Git ukea ndoꞌ be xmen Jesucristo, be men Hebreo
Leꞌa git ndee mkeꞌa dub xa ndoꞌ be xmen Cristo bexa judio uyoꞌo tiemp polta wa. Ndab‑a leꞌa bexa judio bexa nak xmen Cristo yá lá nsabndoꞌta usaꞌa xnab ndontsa yuꞌu be ke ten bexa, leꞌa be xnab ten man wa lá yoo gan utsuꞌu be ke ten be men. No sian biaj ndab xa ndoꞌ bexa naꞌanpa gun ngud bexa no naꞌanpa ichaꞌab bexa, ndontsa yá lá yachta bexa ndoꞌ be ta ugap mbin bexa polta. Leꞌa Hebreos capítulo 11 nseꞌat kwaꞌad bexa uzheꞌeb mgeꞌ ladna Dios, ta mbin wen myaꞌan bexa ndoꞌ Dios.
1
Dios mbintiꞌin Xin na gudiꞌizh ndoꞌ be men
1 Leꞌa polta leꞌa Dios sian biaj nsea sian mod mbidiꞌizh ndoꞌ be usan gox ten beuna, mbintiꞌin xa be profet gudiꞌizh sakndoꞌ xa. 2 Parea nat leꞌa be wizh lult ndee, leꞌa Dios mbintiꞌin leꞌaka Xin na mbidiꞌizh xa ndoꞌ beuna. Leꞌa Dios leꞌa mti xa wa mbindeꞌe xa gibeꞌa no gizhliyo, no msoꞌ Dios xa nak xa Xwan itea be taꞌa. 3 Leꞌa Xin Dios nluu xteꞌe uzheꞌeb siꞌil nak Dios, no nak xa lakkata nak Dios Xus xa. Leꞌa juers ten ta ndab xa, leꞌa xa ndun leꞌa gizhliyo no gibeꞌa ndaktiꞌin. Leꞌa tsoꞌo na mbin xa ta mtsambiꞌi xa beuna ndoꞌ be ke ten beuna, cha mkea xa gibeꞌa, usob xa wats lad gaꞌal sa nibeꞌe Dios.
Xin Dios uzhebpa mas nsak ndoꞌ be angel
4 Leꞌa nat leꞌa Xin Dios uzhebpa mas nsak ndoꞌ be angel, lak leaꞌ xa uzhebpa mas nsak ndoꞌ lak nsaleaꞌ be angel. 5 Leꞌa Dios naꞌanpa ngab ndoꞌ ni dub angel lak ndab xa ndoꞌ Xin xa, ndab xa:
Leꞌa lu nak Xiꞌín naꞌ, nat leꞌa naꞌ nak Xus lu.
No ndab Dios:
Leꞌa naꞌ gak Xus xa, leꞌa xa gak Xiꞌín naꞌ.
6 Leꞌa gor na mtuꞌub Dios Xin na ndoꞌ gizhliyo, leꞌa xa ndab:
Leꞌa itea be angel ten naꞌ yankea xa.
7 Leꞌa cuent ten be angel leꞌa diꞌizh ten Dios ndab:
Leꞌa Dios ndun leꞌa be angel ten xa nyak cuent mbi,
leꞌa bexa ndun tiꞌin ndoꞌ xa wa nyak cuent bealꞌ giꞌ.
8 Ná leꞌa cuent ten Xin Dios ndab Dios:
Leꞌa lu Dios nibeꞌe idub tiemp.
Lu ndon leꞌa utsin nibeꞌe ndoꞌ be men.
9 Leꞌa lu nsak ladna be ta wen ndun be men,
no nxee ladna lu ndoꞌ ta ugap ndun bexa.
Ta weꞌe leꞌa naꞌ Dios ten lu mti naꞌ lu inibeꞌe lu,
ndontsa mas uzhebpa iten ladna lu ndoꞌ be ltsaꞌa lu.
10 No ndab Diꞌizh ten Dios:
Leꞌa go xa nibeꞌe, zha ndon ned mtexan ga gizhliyo nsea gibeꞌa.
11 Leꞌa gal dub wizh leꞌa be ta wa initndoꞌ,
ná leꞌa go idub tiemp nchoka.
Leꞌa be ta wa gak gox lak ndak gox dub lad.
12 Cha uduꞌud ga‑yá cuent dub bleꞌa lad,
cha izheꞌa‑yá lak ncheꞌa dub men xab na.
Ná leꞌa go dubtsa nak,
no idub tiemp ncho ga.
13 Leꞌa Dios naꞌanpa ngab ndoꞌ ni dub angel lak ndab xa ndoꞌ Xin xa:
Usob wats naꞌ lad gaꞌal ndee, gast gal gor ute naꞌ
bexa ndaklono lu xan ndats lu, inibeꞌe lu bexa.
14 Leꞌa itea be angel naktsa espíritu ndun tiꞌin ndoꞌ Dios, ntuꞌub Dios bexa gakno xa be men, bexa gap gealnaban ndoꞌ Dios.