1 Leꞌa ta gáp naꞌ ndee ta ugeaka: Tal ton dub xa nlad yansu be xmen Cristo, leꞌa ta nlad xa wa ta wenka. 2 Parea leꞌa dub xa nchansu be xmen Cristo nsabndoꞌ utsin gak gast naꞌan ton gab leꞌa xa ugap nak. No dubtsa xagots nsabndoꞌ gap xa, no wen gunbeꞌe xa, no list gak xa, no utsin gun xa ndontsa gap be men mod ndoꞌ xa, no utsin gak xa ndoꞌ itea be men nchaꞌa ta lid xa, no isuꞌu xa uluꞌu xa be men. 3 No lá gun xa gealgu, no naꞌanpa ukwaꞌan xa uyo, no naꞌanpa ukwiꞌinno xa be men natsa gun xa gan med. Ndi nsabndoꞌ utsin gak xa, no bchaꞌan gak xa, no lá ukwaꞌan xa sian med. 4 No nsabndoꞌ utsin ulaꞌach xa bexa ta lid xa. Leꞌa be xin xa wa nsabndoꞌ uxobgek ndoꞌ xa, no gap be xin xa mod ndoꞌ xa. 5 Leꞌa tal ton lá isuꞌu ulaꞌach ta lid na, leꞌa xa liga lá isuꞌu yansu gezh ten Dios. 6 No leꞌa dub xa tiꞌi mbingea ladna Cristo lá nsabndoꞌ gak xa yansu be xmen Cristo, ndontsa lá izhinna xa, cha utsaksi Dios xa lak utsaksi Dios maxuꞌu. 7 No nsabndoꞌ utsin gak xa, ndontsa gap be men mod ndoꞌ xa, bexa naꞌanpa nak xmen Cristo. Weꞌe leꞌa xa wa naꞌanpa ido ladna, no lá gailaꞌ xa ndoꞌ yaꞌa maxuꞌu.

8 No liga leꞌa bexa ndakno be xmen Cristo nsabndoꞌ gak dub xa gap be men mod ndoꞌ na. Lá nsabndoꞌ gun xa gealkwiꞌin. No naꞌanpa gun bexa gealgu. No naꞌanpa ukwiꞌinno bexa be men ndontsa li gun xa gan med. 9 No uxobgek bexa ndoꞌ diꞌizh wen ten Dios idub ncho ladna bexa. 10 Leꞌa bexa gakno wa nsabndoꞌ ned gak preb naga ndun xa itea be ta ndee. Weꞌeta gak xa tiꞌin wa, tal xa utsinka ndun. 11 No liga leꞌa be xagots nsabndoꞌ utsin gak. No naꞌanpa gudiꞌizh bexa be cuent gix, no wen gunbeꞌe bexa, no utsin gun xa itea be taꞌa ndontsa igeꞌ ladna be men xa. 12 Leꞌa be xabgiꞌi gakno wa nsabndoꞌ gap dubtsa xagots. No utsin ulaꞌach bexa be xin xa no iteata bexa ta lid xa. 13 Leꞌa bexa na wen ndun tiꞌin ndakno be xmen Cristo wa, liga ndun gan ndap be men mod ndoꞌ na, no naꞌanpa izheb bexa gudiꞌizh bexa ta ngeꞌ ladna bexa Cristo Jesús.

14 Ndanbeꞌe naꞌ leꞌa naꞌ sken gal inaꞌ lu. Leꞌa naꞌ nkeꞌa be ta ndee ndoꞌ lu, 15 ndontsa tal naꞌ naꞌanpa cha gal, yá uniꞌí lu xteꞌe nsabndoꞌ gak lu no itea bexa nak xmen Dios, leꞌa beuna nak xmen Dios nban, no lá ulaꞌa beuna initndoꞌ gealngea ten Cristo. 16 Ta ugeaka leꞌa ta ugaꞌach mluꞌu Dios ndoꞌ beuna dub ta uzheꞌeb siꞌil nak: