1 Leꞌa tsoꞌo wa leꞌa Jesús mchealte isatibtop be xmen na. Cha msaꞌa xa juers ndoꞌ bexa kontuꞌub bexa be mbi bxin, no yunyakna bexa be men gizh. 2 Cha mtuꞌub xa bexa yaꞌuluu bexa xteꞌe nibeꞌe Dios be men, no yunyakna bexa be men gizh. 3 No ndab Jesús ndoꞌ bexa:

—Ni dub taꞌa guntiꞌin bega nes lá goꞌo bega, ni bordón no ni bols no ni pan no ni med. No ni lá goꞌo bega top nes xab bega. 4 Tal pa niꞌi na usaꞌa bexa yoo bega dub gezh, sa weꞌetsa yoo bega gast wizh ikaꞌan bega gezh wa. 5 No tal ncho gezh lá ulaꞌa bexa yoo bega, bkaꞌan bega gezh wa. Cha blate bega gast yakol ngwaꞌal xoꞌo bega, ta uluu leꞌa Dios ndakloo ndoꞌ bexa wa.

6 Leꞌa isatibtop bexa wa cha utoꞌo nchaꞌbeyadiꞌizh diꞌizh wen ten Dios itea be gezh nde gax sa wa, no myunyakna bexa be men gizh.

7 Leꞌa Herodes xa nibeꞌe distrit Galilea mbiꞌín itea be ta ndun Jesús. Ná leꞌa xa ni lá iniꞌí ton xa wa, geal leꞌa ncho be men ndab leꞌa Jesús wa Juan mbangal ndoꞌ gealgut. 8 No ncho bexa ndab leꞌa xa wa profet Elí mlengal. No nchoga bexa ndab leꞌa xa wa tonla dub profet uyoꞌo xapta mbangal. 9 Ta weꞌe mbinbeꞌe Herodes, ndab xa:

—Leꞌa naꞌ unibeꞌe myabtoꞌog gen Juan. ¿Cha tonxá xa ndee ndon naꞌ ndun sian be ta ndee zhaga?

Ta weꞌe uzhebpa nlad Herodes iniꞌí Jesús.

10 Leꞌa ngol gor na mlaꞌnchaꞌ isatibtop be xmen Jesús, leꞌa bexa cha mbidiꞌizh itea be ta mbin bexa. Leꞌa Jesús cha mbiꞌi bexa dub sa naꞌan men, gax gezh Betsaida. 11 Ná leꞌa gor na uniꞌí be men pa nchaꞌa Jesús, cha no bexa usankea tsoꞌo Jesús. Leꞌa xa cha utezh bexa wa sa nsob xa. Cha mbidiꞌizh xa xteꞌe nibeꞌe Dios be men, no myunyakna xa be men gizh.

12 Leꞌa ngol gor na mas uzhela, leꞌa isatibtop be xmen Jesús ubii wats xa, ndab bexa:

—Gud go ndoꞌ be men baꞌ yaꞌbe bexa be ranch no be gezh nde gax baꞌ, ukwaꞌan bexa sa gadgats bexa no ta gaw bexa, leꞌa sa ndee dub sa naꞌanpa ncho men.

13 Leꞌa Jesús cha ndab:

—Bsaꞌa bega ta gaw bexa.

Leꞌa bexa wa cha ukaꞌab ndab:

—Leꞌa besa ndap sgaꞌaytsa pan nsea stoptsa mbeal. Ná leꞌa besa lá yoo gan yaꞌisiꞌi ta gaw itea be men ndee.

14 Leꞌa lat itea be men wa ncho pa dub gaꞌay mil xabgiꞌi. Weꞌe leꞌa Jesús cha ndab ndoꞌ be xmen na:

—Gud bega isob itol gayoꞌo gaꞌga bexa.

15 Cha li mte be xmen Jesús itea be men kwaꞌad wa. 16 Leꞌa Jesús cha usen isagaꞌay pan nsea itop mbeal wa, cha mwiꞌi xa gibeꞌa msaꞌa xa xno ndoꞌ Dios. Cha uleꞌa xa be pan no be mbeal wa sian bleꞌa, cha msaꞌa xa‑yá ndoꞌ be xmen xa, mtseꞌa bexa‑yá ndoꞌ be men wa. 17 Leꞌa itea be men wa udaw ta wa gast plo mzhea bexa. Leꞌa be xmen Jesús cha mteleꞌe stibtop zhum byux ta myaꞌan sobr wa.

18 Leꞌa dub wizh leꞌa Jesús ngwaꞌyadiꞌizhno Dios dub sa naꞌan men, nabtsa be xmen xa mbiꞌi xa. Leꞌa Jesús cha unabdiꞌizh ndoꞌ bexa wa, ndab xa:

—¿Xteꞌe ndab be men zha ton nak naꞌ?

19 Leꞌa bexa wa cha ukaꞌab ndab:

—Leꞌa ncho be men ndab leꞌa go Juan xa ulaleaꞌ be men. No ncho bexa ndab leꞌa go Elí. No nchoga bexa ndab leꞌa go stub profet uyoꞌo polta mbangal ndoꞌ gealgut.

20 Leꞌa Jesús cha ndab:

—¿Bego zha xteꞌe gab bega ton nak naꞌ?

Weꞌe leꞌa Pedr ndab:

—Leꞌa go nak Cristo, xa mtuꞌub Dios.

21 Leꞌa Jesús unibeꞌe ndab ndoꞌ bexa:

—Naꞌan ton ndoꞌ ná gudiꞌizh bega ta wa.

22 No ndab Jesús:

—Leꞌa naꞌ, Xa Myak Men Ndoꞌ Gizhliyo, nsabndoꞌka sian gealkweaꞌ iní. Leꞌa bexa gox nsak no be uleꞌay nibeꞌe no be mech ten ley uxelad naꞌ, cha gat naꞌ. Cha gal wizh yon leꞌa naꞌ ibangal.

23 No ndab Jesús ndoꞌ bexa:

—Tal ton nlad isankea tsoꞌo naꞌ, nsabndoꞌ ulaꞌa xa itea be ta nlad xa, cha goꞌo xa cruz ten xa itea wizh, cha isankea xa tsoꞌo naꞌ guniꞌi xtaꞌan gunno be men xa. 24 Leꞌa tal ton ukwaꞌan xteꞌe wen yoo xa, leꞌa xa wa ndi gun perdid gealnaban ten na ndoꞌ Dios. Ná leꞌa tal ton gat ke ten naꞌ, leꞌa xa wa gap gealnaban ndoꞌ Dios. 25 Tal leꞌa dub men ndap itea be ta ncho ndoꞌ gizhliyo ndee, cha gat xa, leꞌa iteanak be ta wa ta naꞌan xtiꞌin. 26 Leꞌa tal ton idono ladna naꞌ no diꞌizh ten naꞌ, leꞌa naꞌ, Xa Myak Men Ndoꞌ Gizhliyo, no idono ladna xa wa, gal wizh ilenno naꞌ xeꞌa siꞌil ten Dios Tad no be angel ten Dios. 27 Leꞌa naꞌ gáp ndoꞌ bega leꞌa ncho bexa nde ndee naꞌanpa cha gat gast iniꞌíka xa gal tiemp inibeꞌe Dios.

28 Leꞌa ngol pa stub sman tsoꞌo na li mbidiꞌizh Jesús ta wa, cha mbiꞌi xa Pedr no Juan no Jacob, ukea bexa dub bet sa ndaꞌyadiꞌizhno Jesús Dios. 29 Leꞌa gor na li nsoꞌyadiꞌizhno xa Dios, leꞌa xa cha mtixndoꞌ ndoꞌ gaꞌal bexa wa. Leꞌa xab xa cha mnaꞌ mbe, ndon nlaꞌbealꞌ‑a. 30 Zha leꞌa sa wa cha mlundoꞌ top xabgiꞌi ndeyadiꞌizhno Jesús, leꞌa ta wa Moisés no Elí. 31 Leꞌa bexa wa nde tlaw dub xeꞌa uzheꞌeb chul, ndeyadiꞌizhno bexa Jesús ná xteꞌe gat Jesús gezh Jerusalén. 32 Leꞌa Pedr no itop ltsaꞌa xa uzhebpa nyoxkaꞌal na, ná leꞌa bexa mxik lá ngadgats. Cha uniꞌí bexa xteꞌeta nlaꞌbealꞌ wats Jesús, no uniꞌí bexa top xabgiꞌi wa nde wats Jesús. 33 Ngol gor na yá nseaꞌbe sa sit Moisés nsea Elí wats Jesús, leꞌa Pedr cha ndab ndoꞌ Jesús:

—Mech, uzhebpa wen ndebe beuna sa ndee. Gundeꞌe besa chon ramad: dub‑a na ten go, leꞌa stub‑a na ten Moisés, leꞌa stub‑a na ten Elí.

Ná leꞌa Pedr ni lá iniꞌí xtaꞌan ndab. 34 Bi li nsoꞌyab Pedr ta wa, zha leꞌa dub xkaw ulaꞌla sa nde bexa wa, cha mzheb bexa. 35 Leꞌa lat xkaw wa mgen ti Dios ndab:

—Leꞌa ta ndee Xiꞌín naꞌ, xa na mti naꞌ. Bsakyoꞌón bega ta ndab xa.

36 Leꞌa gor na uleas ti Dios wa, leꞌa Jesús nabla nsoꞌ. Leꞌa bexa wa lá ngudiꞌizh ta li uniꞌí bexa wa dub ndeꞌep ndoꞌ be men.

37 Leꞌa ngol stubtsa wizh gor na nchaꞌlayoꞌo bexa bet wa, leꞌa kwaꞌad be men utoꞌo, nchaꞌbe ucheꞌalndoꞌ Jesús. 38 Leꞌa dub xabgiꞌi nsea lat be men wa ugeꞌ ndab:

—Mech, leꞌa naꞌ naꞌab ndoꞌ go iwiꞌi go ndoꞌ xmeꞌed naꞌ, leꞌa meꞌed ga dubkama ndap naꞌ. 39 Leꞌa gor na nsen dub mbi bxin med, cha nbezhat med, no uzheꞌeb nteꞌal med, no nlen bchiꞌin toꞌo med. Uzheꞌeb xela ndanno ta wa med, no kwenpa leꞌa zha nlaꞌa ta wa med. 40 Leꞌa naꞌ unaꞌabla ndoꞌ be xmen go kontuꞌub bexa mbi bxin wa, parea leꞌa bexa lá ngun gan.

41 Leꞌa Jesús cha ukaꞌab ndab:

—¡Uzhebpa ngud nak bego ncho nat, no ndidotsa ngeꞌ ladna bega Dios! ¿Ploxá tiemp yoꞌo naꞌ lat bega zhaga? ¿Sta ploxá tiemp uxik naꞌ ndoꞌ bega zhaga?

Cha ndab Jesús ndoꞌ xabgiꞌi wa:

—Utseano xmeꞌed lu baꞌ sa ndee.

42 Leꞌa gor na nchaꞌbii gax meꞌed wa, leꞌa mbi bxin wa cha udingegal meꞌed ndoꞌ yo, no uzhebpa ngot bixte meꞌed. Leꞌa Jesús cha uteyo mbi bxin wa, cha myunyakna xa meꞌed wa. Cha myun Jesús cuent meꞌed wa ndoꞌ xus med. 43 Leꞌa itea be men wa ndanseanabe gor uniꞌí bexa xteꞌe juert nak Dios.

Ndalen li ndeyanseana be men ndoꞌ ta mbin Jesús wa, leꞌa xa cha ndab ndoꞌ be xmen na:

44 —Uzhebpa blaꞌach bega ta gáp naꞌ ndee. Leꞌa naꞌ, Xa Myak Men Ndoꞌ Gizhliyo, yak cuent ndoꞌ yaꞌa be men.

45 Parea leꞌa be xmen Jesús ni lá yakbeꞌena ta li ndab xa wa, geal leꞌa Dios biseata ulaꞌa yakbeꞌena bexa‑yá. Ná leꞌa bexa nzhebta inabdiꞌizh ndoꞌ Jesús xteꞌe gab ta wa.

46 Weꞌe leꞌa be xmen Jesús cha ndeyadiꞌizhbe ná ton mas nsak lat bexa wa. 47 Leꞌa Jesús mgenna xtaꞌan ndanbeꞌe bexa, cha usen xa dub meꞌed, cha msoꞌ xa meꞌed wats xa. 48 Cha ndab xa ndoꞌ bexa:

—Leꞌa tal ton dub xmen naꞌ utsin gak xa ndoꞌ dub meꞌed, leꞌa xa wa cuentkata ndoꞌ naꞌ utsin nak. Leꞌa xa na utsin nak ndoꞌ naꞌ wa, leꞌa xa wa utsinkaga nak ndoꞌ xa na mtuꞌub naꞌ. Leꞌa xa na uxee nsak lat bega wa, leꞌa xa wa ndon leꞌa xa nsak ndoꞌ Dios.

49 Leꞌa Juan cha ndab ndoꞌ Jesús:

—Mech, leꞌa besa uniꞌí dub men ndantiꞌin leaꞌ go ngontuꞌub xa be mbi bxin. Leꞌa besa cha mka guntiꞌinta xa leaꞌ ga, geal leꞌa xa naꞌanpa no nkeseano beuna.

50 Leꞌa Jesús cha ndab:

—Lá uka bega gun xa ta wa, leꞌa tal ton naꞌanpa ndakloo ndoꞌ beuna, leꞌa xa wa dubtsa nak no beuna.

51 Leꞌa zha na yamer ngol zha yaꞌ Jesús gibeꞌa stub biaj, leꞌa xa dubtsa ulo ladna yaꞌ Jerusalén. 52 Cha mtuꞌub xa pla xmen xa nchaꞌbe nedlabe. Leꞌa bexa wa cha ulayaꞌ dub gezh ten distrit Samaria, mkwaꞌan bexa sa yoo Jesús. 53 Ná leꞌa bexa gezh wa lá usaꞌa sa yoo xa, leꞌa bexa uniꞌí leꞌa Jesús nchaꞌa Jerusalén. 54 Leꞌa Jacob no Juan top xmen Jesús mbiꞌín ta wa, cha ndab bexa ndoꞌ Jesús:

—Señor, ¿nlad ga inab besa ndoꞌ Dios ulaꞌ bealꞌ gibeꞌa utsoꞌol‑a be men baꞌ lak mbin Elí zha?

55 Leꞌa Jesús mgeaksoꞌ mwiꞌi ndoꞌ bexa. Cha uteyo Jesús bexa, ndab xa:

—Bego ni lá iniꞌí ton ngo gek bega li ndab bega. 56 Leꞌa naꞌ, Xa Myak Men Ndoꞌ Gizhliyo, naꞌanpa ndalyut be men, leꞌa naꞌ ndi ndalusa gealnaban ten bexa.

Cha nchaꞌbe bexa stubga gezh.

57 Leꞌa gor na li nchaꞌbe bexa nes, leꞌa dub men ndab ndoꞌ Jesús:

—Señor, leꞌa naꞌ no isankea tsoꞌo go guniꞌi pa yaꞌ ga.

58 Leꞌa Jesús cha ndab ndoꞌ xa wa:

—Leꞌa be mbeas ndap geꞌed nyoꞌo na, no leꞌa be migin ndap xuꞌun ten na, parea leꞌa Xa Myak Men Ndoꞌ Gizhliyo lá ndap sa uneꞌe xa.

59 Cha ndab Jesús ndoꞌ stub xa:

—Usankea tsoꞌo naꞌ.

Leꞌa xa wa cha ndab:

—Señor, blaꞌa ga ned yaꞌukaꞌach naꞌ xus naꞌ. Weꞌeta isankea naꞌ tsoꞌo ga.

60 Leꞌa Jesús cha ndab:

—Blaꞌa leꞌa bexa lá ndap gealnaban ndoꞌ Dios ukaꞌach ltsaꞌa ngut na. Ná leꞌa lu ndi waꞌyab ndoꞌ be men xteꞌe inibeꞌe Dios bexa.

61 Leꞌa stub xa cha ndabgal ndoꞌ Jesús:

—Señor, leꞌa naꞌ no isankea tsoꞌo ga, parea blaꞌa ga ned nseayáp naꞌ‑yá ndoꞌ bexa ta lid naꞌ.

62 Leꞌa Jesús cha ndab:

—Tal ton nlad isankea tsoꞌo naꞌ, ná leꞌa xa ndi ned stub ta xaꞌaga gun, leꞌa xa wa lá isuꞌu yoo lat be men nibeꞌe Dios. Leꞌa xa wa nak cuent dub xa ndun tiꞌin, nsén xa yaꞌa yarad, cha nwiꞌi xa ndi tsoꞌo.