2
1 Gacxe nagoṉ waa, gotsaa guieṉ ne gaṉle ib none dzioxco ne wen wen gwi ne zha nac Xtiidz Ndzon Jesús miṉe zidzion ne; zeeṉa gnitnëzd ne. 2 Sac goṉ, niicle zeeṉe xanjlse Dios biadteed xtiidz me lo miech padzeela, ni gocnona; grëse zha ne güeynaḻda, pteed Dios zho caxtigw ne rieguiaḻ zho. 3 ¿Pe leḻgue niina dzigo ne Jesúszhal biadnee zha laa ne lo doḻ? ¿Zha dieṉ tedlaa ne lo caxtigw, teḻne dzioxcod ne miṉe rnee me? Nli zha ne binlew zha co biadneew lo ne, per me nac meṉ ne psilo bneew; 4 niicle Diosgaa, blactaa grë ncuaaṉe quialu me, blactaa grë milagr ne ruṉ me, rlu me gaṉle ne nli diidzli biadseed zho ne; ni zhaagaa grë guieḻbiini ne ral zdoo me rdeed Espíritu Sant lo grë zha ne dib zdoo rnalo Jesús.
Jesús nac meṉ ne grieelo gdziṉnie miech lo Dios
5 Zig nac lo guidzliu cub ne ndioṉ ne naraa gneedz Dios, psaṉd me ne anjl gnabey low. 6 Lo Xtiidz me zhobnee gaṉle zeeṉe znu rëb David lo me:
¿Cho nac miech ne squitaa noxco luu zho?
Zig nac tib meṉ qui, ¿pe nacne squitaa ruṉnon luu me?
7 Tib blase dze psaṉwin luu me palal lo grë anjl; na laa luu psaṉglaa me stib, beeṉnon luu me, bzo luu me mele gnabey.
8 Grëtaa ncuaaṉe no, laa luu psaṉa ladznia me.
Nli gard gac grë miṉe bnee David ga, 9 per ndioṉle ne gaṉle zha psaṉwin Dios Jesús lo grë anjl tib bla dze, ni blozh ga zeeṉe laa me gut xcuent ne grëse ne, hor co laa Dios biire psaṉglaa me, laa Dios biire beeṉnon me. Ni nligaa noxco Dios miech, nquialadz me ne, gane bdeed me diidz gut Jesús psilaa me ne lo grëse xtoḻ ne.
10 Ible sca gocladz Dios, meṉ nroob ne bzaa grëtaa ncuaaṉe no, ible me bdeed diidz scataa grë guieḻnë ne goṉ Jesús; gane niina, Jesússe nac meṉ ne grieelo ner lo grëtaa miech guizhiu ne no ygab lo me, gdziṉnie Jesús zho lo guieḻndzon ne no me.
11 Grëse ne ne nac ne zha ne psaṉmbe Jesús ngab ne lo Dios, yele ne nac mëëd lo Dios. Gacxe waa, rley Jesús rnee me bets me nac ne; 12 no tib lugar lo Xtiidz Dios zaatne raquiet zeeṉe znu rëb me:
Zne naa lo grë bets naa, gacnaṉ zho gaṉle cho nac luu;
ni zeeṉe ycaalsa zho grë zho, tipse dziooḻnie no luu.
13 Stib vuelt rëb me:
Dios nac meṉ ne rnalo naa.
Ni rëb me:
Laa naa nu, quiayacnie naa grë zha ne nac xpëëd Dios.
14 Miṉ co gane, zigne znu nac ne miech, scaque Jesús goc me miech zigne nac ne. Sca bdeeda diidz gut me, ni zeeṉe gut me, ga psaṉwin me meṉdox, sac glo masaque ladznia ma no miech par gnitlo ma zho. 15 Sca psilaa me grë miech ne ngadoo lo guieḻgut; rrieequia ngadoo zho, sac tibaque nonie xtseb guieḻgut guic zho.
16 Ni wen wen ndioṉ ne gaṉle, zeeṉe biaad Jesús, biaate me par gacnie me grë anjl, sinque laa me biaad par gacnie me grë zha ne no ygab lo Dios. 17 Gacxe waa, goc me zig nac miech, zigne nac ne ne nac ne bets me; ni parne scagaa grieelo gac me pxoz nroob ne gnab lo Dios por ne. Pquia zdoo me ne, bloogon me me bdiizh me grëtaa xtoḻ ne; 18 nroob nac grë guieḻnë ne bded me, pquianaḻ meṉdox nquiil ma me niab me lo doḻ. Ni ne mezhal bded grë miṉ co, naṉpaa me zha rzac zha ne nodeda, gane ible zacnieṉ me zho.