5
Pedro ruzéjniꞌnëꞌ nup taꞌyejlëꞌ Cristo
Naꞌa, ruzéjniꞌdaꞌ bönniꞌ gul tun chiꞌë lbiꞌiliꞌ náquiliꞌ queëꞌ Cristo, le nacaꞌ nedaꞌ caꞌ bönniꞌ gul ca nacquëꞌ, len bléꞌidaꞌ le gzxacaꞌ gdiꞌë Cristo, atiꞌ gunaꞌ caꞌ tsazxö́n lequëꞌ, uziꞌtuꞌ xbey yöl‑laꞌ yeníꞌ naꞌ glaꞌ lahui. Gul‑gác ca bönniꞌ tuꞌyú böꞌcuꞌ zxilaꞌ, gun chiꞌiliꞌ bunách naꞌ Dios gluꞌë lu naꞌliꞌ. Gul‑gún cni gdu ládxiꞌliꞌ ca rëꞌnnëꞌ Dios, len clëg le run bayúdx queëliꞌ, o le rzë ládxiꞌliꞌ dumí. Gul‑gún xchinliꞌ le rë́ꞌnizliꞌ len clëg le rë́ꞌniliꞌ gna béꞌizliꞌ nup naꞌ naguꞌë lu naꞌliꞌ. Gul‑güíꞌ ládxiꞌliꞌ gacliꞌ tu le ruluíꞌ ca ral‑laꞌ lac nup naꞌ run chiꞌiliꞌ. Cni nac, catiꞌ uluíꞌ lahuëꞌ Cristo, Nu naꞌ nac blau uyú böꞌcuꞌ zxilaꞌ, gdél‑liꞌliꞌ tu le uziꞌliꞌ xbey le gatga nit.
Lëzcaꞌ cni, biꞌi cuidiꞌ, gul‑gún ca taꞌnë́ꞌ bönniꞌ gul. Yúguꞌtëliꞌ ral‑laꞌ gunliꞌ ba laꞌn lzaꞌliꞌ, tuliꞌ yetuliꞌ, lu yöl‑laꞌ nöxj ladxiꞌ queëliꞌ, le nayúj lu guich laꞌy, rna:
Dios ruzaguëꞌë xnözgac nup tun ba zxön cuingac
San ráclenëꞌ nup nacgac nöxj ladxiꞌ.
Gul‑zóa nöxj ladxiꞌ lu nëꞌë Dios, atiꞌ Lëꞌ uchisëꞌ lbiꞌiliꞌ catiꞌ gzaꞌa dza. Gul‑cúꞌu lu nëꞌë Dios yúguꞌtë le run ga ruúbi ruguiꞌliꞌ, le ruiꞌ ladxëꞌë lbiꞌiliꞌ.
Gul‑gác baꞌa ladxiꞌ len gul‑spán ládxiꞌliꞌ, le zoa tuꞌ xöhuiꞌ, nu curleꞌi lbiꞌiliꞌ dxiꞌa, rda gdu zbiꞌil, nac ca tubaꞌ bëdx guixiꞌ rbö́dxyaꞌabaꞌ, rguiljbaꞌ nu gágubaꞌ. Gul‑gác tsutsu ca réjlëꞌliꞌ Cristo, len gul‑zagaꞌ xnöz tuꞌ xöhuiꞌ, le nö́ziliꞌ taꞌzacaꞌ taꞌguiꞌë böchiꞌ lzaꞌliꞌ gdutë yödzlyú ni ca naꞌ rzacaꞌ rguiꞌliꞌ lbiꞌiliꞌ. 10 Niꞌr catiꞌ chgzxacaꞌ gdiꞌliꞌ tu chiꞌz, Dios gunëꞌ ga gacliꞌ gdu, len ga gacliꞌ tsutsu, len ga gal‑liꞌ, len ga soaliꞌ tsaz. Lëczëꞌ Dios ruzáꞌ ladxëꞌë queëruꞌ yúguꞌtë le ruziꞌruꞌ xbey, len bulidzëꞌ rëꞌu quië uziꞌruꞌ xbey yöl‑laꞌ yeníꞌ queëꞌ zoa tsalzú le nacruꞌ tuz len Jesucristo. 11 Gactecz queëꞌ yöl‑laꞌ ba len yöl‑laꞌ uná bëꞌ. Caꞌ gac.
Pedro ruzeynëꞌ didzaꞌ nup taꞌdáꞌ Cristo
12 Dídzaꞌdauꞌ ni ruzujaꞌ queëliꞌ lu guich lu nëꞌë Silvano, len ráquidaꞌ naquëꞌ gdu bö́chiꞌruꞌ. Rëꞌndaꞌ utipaꞌ ládxiꞌliꞌ atiꞌ runaꞌ lnaꞌ lau lauliꞌ, le nactë lë ni nac le ruzáꞌ ladxëꞌë queëruꞌ Dios. Gul‑gác tsutsu le ruziꞌliꞌ xbey lë ni.
13 Tuꞌgáp lbiꞌiliꞌ Dios bunách queëꞌ Cristo nacuáꞌ Babilonia. Dios gröczëꞌ lequëꞌ ca naꞌ gröëꞌ lbiꞌiliꞌ. Lëzcaꞌ rugapbiꞌ lbiꞌiliꞌ Dios biꞌi Marcos, nacbiꞌ ca zxiꞌnczaꞌ. 14 Gul‑gáp Dios lzaꞌliꞌ tuliꞌ yetuliꞌ, len lu yöl‑laꞌ nadxíꞌi queëliꞌ lzaꞌliꞌ unídaꞌliꞌ lzaꞌliꞌ tuliꞌ yetuliꞌ.
Rnabdaꞌ‑nëꞌ Dios gunëꞌ ga soa dxi icj ládxiꞌdauꞌliꞌ, yúguꞌtëliꞌ naꞌ náquiliꞌ queëꞌ Jesucristo. Caꞌ gac.