11
Rop xaa zaa kwent kwaan nzhé Dios lo xaa
1 Zee mzaa xaa tub lee nit lo na, kwaan nzhak kwenta tub metr kwaan nchiix xaa, nu né xaa lo na:
—Gwa nu bchiix yidoo cheen Dios nu mdo cheena, nu blab lak xaa nzholl lo Dios baa. 2 Per nachiixt lu lach jwer Xkyidoo Dios, nel re xaa nanakt xaa Israel zo baa tub choobchop mbee. 3 Nu lee na xaal chop xaa zaa kwent kwaan yé na lo xaa, nu zaa xaa kwent tub mil chop gayoo chon gal mbizh, nu gak xaa ler nadox kwaan nagaas.
4 Rop xaa ne nak rop yag olib nu rop bruj kwaan nzaa xni lo Xaa Nabeyy dubse yizhyo. 5 Nu chelee tub xaa nzhekla seweey xaa xaa, lee rop xaa ne koo ki roo, zee zek xaa re xaa nayii ne xaa; nu snee yet loka xaa nzhekla seweey xaa. 6 Rop xaa ne nzho mod saaw yiba zee nalatra yey dubse mbizh kwaan zaa xaa kwent kwaan yé Dios lo xaa; nu noka nzho mod le xaa gak nis ren nu chezi xaa re myet yizhyo kwaan rese yalzi, gorna nzhekla xaa.
7 Per gorna ngulo mzaa xaa kwent, lee tub ma nakap roo leen yerdoo nu dil kwaan rop xaa ne, nu zle ma gan lo rop xaa ne nu gut ma xaa ne. 8 Lee kwerp cheen rop xaa ne lake leen naz xsaww yezh, leeka yezh paro mbit xaa Xaa Nabeyy be. Lee yezh ne nii xaa nabix nak Sodoma nu Egipto. 9 Nu tub chon mbizh yirol, lee rese myet yizhyo, xaa rese dii, nu xaa nzhedizh rese dizhze, nu xaa rese yezh wii lo kwerp cheen rop xaa, nu nazaat re xaa diizh yibyo xaa. 10 Nu lee rese xaa yizhyo nyakla nel ngut rop xaa mzaa kwent kwaan nzhé Dios lo lee xaa, xaa tant mted bid lo xaa. Nu zelazh rese xaa kwaan lo wechxinn xaa.
11 Per gorna ngulo mded chon mbizh yirol, Dios seban rop xaa ne, nu yixche xaa stub welt, nu rese xaa lach lo xaa zheb doo xaa. 12 Zee lee rop xaa ne gon tub bos yiba kwaan yé lo xaa:
—¡Guxoob gu nee!
Nu yixoob xaa naz yiba leen tub xkaw nu lee re xaa nayii ne xaa wii lo xaa. 13 Nu leeka gorzee gun tub xog kwaan nye doo, nu kwent cheen xog lux tub part lo chii part cheen yezh nu yet gazh mil xaa. Lee re xaa mbanaka, kwaan yalnacheb gool xaa lo Dios nu yé xaa:
—Lu nak Xaa Nabeyy, xaa nzob naz yiba.
14 Ngulola mded tub yalzi, per seesa nzho jwalt stuba.
Trompet gazh
15 Lee gazh mandad mkwezh trompet cheen, nu mbin na zyen bos nye doo naz yiba, nu nzhé reya:
Lee yalnabeyy cheen yizhyo
nal naka cheen Dios, Xaa Nabeyy be
nu cheen Jesucrist Xaa Mxaal xaa lo yizhyo,
nu tira nabeyy xaa.
16 Lee re galbtap xaa gol, xaa nzob delant lo Dios, mkich yek axta lo yo, nu mbill xaa lo Dios, 17 nu nzhé xaa:
Nzaa nu dixkix lo lu Xaa Nabeyy,
lu nak Dios, xaa nzho mod le rese kwaan,
lu nak xaa ngok axta yilo,
nu mzelo lu nabeyy lu yizhyo kwaan gro yalngezh cheen lu.
18 Lee re yezh nayii doo ne lu;
per nal mzhinla mbizh cheen yalnayii cheen lu,
gorna naab lu kwent lo re xaa ngut.
Nu zaa lu lo re xmos lu, xaa mzaa kwent kwaan nzhé lu lo lee xaa yilo, kwaan mle xaa gan,
nu noka zaa lu lo re xaa nzheb ne lu, xaa nambey nak, kwaan mle xaa gan,
lo re xaa non nu lo re xaa nanont.
Nu lux lu re xaa nlux yizhyo.
19 Zee mxal pwert cheen yidoo cheen Dios, kwaan nzob naz yiba, nu lee leen yidoo myun kaj cheen wdizh kwaan mlaa Dios. Nu zee ngoch ngwzi, nu mbin na tub bi gro doo, nu mgun tub xog nu mla doo yuuke.