Git mtuꞌub Pabl ndoꞌ Filemón
Leꞌa Pabl mkeꞌa git ndee ndoꞌ Filemón, dub xa no nak xmen Cristo ncho gezh Colosas. Leꞌa xa wa uzheꞌeb dub xa rik. Leꞌa dub xa nsaleaꞌ Onésimo dub esclavo ten Filemón mxoꞌon xa ndoꞌ xa, cha tsoꞌo wa mgondoꞌ xa diꞌizh ten Cristo, ta mbidiꞌizh Pabl ndoꞌ xa zha na nkeanyaw xa Roma. Leꞌa git ndee mtuꞌub Pabl goꞌo Onésimo ndoꞌ Filemón gezh Colosas. Unab Pabl ndoꞌ Filemón gungeꞌ ladna xa ndoꞌ Onésimo, utsin gunno xa xa ta na no xa nak xmen Cristo. No ndab Pabl leꞌa tal ncho xtaꞌan mbinno Onésimo Filemón natal xtaꞌan nsaꞌab xa leꞌa Pabl skixka ta wa. Ndab Pabl leꞌa bexa nak xmen Cristo dubtsa nak, guniꞌi tal xa xa rik natal naꞌan.
1
Pabl nidiꞌizh ndoꞌ Filemón
1 Leꞌa naꞌ ndee Pabl xa nkea litgiꞌib ke na ndun naꞌ tiꞌin ten Jesucristo. Leꞌa naꞌ no Timoteo xa nak cuent dub wit naꞌ, nkeꞌa besa git ndee ndoꞌ lu Filemón, lu no ndun tiꞌin ten Cristo. 2 No nidiꞌizh besa ndoꞌ Apia xa nak cuent bsan beuna, no ndoꞌ Arquipo xa no ndakno beuna ndun beuna tiꞌin ten Dios, no ndoꞌ itea bexa nzhealbe ta lid lu baꞌ.
3 Naꞌab naꞌ ndoꞌ Dios Xus beuna no ndoꞌ Jesucristo Xwan beuna utsin gak bexa ndoꞌ bega, no gun bexa wen yoo ladna bega.
Filemón nkweaꞌ ladna be ltsaꞌa na
4 Leꞌa gor na ndadiꞌizhno naꞌ Dios, naꞌab naꞌ ndoꞌ Dios gakno Dios lu, no nsa naꞌ xno ndoꞌ Dios, 5 geal leꞌa naꞌ ndón xteꞌe ndankea lu Jesús Xwan beuna, no ngeꞌ ladna lu xa, no nkweaꞌ ladna lu itea bexa nak xmen Jesús. 6 Naꞌab naꞌ ndoꞌ Dios leꞌa ta na dubtsa ngeꞌ ladna beuna Cristo, ta weꞌe leꞌa lu mas igondoꞌ ta wen nsaꞌa Dios ndoꞌ beuna nak xmen Cristo. 7 Uzhebpa nten ladna besa no mas nsen besa juers, gor ndoꞌón besa xteꞌe nkweaꞌ ladna lu be xmen Cristo, leꞌa lu ndun mas utsin nyoꞌo ladna bexa.
Pabl ndab ndoꞌ Filemón utsin gak ndoꞌ Onésimo
8 Leꞌa ta na nak beuna xmen Cristo, ta weꞌe syoꞌo gan inibeꞌe naꞌ ndoꞌ lu ta nsabndoꞌ gun lu. 9 Ná leꞌa naꞌ ndi naꞌab ndoꞌ lu, geal leꞌa naꞌ uní leꞌa lu nkweaꞌ ladna naꞌ. Leꞌa naꞌ Pabl yá xa gox naꞌ, no nkea naꞌ litgiꞌib ke na ndun naꞌ tiꞌin ten Jesucristo. 10 Nat naꞌab naꞌ ndoꞌ lu utsin gak lu ndoꞌ Onésimo, leꞌa xa nak cuent dub xiꞌín naꞌ, ta na mbingea ladna xa Jesús len litgiꞌib ndee.
11 Polta leꞌa Onésimo naꞌanpa utsin ngun tiꞌin ten lu. Ná nat leꞌa xa suꞌu gun tiꞌin ndoꞌ lu, lak nsuꞌu xa ndakno xa naꞌ. 12 Leꞌa nat leꞌa naꞌ utuꞌubgal xa ndoꞌ lu. Cha utsin gunno lu xa gor ilanseaꞌ xa, lakta utsin ndanno lu naꞌ.
13 Leꞌa naꞌ nlad yanyoꞌo Onésimo wats naꞌ sa ndee, ndontsa gakno xa naꞌ sakndoꞌ lu, ndalen nkea naꞌ litgiꞌib ndee ke na ndadiꞌizh naꞌ diꞌizh ten Cristo. 14 Ná leꞌa naꞌ naꞌanpa gáp yanyoꞌo xa sa ndee tal leꞌa lu lá nlad. Leꞌa naꞌ nlad gun lu ta naꞌab naꞌ, parea naꞌanpa ta na juerska li gun lu, ndi ta na nlad lu li gun lu. 15 Natal ga ta weꞌe mlaꞌa Onésimo lu dub ndeꞌeptsa, natsa bi leꞌa itanchaꞌ xa ndoꞌ lu idub tiemp. 16 Nat leꞌa Onésimo naꞌanpa yak xa nduntsa tiꞌin ndoꞌ lu. Nat leꞌa xa no nak dub xmen Dios, cuent dub wit beuna xa. Leꞌa naꞌ uzheꞌeb nkweaꞌ ladna xa, ná leꞌa lu nsabndoꞌ mas ikweaꞌ ladna xa, leꞌa xa no nak xmen Jesús, no nak xa dub xa ndun tiꞌin ndoꞌ lu.
17 Tal lu nsak leꞌa naꞌ no nak ltsaꞌa lu, utsin binno Onésimo lakta utsin nak lu ndoꞌ naꞌ. 18 Ná tal xa xtaꞌan mbinno lu polta wa natal xa nsaꞌab ndoꞌ lu, leꞌa naꞌ skixka ta wa. 19 Leꞌa naꞌ ndee Pabl yaꞌa naꞌ nkeꞌa naꞌ letr ndee ndoꞌ git: leꞌa naꞌ skixka be ta nsaꞌab Onésimo ndoꞌ lu, maska uniꞌí lu leꞌa lu no nsaꞌab ndoꞌ naꞌ.
20 Leꞌa ta na dubtsa nak beuna xmen Cristo, naꞌab naꞌ ndoꞌ lu gun lu ta wa, ndontsa wen yoꞌo lad naꞌ.
21 Nkeꞌa naꞌ be ta ndee ndoꞌ lu, leꞌa naꞌ uní leꞌa lu sunka ta naꞌab naꞌ wa, no gast mas sian be ta wen gun lu. 22 Bsaxkwaꞌa dub sa yoꞌo naꞌ, leꞌa naꞌ nsak leꞌa Dios ulaꞌa gal inaꞌ naꞌ bega lak nab bega ndoꞌ Dios.
Be ta lult mkeꞌa Pabl ndoꞌ Filemón
23 Leꞌa Epafras nidiꞌizh ndoꞌ lu, leꞌa xa nkeano naꞌ litgiꞌib ndee ke na ndun xa tiꞌin ten Cristo Jesús. 24 Nsea Marc no Aristarco no Demas no Luc bexa ndakno naꞌ ndun besa tiꞌin, leꞌa bexa wa no nidiꞌizh ndoꞌ lu.
25 Naꞌab naꞌ ndoꞌ Jesucristo Xwan beuna mas uzheꞌeb utsin gunno xa bega. Lika gak‑a.