22
Yuu nu yag cheen yalnaban
Nu mlu xaa tub yuu cheen yalnaban lo na, kwaan nla xni mod bidr, kwaan nlen paro nzob Dios nu Mbakxiil cheen Dios nabeyy, kwaan nded xsaww naz leen yezh. Nu kad lad yuu nzo tub yag cheen yalnaban, kwaan nzaa xle kad mbee chiibchop welt tub liin; nu lee lag cheena nle xchiin sekwen rese xaa yizhyo, xaa ne nzak. Nu baa nayotra nik tub kwaan nawent; nu lee pa nabeyy Dios nu Mbakxiil cheen Dios zob leen yezh, nu lee re xmos xaa gool lo xaa; nu yun xaa lo re xaa nu le xaa kee lechuzh re xaa. Nu baa nayotra yaal nu nakintra re xaa xni bruj nixa xni cheen mbizh, nel Dios, Xaa Nabeyy kee xni lo re xaa; nu lee re xaa nabeyy tira.
Merla yiid Jesucrist
Nu lee mandad né lo na:
—Lee re wdizh ne nali nak nu wli; nu Dios, Xaa Nabeyy, mxaal mandad cheen xaa lu lo re xmos xaa kwaan merla gak, modxa mlu Dios kwaan gak lo re xaa mzaa kwent kwaan nzhé Dios lo lee xaa yilo.
Jesús né:
—¡Merla yal na! ¡Wen xaa kwaan gon re wdizh kwaan nkee lo yech ne, kwaan nzaa kwent cho kwaan gak!
Na nak Juan, nu mbin na nu ngune na re kwaane. Nu gorna mbin na nu ngune na lo re kwaane, mkichyek na axta lo yo zee gol na lo mandad, xaa mlu re kwaane lo na. Per lee xaa né lo na:
—Nalet lu sbaa, nel na nak nebse tub xmos Dios kwenta lu, nu mod re wech lu, xaa ngunii Dios lo, nu mod rese xaa kwaan nzhon re kwaan nkee lo yech ne. Nebse lo Dios nzhaal gool lu.
10 Nu noka né xaa lo na:
—Nakaxlaant lu re kwaan nzhé yech ne gak, nel mbizh kwaan gak re kwaane mzhin gaxla. 11 Lee re xaa nle kwaan nawent, kwaan nawent lera xaaya, nu lee re xaa nkano xgab beed, xgab beed kanora xaa; per lee xaa nle kwaan nali kwaan nali lera xaa, nu lee xaa nambey nak seetaka nambey gak xaa.
12 Zee né Jesús lo na:
—¡Wii, merla yal na! Nu na za lo re xaa kwaan mle re xaa gan, lo re kwaan mle xaa. 13 Na nak xaa yilo nu xaa gwluzh, xaa yilotlaka nu xaa gwluzhtlaka, xaa mzelo rese kwaan nu xaa lux rese kwaan.
14 ’Wen re xaa kwaan nzet xab, zee nzho mod gaw xaa lo yag cheen yalnaban nu nzho mod rep xaa roo pwert yezh ne. 15 Per naz jwer lake re xaa nak kwenta mbak: re wezh, re xaa nchaal stub naz samyet, re xaa nzhut samyet, re xaa nzholl lo maj, nu rese xaa nkade.
16 ’Na nak Jesús, nu mxaal na mandad cheen na, zee zaa xaa kwent re kwaane lo re xaa na. Lee na nak lox cheen David nu dii cheen xaa nu lee na nak Mbal Ndok, ma garziil.
17 Nu lee Mbi Naban nu sa Mbakxiil cheen Dios né:
—Te.
Nu lee xaa nkenzha kwaane, guzh:
—Te.
Nu lee xaa nzhek lextoo nu nzhekla go nis, nii na lo xaa:
—Te, zee sbaasa go lu nis kwaan nzaa yalnaban.
18 Na nii lo rese xaa kwaan nkenzha re kwaan nkee ne, kwaan nzaa kwent re kwaan gak: Chelee tub xaa zhib tub wdizh lo re wdizh ne, Dios segaazh re yalzi kwaan nkee lo yech ne tich xaa. 19 Nu chelee tub xaa kiib tub wdizh kwaan nkee lo yech ne, kwaan nzaa kwent re kwaan gak, Dios kiib diizh zee nagawt xaa lo yag cheen yalnaban nu kiib xaa diizh zee nadedt xaa yezh kub, kwaan nzaa yech ne kwent.
20 Lee xaa mzaa kwent lo na re kwaane, né lo na:
—Merla yal na.
¡Sbaa gaka! ¡Te Jesús, Xaa Nabeyy!
21 Nzhekla na lee Jesús Xaa Nabeyy, luu yalnkela cheen xaa lo rese be, xaa nali nzo lo xaa.
Sbaa gaka.