GUITS NE BEY LO GRË ZHA
ISRAEL
1
1 Padzeela, ndal vuelt bnee Dios lo grë pxozgoldoo ne, pxeeḻ me grë zha ne biadteed xtiidz me lo zho, bnabey me grë zha co zhaase zhaase mod ne bnee zho. 2 Saṉgue niina, Xpëëdpaa me Jesús pxeeḻ me biadnee xtiidz me lo ne. Jesús meṉ ne bzaagrop me grëtaa ncuaaṉe no, ni meṉ ne bzo me gnabeya grësew. 3 Zeeṉe biaad Jesús lo guidzliu, me blu gaṉle zha ndzontaa Dios, zhapaa nac Dios, sac Dios nac me; me naaz grëtaa ncuaaṉe no, ni por xtiidz me laaw quiayuṉ dziin. Ni zeeṉe blozh bdiizh me xtoḻ ne, dzigo laa me biire zey gbaa bzob me cue Dios, zaatne rieguiaḻ me ne nac me meṉ ne rnabey.
4 Ga rlu gaṉle meṉ nroob nac Jesús, led lega lëd me Xpëëd Dios; meṉ nroob nac me lo grë anjl. 5 Ni tib lo anjl bneed Dios zigne bnee me lo Jesús, zeeṉe rëb me: “Xpëëd naa nac luu. Desde nadze laa zho guṉbey ne Xpëëd naa nac luu.” Stib vuelt zeeṉe bzeet me Jesús, rëb me: “Xpëëd naa nac me, naa nac Pxoz me.” 6 Ni zeeṉe biaad Jesús lo guidzliu; meṉ ne nac Xpëëdpaa me ga, rëb me: “Grëse xanjl naa, none yquiitsgzhib zho lo me.”
7 Zaatne raquiet anjl, rneew:
Tib mandadse nac zho lo Dios,
pale zigne rzhooṉ me sca rzhooṉ zho rie zho zaatne rnabey me zho;
me rnabey rlu zho zigne rlu bel.
8 Saṉgue zaatne raquiet Xpëëd me, rneew:
Dios, luu nac meṉ ne zobnabey,
ni gdziṉd dze ne griee luu;
zeeṉe ruṉ luu guieḻwxtis, zigne rieguiaḻa sca ruṉ luuw.
9 Ni palal rdziguiend luu grë guieḻntseeb,
niapse ncuaaṉe ndzinli, ncuaaṉe nonguieḻ, miṉ co rleynie luu;
miṉ co gane bzooblo Dios luu, nac luu meṉ ne rnabey,
luu nac meṉ ne mazdraa nroob guieḻbley bgaa.
10 Laa stib lugar rnee:
Meṉ rnabey nac luu, luu bzaa guidzliu, luu bzaa gbaa dib nacsew.
11 Nli zdziṉ dze nitlo grë ncuaaṉ co, grësew zlozha zigne riozh grë lar,
12 dzigo laa luu ctibëda, zig rdibëd grë lar, laa luu cuee stib miṉ cub; zigne ruṉ zha ne rtsëëxab.
Saṉgue luu, tibaque nac luu,
nacd luu meṉ ne nitlo, nacd luu meṉ ne lozh xquieḻmban.
13 Haxta rëb Dios lo me:
Cue naa nëz derech, nu bzob,
nieeda lozh gnaz naa zha ne rlëë lo luu, csaṉ naa zho ladznia luu.
Nligaa meṉ nroob nac me lo grë anjl, sac ni tib lo anjl bneescad Dios. 14 Lo me ga sca bnee Dios, sac goṉ grë anjl, mese nac zho ruṉ zho dziin lo Dios, rxeeḻ me zho rquianap zho zha ne nacle diidz laa lo grëtaa guieḻnë ne csiaab me.