1 Zee myun stub mandad, xaa ngezh doo lo na, xaa nzela naz yiba leen tub xkaw. Nu nzob tub bayiit yek xaa, lee garlo xaa nla xni mod mbizh, nu lee nii xaa nzhak kwenta bal ki. 2 Nu lee yaa xaa nzho tub lee yech chut, nu mzo xaa nii xaa lad li lo nistoo, nu lee nii xaa lad rebes mzo xaa lo yo. 3 Nu ngunii xaa dublegan, mod mbazhe tub mbezh; nu gorna ngunii xaa, ngoch gazh ngwzi. 4 Gorna ngulo ngoch gazh ngwzi, lee na nzhakee kwaan nguniiya; per mbin na tub bos yiba kwaan né lo na:

—Nayét lu kwaan nzhé gazh ngwzi ne, nu nixa nakeet luya.

5 Zee lee mandad, xaa mlu lo na, xaa nzo nii lo yizhyo nu leen nistoo, mlep yaa lad li naz yiba, 6 nu nzhé xaa:

—Wlipa snee né xaa kwaan tira mban, xaa kwaan mdexkwaa yiba nu yizhyo nu nistoo, nu rese kwaan nzho leena.

Nu né xaa:

—Nakint kwaz gu mas. 7 Nel gorna lee mandad gazh kwezh trompet cheen, gorzee gak rese wdizh xlaan cheen Dios, modxa nzhé Dios lo re xmos xaa, re xaa ngunii xaa lo yilo.

8 Lee bos kwaan mbin na, kwaan nze naz yiba, mbare ngunii lo na, nu néya lo na:

—Gwa nu bzen yech chut, kwaan nzho yaa mandad xaa nzo nii leen nistoo nu lo yizhyo.

9 Ngwa na lo mandad nu ngunaab na lo xaa zee zaa xaa yech chut lo na. Nu lee xaa mkeb lo na né:

—Bzena nu dawa. Roo lu gak naxa mod mzhin, per lee leen lextoo lu gaka nala.

10 Mzena na yech chut yaa mandad nu ndaw naya; nu roo na ngok naxa mod mzhin, per gorna ngulo ndaw naya, mle nalaya lextoo na. 11 Zee né xaa lo na:

—Nkin zaa lu kwent stub welt kwaan né Dios lo lu lo re myet, nu lo re yezh, nu lo re xaa nzhedizh rese dizhze, nu lo re rey.