1 Ndon ned ta ndee gáp naꞌ ndoꞌ lu: unab ta nkiꞌin lu ndoꞌ Dios, no bidiꞌizhno Dios, no unab ndoꞌ Dios gakno Dios itea be men, no bsaꞌa xno ndoꞌ Dios. 2 No unab ndoꞌ Dios gakno Dios bexa naktiꞌin no itea bexa nibeꞌe. Weꞌe gust yoo beuna no wen yoo beuna, no idub tiemp uxobgek beuna ndoꞌ Dios no utsin gak beuna ndoꞌ be men. 3 Leꞌa Dios xa na ngoꞌo beuna ndoꞌ be ke ten beuna isak ladna tal li gudiꞌizhno beuna xa. 4 Leꞌa xa nlad itea be men itoꞌobe ndoꞌ be ke ten na, cha igondoꞌ bexa gealngea ten Dios. 5 Leꞌa Dios dubkama ncho, no ncho dubtsa xa sun gan wen yaꞌan beuna ndoꞌ Dios, leꞌa ta wa Jesucristo, 6 xa na msaꞌa leꞌaka leꞌa xa ngut sakndoꞌ itea be men, gor na nsabndoꞌka li gun xa wa. 7 Ta weꞌe leꞌa Dios msoꞌ naꞌ gudiꞌizh naꞌ be ta ndee, no mtuꞌub xa naꞌ gauluu naꞌ‑yá ndoꞌ bexa naꞌanpa xa Israel ndontsa gungea ladna bexa gealngea ndee. Leꞌa Cristo nsobwiꞌi leꞌa ta ndáp naꞌ ndee ta ugeaka, naꞌanpa gealkwiꞌin‑a.

8 Leꞌa naꞌ nlad leꞌa guniꞌi pa nyakjunt be xmen Jesús, gudiꞌizhno be xabgiꞌi Dios no ixits bexa yaꞌa bexa ndoꞌ Dios, no umbiꞌi gak ladoꞌo bexa, no naꞌanpa igiꞌi bexa, no naꞌanpa kuyo bexa. 9 No nladga naꞌ gak be xagots be xab na dub mod na naꞌanpa ugap iwiꞌi be xabgiꞌi ndoꞌ xa, no naꞌanpa izhinnona bexa be lad ndap bexa. No naꞌanpa uzheꞌeb usaxkwaꞌa bexa gek bexa. No naꞌanpa uzheꞌeb guntiꞌin bexa be ta oro no perla no be lad ndon leꞌa uyap. 10 Ndi gun be xagots sbeꞌen be ta wen, lak nsabndoꞌ gun be xagots ndankea Dios. 11 Leꞌa be xagots wa nsabndoꞌ xetsa ulaꞌach ta ndab xa nluꞌu diꞌizh ten Dios, ni naꞌan xteꞌe gab bexa. 12 Leꞌa naꞌ ndáp leꞌa be xagots lá nsabndoꞌ uluꞌu, no naꞌanpa ndi leꞌa be xagots inibeꞌe be xabgiꞌi sa ndaꞌutsid bexa diꞌizh ten Dios. Leꞌa be xagots wa nsabndoꞌ xetsa kwe, 13 geal leꞌa Dios ned Adán mbindeꞌe, weꞌeta mbindeꞌe xa Eva. 14 Leꞌa maxuꞌu naꞌanpa ukwiꞌinno Adán, leꞌa xa ndi Eva mkwiꞌinno, cha mbin Eva dub ta lid leꞌa nak ndoꞌ Dios. 15 Parea leꞌa ta na ndap be xagots meꞌed, leꞌa Dios sgoꞌo bexa ndoꞌ be ke ten bexa tal leꞌa bexa lá ulaꞌa nes ten Dios, no ikweaꞌ ladna bexa be ltsaꞌa bexa, no umbiꞌi gak ladoꞌo bexa ndoꞌ Dios.