1 Bega nak beuna xmen Cristo, leꞌa stub ta gáp naꞌ ndoꞌ bega. Unab bega ndoꞌ Dios gakno xa besa, ndontsa uxax iteꞌachso diꞌizh ten Jesús no gungea ladna be men‑a lak mbingea ladna bego‑yá. 2 No unab bega ndoꞌ Dios lá ulaꞌa xa xela gunno be men ugap besa, leꞌa ncho kwaꞌad bexa naꞌanpa ndangea ladna Jesús. 3 Ná leꞌa Jesús ndunka ta ndab xa: Usaꞌa xa juers ndoꞌ bega no ulaꞌach xa bega ndoꞌ be ta ugap. 4 Leꞌa ta na nak bega xmen Cristo, ta weꞌe uniꞌíka besa leꞌa bega ndeyunka be ta unibeꞌe besa, no gunkata bega be ta wa. 5 Naꞌab naꞌ ndoꞌ Dios gakno xa bega ikweaꞌ ladna bega be men lak nkweaꞌ ladna Dios bega, no uxik bega ndoꞌ be gealkweaꞌ lak mxik Jesús ndoꞌ be gealkweaꞌ.

6 Bego nak beuna xmen Cristo, inibeꞌe besa ta ndee ndoꞌ bega lak nlad Jesucristo gun besa: lá uchealtsaꞌata bega bexa ndangea ladna Jesús tal leꞌa bexa lá nlad gun tiꞌin, no lá kaꞌab bexa gun bexa lak mluu besa bega. 7 Leꞌa bega uniꞌíka xteꞌe mbin besa tiꞌin lat bega, leꞌa bega noga li nsabndoꞌ gun. 8 Leꞌa besa utixka be ta msaꞌa bega udaw besa wa. Leꞌa besa juert mbin tiꞌin teꞌal tezhea, ndontsa naꞌanpa bega kix ta udaw besa. 9 Leꞌa besa yoꞌo gan ngab ndoꞌ bega usaꞌa bega ta wa, parea leꞌa besa ndi mbin tiꞌin ndontsa uniꞌí bega xteꞌe nsabndoꞌ gun bega. 10 Leꞌa zha na ndencho besa lat bega, leꞌa besa ndab ndoꞌ bega leꞌa tal ton lá nlad gun tiꞌin, leꞌa xa wa liga lá gaw.

11 Ná nat leꞌa besa ndoꞌón leꞌa ncho bega ndesea ni lá ndun tiꞌin, ndi sbeꞌen ndeseawiꞌitsa bega xtiꞌin ndun ltsaꞌa bega. 12 Leꞌa Jesucristo Xwan beuna nlad gáp naꞌ ndoꞌ bego na li lá nlad gun tiꞌin wa: utsintsa bin bega tiꞌin ndontsa gap bega ta gaw bega.

13 Bega nak beuna xmen Cristo, lá izhanna bega gun bega be ta wen. 14 Tal ton lá nxobgek ndoꞌ be ta nkeꞌa besa ndoꞌ git ndee, lá uchealtsaꞌata bega xa wa, ndontsa ido ladna xa li ndun wa. 15 Parea naꞌanpa gunno bega xa cuent dub xa nyono bega, ndi utsintsa btenxeꞌa bega xa, geal leꞌa xa no nak xmen Cristo.

16 Nat naꞌab naꞌ ndoꞌ Dios xa ndun wen nyoꞌo ladna beuna wa, gun xa wenta yoo ladna bega idub tiemp ndoꞌ itea be taꞌa ntid bega, no gakno xa iteanak bega.

17 Leꞌa naꞌ Pabl yaꞌa naꞌ nkeꞌa naꞌ letr ndee ndoꞌ git, ta nidiꞌizh naꞌ ndoꞌ bega. Lndeꞌe nkeꞌa naꞌ‑yá ndoꞌ itea be git ntuꞌub naꞌ. 18 Naꞌab naꞌ ndoꞌ Jesucristo Xwan beuna mas uzheꞌeb utsin gunno xa iteanak bega. Lika nak‑a.