme ne dxuhch de lahd profet ni güyuꞌ ba xtze.

29 Ra Jesúz leeyâme:

―Naꞌz laꞌd, ¿dxu we ne laꞌd naa?

Ra Pedr leeme:

―Lii we nac Crist.

30 Per ra Jesúz leeyâme na di ga yâme ndruhty mbehty de leeme.

31 No guzlo galuu Jesúz xmeññ me ra me, leeme we Mpyquie-Pshahl Dioz Lee no rahp me de ni tedy me xtahl guîlné, no zegahc mînguhl yahc ni nac guxtisy, no xjefy yahc bahl no muextr ni ruuḻ yahc xleiy Moiséz, zruu yâme contr leeme. No zgaꞌdy yâme leeme, per lo tzonn dzé zbahñ me gyzac. 32 No nirieꞌ günii meu nxal lo diidz. Were güiyno Pedr leeme diby lad no guzlo ganindush me bia nacu rnii Jesúz ze. 33 Per Jesúz naꞌ biehqy me no bwieꞌ me xmeññ me, günindush me lo Pedr, ra me lee:

―¡Byruu diby lad de naa, bêndzab! Porni xguîlriehñiꞌ nehx rdeedyu tohzy no ni ne Dioz, mazyg rdeedyu tohzy no xguîlriehñ meññ.

34 No luxu pquee Jesúz riedz meññ gydibyno xmeññ me, no ra me leeyahc:

―Dxu racladzy gac dmeññaꞌ lee la, csaan gyre ni nahcsy ni nac, no gbooladzy xtâ xguîlmbahñ, no ctzoo ni ren. 35 Porni dxu gacladzy guislaa xguîlmbahñ leegahc la, zniꞌdyu; per dxu gniꞌdy xguîlmbahñ por naa no por dtiidzaꞌ la, wé zahp guîlmbahñ ni nehx zluhx. 36 ¿Bá we nquihñu par to meññ ñahc xchieñ me gyre ni nu lo guiedzylie, no luxu nniꞌdy me xguîlmbahñ me? 37 No zegahc, ¿bia beeiy ndee to meññ lehdy nislaa xguîlmbahñ me? 38 Porni dxu qytuno naa no dtiidzaꞌ ñaz-lo meññ-rieꞌ yahc ni nu ni naꞌ ni nehx rzobdiidz Dioz no rtzoo guîlquie, zegahc‑e naa, Mpyquie-Pshahl Dioz Lee, stuꞌn gynin dmeññaꞌ leeyâme dze-guiaḻaꞌ no gyre x‑ángel Dioz lo xguîlbyniꞌ dTadaꞌ.