1 Tsoꞌo wa leꞌa Jesús mti stub chon gaꞌal ncho tiꞌi be men, mtuꞌub xa bexa wa top gaꞌga bexa, yaꞌbe nedla bexa itea be gezh yaꞌ Jesús. 2 Ndab Jesús ndoꞌ bexa wa:

—Ncho kwaꞌad be men gol goꞌón diꞌizh ten Dios, nak bexa cuent sianpa be taꞌa iganleꞌe, ná leꞌa bexa ndun tiꞌin wa platsa. Ta weꞌe unab bega ndoꞌ Dios Xwan tiꞌin, utuꞌubta xa bexa gudiꞌizh diꞌizh ten Dios. 3 Waꞌbe bega nat, leꞌa naꞌ ntuꞌub bega yaꞌbe bega cuentta be borreg nde lat be mbee. 4 Lá goꞌo bega bols ncho med, no ni stub bols ten bega, no ni stub nes ndab bega. No naꞌanpa gaisoꞌ bega nes inidiꞌizh bega ndoꞌ be men. 5 Leꞌa gor na yoo bega len dub niꞌi, cha gab bega ndoꞌ men wa: “Leꞌa Dios gun wen yoo ladna bega.” 6 Tal leꞌa xa ncho sa wa utsin ikaꞌab ndoꞌ bega, weꞌe leꞌa Dios gun wen yoo ladna xa wa. Ná tal leꞌa xa naꞌanpa utsin ikaꞌab, leꞌa xa naꞌanpa wen yoo ladna. 7 Leꞌa sa na utsin ikaꞌab bexa ndoꞌ bega, sa weꞌetsa yoo bega. Lá ido ladna bega gaw bega no goo bega ta usaꞌa xa, leꞌa dub xa ndun tiꞌin nsabndoꞌ yax ten na. No naꞌanpa ucheꞌa bega sa yoo bega. 8 Leꞌa gor na ilayaꞌ bega dub gezh sa utsin nak men ndoꞌ bega, gaw bega ta nsaꞌa bexa wa. 9 No byunyakna bega bexa gizh ncho gezh wa, cha gud bega ndoꞌ bexa leꞌa tiemp inibeꞌe Dios ladoꞌo be men yá gax nak. 10 Ná tal ncho gezh naꞌanpa utsin nak bexa ndoꞌ bega, bkaꞌan bega sa wa, cha gud bega ndoꞌ bexa wa: 11 “Gast yakol ngwaꞌal xoꞌo besa gezh ndee ulate besa, ta nluu leꞌa Dios utsaksi bega. Parea nlad besa iniꞌí bega ta ndee: leꞌa tiemp inibeꞌe Dios ladoꞌo be men yá gaxla nak.” 12 Leꞌa naꞌ gáp leꞌa gal wizh gab Dios ná ton ndap ke, leꞌa bexa gezh wa mas gealkweaꞌ iniꞌí ndoꞌ bexa uyoꞌo gezh Sodoma.

13 ’¡Proꞌob bego xa gezh Corazín no bego gezh Betsaida! Leꞌa tal be uyon mbin naꞌ lat bego wa ndi ngun naꞌ gezh Tiro no Sidón, polta ngokla bexa lad nagats, no usobla bexa ndoꞌ diꞌ, ta uluu leꞌa bexa mlaꞌala be ta ugap nak bexa. 14 Ta weꞌe leꞌa gal zha na gab Dios ná ton ndap ke, leꞌa bego xa gezh Corazín no bego gezh Betsaida mas uzheꞌeb iniꞌí gealkweaꞌ ndoꞌ bexa Tiro no Sidón wa. 15 No bego xa gezh Capernaum, ¿ndanbeꞌe bega zha gibeꞌa yaꞌ bega? Leꞌa Dios ndi utsaꞌab bega infierno.

16 Cha ndab Jesús ndoꞌ be xmen na:

—Leꞌa tal ton isakyoꞌón be ta ndab bega wa, leꞌa xa wa isakyoꞌón diꞌizh ten naꞌ. Ná leꞌa tal ton uxelad bega, leꞌa xa wa no naꞌ ndee nxelad. Leꞌa xa na uxelad naꞌ wa, leꞌa xa wa no nxelad Dios xa mtuꞌub naꞌ.

17 Leꞌa gor na mlaꞌnchaꞌ isachon gaꞌal ncho tiꞌi bexa wa, leꞌa bexa uzhebpa mten ladna ndab ndoꞌ Jesús:

—Señor, gast be mbi bxin nxobgek ndoꞌ besa gor ndantiꞌin besa leaꞌ go.

18 Leꞌa Jesús cha ndab:

—Leꞌa naꞌ uní leꞌa maxuꞌu utoꞌo gaꞌap baꞌ ulayat ndoꞌ yo cuent bealꞌ usiꞌi. 19 Leꞌa naꞌ nsa juers ndoꞌ bego isoꞌ bega tsoꞌo mbeꞌal no nix, no mas gap bega juers ndoꞌ maxuꞌu. Ni dub taꞌa wa lá gun gan xteꞌe gunno bega. 20 Parea lá iten ladna bega xteꞌe nxobgek be mbi bxin ndoꞌ bega, ndi bten ladna bega leꞌa leaꞌ bega nkeala gibeꞌa.

21 Weꞌe leꞌa Espíritu ten Dios cha mbin mas nten ladna Jesús, cha ndab Jesús ndoꞌ Dios:

—Nsa naꞌ xno ndoꞌ go, Xus naꞌ, go Xa Nibeꞌe gibeꞌa no gizhliyo, leꞌa go lá ulaꞌa leꞌa bexa ndák wa no bexa ntsid wa yakbeꞌena be ta ndee. Ndi mluu ga‑yá ndoꞌ bexa naꞌanpa ndák, bexa nak cuent be meꞌed. Li ngok‑a Xus naꞌ, geal leꞌa go li nlad gak‑a.

22 Cha ndab Jesús ndoꞌ be men nde sa wa:

—Leꞌa Dios Xus naꞌ msaꞌa itea be taꞌa ndoꞌ naꞌ. No naꞌan ton nchandoꞌ naꞌ, nabtsa Xus naꞌ nchandoꞌ naꞌ. No naꞌan ton nchandoꞌ Dios Xus naꞌ, nabtsa naꞌ xa nak Xin xa nchandoꞌ xa, no bexa nlad naꞌ uluꞌu naꞌ ná ton nak Dios ndoꞌ bexa.

23 Cha mwiꞌi Jesús ndoꞌ be xmen na, cha ndab xa ndoꞌ nabtsa bexa wa:

—Dios ndun wen nyo ladna be men na no uniꞌí ltsaꞌa ta uniꞌí bega nat. 24 Leꞌa naꞌ gáp leꞌa kwaꞌad bexa mbidiꞌizh sakndoꞌ Dios no bexa nibeꞌe polta, nlad bexa iniꞌí bexa ltsaꞌa ta uniꞌí bega nat, ná leꞌa bexa lá iniꞌí ta wa. No nlad bexa goꞌón bexa ltsaꞌa ta ndoꞌón bega nat, ná leꞌa bexa lá ngoꞌón ta wa.

25 Weꞌe leꞌa dub mech ten ley mbin preb Jesús, ndab xa:

—Mech, ¿xteꞌe gun naꞌ ndontsa gap naꞌ gealnaban ndoꞌ Dios, ta nunk lá idub?

26 Leꞌa Jesús cha ukaꞌab ndab:

—¿Xteꞌe nkeaniꞌi ley ten Dios? ¿Xteꞌe nyakbeꞌena lu ta wa?

27 Leꞌa mech ten ley wa cha ndab:

—Leꞌa ley wa ndab: “Wankea Dios Xa Nibeꞌe idub ncho ladna ladoꞌo lu, no idub gealnaban ten lu, no idub juers ten lu, no idub lak ndanbeꞌe lu.” No ndab‑a: “Bkweaꞌ ladna lu be ltsaꞌa lu lakkata lu.”

28 Leꞌa Jesús cha ndab:

—Leꞌaka ukaꞌab lu. Nat bin be ta wa, leꞌa lu sapka gealnaban ndoꞌ Dios.

29 Ná leꞌa mech wa nlad wen yaꞌan ndoꞌ be men, ta weꞌe unabdiꞌizhgal xa ndoꞌ Jesús, ndab xa:

—¿Ton nak ltsaꞌa naꞌ zha?

30 Leꞌa Jesús cha ukaꞌab ndab:

—Leꞌa dub xabgiꞌi utoꞌo Jerusalén nchaꞌa xa Jericó. Leꞌa nes nchaꞌa xa wa, mlat be waꞌan itea be ta noꞌo xa no gast xab xa. No udin bexa xa, cha mlaugix bexa xa cuent dub xa ngut. 31 Ngol gor leꞌa sa wa nseatid dub uleꞌay ten bexa judio. Leꞌa xa wa cha uniꞌí nax men wa, cha gandidtsa utid xa. 32 Tsoꞌo wa nseatid dub xa levita sa wa. Leꞌa gor uniꞌí xa xa nax wa, cha gandidgal utid xa. 33 Leꞌa tsoꞌo wa nseatidga dub xa gezh Samaria. Leꞌa gor uniꞌí xa men wa, cha mlats ladna xa xa wa. 34 Cha ubii xa wats xa wa, cha mbin ramed xa xa aceit no vin. No mtixko xa lad be sa gizh wa. Cha mxoꞌob xa xa wa tsoꞌo man ten xa. Cha mbiꞌi xa xa dub niꞌi sa nteꞌe bexa cuart, cha mlaꞌach xa xa sa wa. 35 Ngot xeꞌa wa gor na yá nseaꞌ xa Samaria wa, leꞌa xa cha uloꞌo top med nsak, cha msaꞌa xa‑yá ukaꞌa xwan niꞌi wa. Cha ndab xa ndoꞌ xa wa: “Blaꞌach ga xa ndee. Leꞌa itea be ta gun gast ga wa, leꞌa naꞌ skixka ta wa wizh yach naꞌ.”

36 Cha ndab Jesús ndoꞌ mech ten ley wa:

—¿Xteꞌe nsak lu zha? Ndoꞌ yon bexa wa, ¿ton nak ltsaꞌa na xa na ulawaꞌan wa zha?

37 Leꞌa mech ten ley wa cha ukaꞌab ndab:

—Xa na mlats ladna xa wa.

Leꞌa Jesús cha ndab:

—Nat byaꞌ, cha no lu li bin.

38 Leꞌa nes nchaꞌa Jesús Jerusalén, cha ulayaꞌ xa dub gezh tuzh. Weꞌe leꞌa dub xagots nsaleaꞌ Mart utezh xa ta lid na. 39 Leꞌa xa wa ndap dub beal na nsaleaꞌ Marí. Leꞌa gor na nsob Jesús len niꞌi, leꞌa Marí wa nsob ulaꞌach xtaꞌan ndadiꞌizh Jesús. 40 Leꞌa Mart ndi nyuꞌno ladna sian be tiꞌin ten na. Cha ubii xa wats Jesús, ndab xa:

—Señor, ¿lá naꞌ go zha leꞌa beal naꞌ nlaꞌa nab naꞌ ndun itea be tiꞌin ndee? Gud go ndoꞌ xa no gakno naꞌ.

41 Leꞌa Jesús cha ukaꞌab ndab:

—Mart, Mart, uzhebpa nyuꞌno ladna lu sian be taꞌa. 42 Ncho dub taꞌa ndon leꞌa nsak. Leꞌa Marí ndee mti ta nsak wa, no ni lá gáp naꞌ ndoꞌ xa lá ulaꞌachta xa‑yá.