8
Be xagots na ngokno Jesús
Tsoꞌo wa leꞌa Jesús ukeseano isatibtop be xmen na sian be gezh ubiꞌi no be gezh byux. Ukesea uluu Jesús be men, ndadiꞌizh xa diꞌizh wen ten Dios ná xteꞌe gak bexa dub xa leꞌa Dios nibeꞌe. No stapla be xagots ukeseano bexa, bexa myunyakna Jesús no ulantuꞌub xa be mbi bxin len ladoꞌo bexa. Leꞌa dub xa wa Marí xa gezh Magdala, xa na utoꞌo dub gaꞌad be mbi bxin len ladoꞌo na. Leꞌa stub xa wa Juana, xagots ten Chuza, xa na nchansu be tiꞌin ten Herodes. Leꞌa stub xa wa Susan. Leꞌa bexa wa, no kwaꞌadta be xagots msaꞌa be taꞌa nkiꞌin Jesús no be xmen xa.
Dub cuent ten xa ndas bid ten trig
(Mt. 13:1-17; Mr. 4:1-12)
Leꞌa kwaꞌad be men utoꞌo isandoꞌ be gezh ulen wats Jesús, cha msaktabeꞌe Jesús dub taꞌa mluu xa, ndab xa:
—Leꞌa dub xa ndun tiꞌin geꞌe utoꞌo nchaꞌutob xa bid ten trig ndoꞌ yo. Leꞌa gor na mteꞌach xa‑yá, ncho‑yá ulate toꞌo nes. Leꞌa be ná wa cha usoꞌ be men tsoꞌo na, cha ulen be migin cha udaw‑a. No ncho‑yá ulate ndoꞌ yo geꞌ. Leꞌa gor na ulen ta wa, cha ubid‑a, geal leꞌa sa wa naꞌanpa kwazh. No ncho‑yá ulate lat be gix nsoꞌ gich. Leꞌa gor na ulen trig nsea gix wa, leꞌa gix wa cha ulo xleaꞌ‑yá. No ncho‑yá ulate sa utaꞌa yo, cha msaꞌa‑yá dub gayoꞌoga bid.
Weꞌe ugeꞌ ndab Jesús:
—¡Bego na ndap nchaꞌ na, blaꞌach bego ta ndáp naꞌ ndee!
Leꞌa be xmen Jesús cha unabdiꞌizh ndoꞌ xa, ndab bexa:
—¿Xtaꞌan gab ta msaktabeꞌe go wa?
10 Leꞌa Jesús cha ukaꞌab ndab ndoꞌ bexa wa:
—Leꞌa Dios nsaꞌa ta nyakbeꞌena bega be ta ugaꞌach cuent ten xteꞌe nibeꞌe Dios. Ná leꞌa ndoꞌ bexa xaꞌaga sbeꞌen nsaktabeꞌe naꞌ be taꞌa gor ndadiꞌizh naꞌ. Tal iwiꞌi bexa leꞌa bexa lá inaꞌ. No tal goꞌón bexa ta ndáp naꞌ, leꞌa bexa lá yakbeꞌena‑yá.
Jesús mbidiꞌizh xtaꞌan ndab cuent ten xa ndas trig
(Mt. 13:18-23; Mr. 4:13-20)
11 ’Leꞌa ta msaktabeꞌe naꞌ wa lndeꞌe nak: Leꞌa bid ten trig wa cuent diꞌizh ten Dios. 12 Leꞌa toꞌo nes sa ulate bid ten trig wa nak cuent be men ndoꞌón diꞌizh ten Dios, parea leꞌa maxuꞌu cha nlen ngoꞌo‑yá len ladoꞌo bexa, cha lá gungea ladna bexa‑yá, no lá usaꞌa Dios gealnaban ten bexa. 13 Leꞌa yo geꞌ sa ulate bid wa nak cuent be men nten ladna ndoꞌón diꞌizh ten Dios, ná leꞌa bexa wa cuent trig lá ndap sian loꞌ na. Ndangea ladna bexa diꞌizh ten Dios dub ndeꞌep, ná leꞌa gor na juert ncho xa geal ndangea ladna xa diꞌizh wa, cha nlaꞌa xa‑yá. 14 Leꞌa yo sa len gix nsoꞌ gich wa nak cuent be men ndoꞌón diꞌizh ten Dios. Ná leꞌa bexa nyuꞌ ladna, no ngeꞌ ladna bexa be ta siantsa ndap bexa, no nkwaꞌan bexa ta nladtsa bexa. Leꞌa bexa wa cuent dub trig lá nsaꞌa taꞌa. 15 Parea leꞌa sa utaꞌa yo wa nak cuent be men wen ladoꞌo na ndoꞌón diꞌizh ten Dios, no ndun bexa lak ndab‑a. Nxik bexa ndun bexa ta wen, leꞌa bexa nak cuent be trig nsaꞌa sian bid.
Dub cuent ten dub xeꞌa
(Mr. 4:21-25)
16 ’Naꞌan ton kich xeꞌa, cha usob xa‑yá len dub gets, natal xan loꞌon. Leꞌa xa ndi usob xeꞌa dub sa gaꞌap, ndontsa usu‑yá xeꞌa ndoꞌ bexa nyoꞌo len niꞌi wa. 17 Leꞌa itea be ta xgaꞌach, leꞌa gal dub wizh leꞌa ta wa igenka. No iteanak be ta ncho ngachyoꞌo, leꞌa gal dub gor leꞌa ta wa iluuka ndoꞌ xeꞌa.
18 ’Blaꞌach bego ta gáp naꞌ ndee, leꞌa ndoꞌ bexa nyakbeꞌena leꞌa Dios gun mas yakbeꞌena bexa. Ná leꞌa bexa na lá nyakbeꞌena, leꞌa Dios slat ta na nsak bexa nyakbeꞌena bexa wa.
Xnaꞌa Jesús no be wit xa nlad iniꞌí xa
(Mt. 12:46-50; Mr. 3:31-35)
19 Weꞌe leꞌa xnaꞌa Jesús no be wit xa ulayaꞌ sa nsob xa. Parea lá yoꞌo gan ibii bexa wats xa, geal leꞌa sa wa uzhebpa kwaꞌad be men ndebe. 20 Leꞌa dub men cha ndab ndoꞌ Jesús:
—Leꞌa xnaꞌa ga no be wit ga ndebe tsoꞌo juer ndee, nlad bexa iniꞌí bexa ga.
21 Leꞌa Jesús cha ukaꞌab ndab:
—Leꞌa bexa na ndoꞌón diꞌizh ten Dios no ndun xa lak ndab‑a, leꞌa bexa wa nak xnaꞌa naꞌ no wit naꞌ.
Jesús mtsaw ndoꞌ mbi siꞌil ulen ndoꞌ nits
(Mt. 8:23-27; Mr. 4:35-41)
22 Ngok stub wizh leꞌa Jesús ukea ndoꞌ dub barco nsea be xmen na. Cha ndab Jesús ndoꞌ bexa:
—Itakea beuna stub toꞌo nits.
Cha nchaꞌbe bexa. 23 Ndalen li nchaꞌbe bexa ndoꞌ nits wa, leꞌa Jesús cha ngwadgats. Leꞌa ndoꞌ nits wa cha ulen dub mbi siꞌil, gast ngi slaꞌyoꞌo barco wa len nits. Cha uzhebpa rages nchaꞌbe bexa. 24 Cha mkwaꞌan bexa Jesús, ndab bexa:
—¡Mech! ¡Mech! ¡Leꞌa beuna ngi sat!
Cha uban Jesús, cha uteyo xa mbi siꞌil nsea be golp ten nits wa. Cha uleas mbi no xe ute nits. 25 Cha ndab Jesús ndoꞌ be xmen na:
—¿Maxá ta ngeꞌ ladna bega naꞌ wa zhaga?
Cha mzheb bexa, no ngwanseana bexa, ndab bexa ndoꞌ be ltsaꞌa xa:
—¿Tonxá xa ndee zhaga, gast mbi nsea nits nxobgek ndoꞌ diꞌizh ten xa?
Jesús ulantuꞌub mbi bxin ncho len ladoꞌo dub xa Gadara
(Mt. 8:28-34; Mr. 5:1-20)
26 Cha ulayaꞌ bexa stub toꞌo nits, lad ndoꞌ distrit Galilea sa nibeꞌe gezh Gadara. 27 Leꞌa gor na ulaꞌ Jesús ndoꞌ barco wa, cha ulen dub xa gezh wa wats Jesús, dub xa kwenla ncho mbi bxin len ladoꞌo na. Leꞌa xa wa ni lá ndak xab na, no ni lá nyoꞌo xa ta lid xa, ndi sbeꞌen len be geꞌloꞌo ngaꞌach be men ngut ncho xa. 28 Leꞌa gor uniꞌí xa wa Jesús, cha ugeꞌ utezhat xa, cha msaxib xa ndoꞌ Jesús, cha ugeꞌ ndab mbi bxin wa:
—¿Xtaꞌan ngi naꞌ nsea ugal lu zha, Jesús Xin Dios siꞌil? Leꞌa naꞌ naꞌab ndoꞌ lu lá utsaksi lu naꞌ.
29 Li ndab ta wa geal leꞌa Jesús unibeꞌela ndoꞌ mbi bxin wa itoꞌo ladoꞌo xa wa. Leꞌa mbi bxin wa uzheꞌeb pol‑lata nibeꞌe xabgiꞌi wa. Leꞌa be men sian biaj mxi yaꞌa xa no xoꞌo xa nsea caden, ná xa nkixka ta wa. Cha ndun mbi bxin wa gan nxoꞌon xa geꞌe sa naꞌan men.
30 Leꞌa Jesús cha unabdiꞌizh ndoꞌ mbi bxin wa, ndab xa:
—¿Xteꞌe nsaleaꞌ lu?
Leꞌa ta wa cha ukaꞌab ndab:
—Naꞌ nsaleaꞌ Uzheꞌeb Kwaꞌad Xa.
Li ndab ta wa geal leꞌa be mbi bxin wa kwaꞌadpa uyoꞌo len ladoꞌo xa wa. 31 Leꞌa be mbi bxin wa cha unab ndoꞌ Jesús lá utuꞌub Jesús be ta wa gast geꞌed uzheꞌeb lá ndap xan na. 32 Ndi unab be mbi bxin wa ndoꞌ Jesús ulaꞌa Jesús yoo beya len be kuch kwaꞌad ndeseayaw sa wa. Leꞌa Jesús cha msaꞌa diꞌizh li gun be ta wa. 33 Leꞌa be mbi bxin wa cha utoꞌo ladoꞌo xa wa, cha uyoꞌo beya len be kuch wa. Leꞌa bema cha karrel nchaꞌbe uxoꞌon gek dub weꞌa toꞌo nits. Cha ubix bema gast len nits ulaꞌyoꞌo bema, cha ngut bema.
34 Leꞌa bexa nkeno be kuch wa, gor na uniꞌí bexa ta wa, cha nseaꞌbe uxoꞌon bexa. Leꞌa nes nseaꞌbe bexa mbidiꞌizh bexa ta uyoꞌo wa ndoꞌ be men gezh no ndoꞌ be men ndesea geꞌe. 35 Leꞌa be men wa cha utoꞌobe nchaꞌwiꞌi ná xtaꞌan ta uyoꞌo wa. Leꞌa gor ulayaꞌ bexa wats Jesús, uniꞌí bexa xabgiꞌi na utoꞌo be mbi bxin len ladoꞌo na wa nsobma wats xoꞌo Jesús. Leꞌa xa wa nakla xab na no yá naꞌanlatapa tont nak xa. Leꞌa be men wa cha mzheb. 36 Leꞌa bexa na uniꞌí xteꞌe myakna xa wa cha mbidiꞌizh ta wa ndoꞌ be men. 37 Weꞌe leꞌa itea be men ncho sa nibeꞌe Gadara unab ndoꞌ Jesús ikaꞌan Jesús sa wa, leꞌa bexa uzhebpa nzheb. Leꞌa Jesús cha ukea ndoꞌ barco, cha ndiꞌizh yaꞌ xa. 38 Leꞌa xa na utoꞌo be mbi bxin len ladoꞌo na wa cha unab ndoꞌ Jesús no xa yaꞌno Jesús. Parea leꞌa Jesús ndi ndab:
39 —Nat byaꞌ ta lid lu. Cha bidiꞌizh xteꞌe wen mbinno Dios lu.
Leꞌa xa wa cha nseaꞌ, usaxan ndadiꞌizh xa ndoꞌ itea be men gezh wa xteꞌe myunyakna Jesús xa.
Jesús myunyakna dub xagots nsea mxiste xa xingots Jairo
(Mt. 9:18-26; Mr. 5:21-43)
40 Leꞌa gor na mlanseaꞌ Jesús stub toꞌo nits, leꞌa be men uzhebpa mten ladnabe, geal leꞌa bexa itea ndenkeaꞌ ilen Jesús. 41 Weꞌe ulen dub xabgiꞌi nsaleaꞌ Jairo, xa nchansu niꞌi sa nzhealbe bexa judio gezh wa. Leꞌa xa wa cha usaxib ndoꞌ Jesús, cha unab xa ndoꞌ Jesús yaꞌ Jesús ta lid xa. 42 Leꞌa xa wa ndap dubtsa xingots na ncho tibtop liꞌin, parea leꞌa meꞌed wa yamer gat. Leꞌa gor na nchaꞌbe bexa nes leꞌa be men kwaꞌad ngidko Jesús.
43 Ná leꞌa lat be men wa nchaꞌa dub xagots kweaꞌ nsak, nleꞌa xa ten idub dub tibtopla liꞌin. Leꞌa xa wa sianla biaj ngwaꞌ ndoꞌ be doctor gast mteꞌa xa itea be taꞌa ndap xa. Ná ni dub be doctor lá ngun gan yakna xa. 44 Leꞌa xa wa ubii ndi tsoꞌo Jesús, cha mgal xa ndats xab Jesús. Cha bi leꞌa gor wa leꞌa ten wa cha uleaslenla las xa. 45 Weꞌe leꞌa Jesús cha ndab:
—¿Ton xa mgal xab naꞌ?
Leꞌa itea be men wa ndab naꞌanpa ugal xab Jesús. Leꞌa Pedr no be ltsaꞌa xa ndab:
—Mech, leꞌa be men baꞌ leꞌa ngidko go, ¿ná xtaꞌan ndab ga ton mgal xab go zha?
46 Leꞌa Jesús cha ndab:
—Dub menka mgal xab naꞌ, leꞌa naꞌ mgenna utoꞌo dub tuzh juers ten naꞌ.
47 Leꞌa gor na uniꞌí xagots wa leꞌa Jesús mgenna ta mbin xa, cha nxis xa tant nzheb xa. Cha ubii xa msaxib xa ndoꞌ Jesús. Cha ndab xa ndoꞌ gaꞌal itea be men ná xtaꞌan mgal xa xab Jesús, no xteꞌe uxax myakna xa. 48 Leꞌa Jesús cha ndab ndoꞌ xa:
—Xagots, leꞌa ta na ngeꞌ ladna lu naꞌ, ta weꞌe mbin myakna lu. Nat byaꞌ, cha bten ladna lu.
49 Ndalen li nsoꞌyadiꞌizh Jesús, ulen dub xa utoꞌo ta lid Jairo, ndab xa ndoꞌ Jairo:
—Lá goꞌo ga mech baꞌ, leꞌa xin ga ngutla.
50 Leꞌa gor na mbiꞌín Jesús ta wa, cha ndab xa ndoꞌ Jairo:
—Lá izheb lu. Bingeatsa ladna lu naꞌ, leꞌa xin lu sbanka.
51 Leꞌa gor na ulayaꞌ bexa ta lid Jairo, leꞌa Jesús cha uyoꞌo len niꞌi wa nsea Pedr no Jacob no Juan, nsea xus meꞌed nsea xnaꞌa meꞌed. Cha ni dubta men lá ulaꞌa Jesús yoꞌo len niꞌi wa. 52 Leꞌa be men kwaꞌad wa ndoꞌon, no nbezhat bexa geal ngut meꞌed wa. Ná leꞌa Jesús cha ndab:
—Yá lá goꞌonta bega, leꞌa meꞌed baꞌ naꞌanpa ngut, leꞌa meꞌed ga naxyats.
53 Leꞌa be men wa ndi mxiꞌidno Jesús, geal leꞌa bexa uniꞌí leꞌa meꞌed wa ngutka. 54 Leꞌa Jesús cha usen yaꞌa meꞌed, cha ugeꞌ ndab Jesús:
—¡Meꞌed gots, goste!
55 Weꞌe leꞌa gealnaban ten meꞌed wa cha myoꞌogal len ladoꞌo meꞌed, cha uxax ngwaste meꞌed. Leꞌa Jesús cha ndab ndoꞌ be usan ten meꞌed wa:
—Bsaꞌa bega ta gaw med.
56 Leꞌa be usan ten meꞌed wa uzhebpa ndanseanabe, ná leꞌa Jesús cha unibeꞌe naꞌan ton ndoꞌ ná gab bexa ta ngok wa.