4
Ral‑laꞌ udzíjilenteczruꞌ‑nëꞌ Xanruꞌ
1 Qui lë ni naꞌ, böchiꞌ lzaꞌadauꞌ, gul‑gác tsutsu ca réjlëꞌliꞌ Xanruꞌ. Nadxíꞌitsquidaꞌ lbiꞌiliꞌ len rëꞌndaꞌ duyúaꞌ lbiꞌiliꞌ. Runliꞌ ga rudzijdaꞌ len nacliꞌ ca tu le ruziꞌa xbey.
2 Lbiꞌiliꞌ, Evodia len Síntique, rátaꞌyuaꞌ lauliꞌ gacliꞌ tuz ca ral‑laꞌ lac nup náquigac queëꞌ Xanruꞌ. 3 Naꞌa, böchaꞌa gdu, rëꞌndaꞌ gáclenuꞌ gropnu ni, le glúnlennu nedaꞌ dxin, bentuꞌ lban qui didzaꞌ dxiꞌa, atiꞌ guladzaguëꞌ caꞌ netuꞌ Clemente len yezícaꞌrëꞌ lzaꞌa naꞌ. Chnayujgac laquëꞌ yehuaꞌ yubá ga naꞌ nayujgac lagac nup chnadél‑liꞌgac yöl‑laꞌ naꞌbán gdu.
4 Gul‑dzíjilentecz‑nëꞌ Xanruꞌ. Leyúbl, rniaꞌ: Gul‑dziji. 5 Gul‑gác dxiꞌi ladxiꞌ len yúguꞌtë bunách. Chzoa huödëꞌ Xanruꞌ.
6 Cutu ubi uguiꞌiliꞌ, san gul‑náb lahuëꞌ Dios le rquíniliꞌ len gul‑guië́ꞌ: “Xclenuꞌ”, ca nac yúguꞌtë lë naꞌ rnabliꞌ. 7 Dios gunëꞌ ga gac queëliꞌ le cuequi dxi icj ládxiꞌdauꞌliꞌ, lë naꞌ nadö́dr bëꞌi ca le gac laꞌyejniꞌi bunách. Lë naꞌ rbequi dxi icj ládxiꞌdauꞌruꞌ gun chiꞌi icj ládxiꞌdauꞌliꞌ len le rzaꞌ ládxiꞌliꞌ le nacliꞌ tuz len Jesucristo.
Ral‑laꞌ saꞌ ládxiꞌruꞌ le nacgac dxiꞌa
8 Ga ruúdxtë, böchiꞌ lzaꞌadauꞌ, gul‑sáꞌ ládxiꞌliꞌ:
yúguꞌtë le nac dxiꞌa,
len le nac bicaꞌ ba,
len le nac gdutë li,
len le nac gdu,
len le nac tsahuiꞌ,
len le nac baꞌa,
len le nac lach,
len le ral‑laꞌ gunruꞌ ba laꞌn.
9 Gul‑gún ca naꞌ busëddaꞌ lbiꞌiliꞌ, lë naꞌ gzxiꞌ lu naꞌliꞌ tsca naꞌ bë́ꞌlenaꞌ lbiꞌiliꞌ didzaꞌ len tsca naꞌ benaꞌ ga niꞌ zoaliꞌ. Dios, Nu runn queëruꞌ le rbequi dxi icj ládxiꞌdauꞌruꞌ sóalenëꞌ lbiꞌiliꞌ.
Le dxiꞌa glunëꞌ queëꞌ Pablo bönniꞌ Filipos
10 Rudzíjlendaꞌ‑nëꞌ Xanruꞌ le ruiꞌ ládxiꞌliꞌ nedaꞌ leyúbl. Cutu rniaꞌ gul ládxiꞌliꞌ nedaꞌ, san cutu gutaꞌ queëliꞌ latj gáclenliꞌ nedaꞌ ziꞌal. 11 Lëzcaꞌ cni, cutu rniaꞌ cni le zoa bi ryadzj quiaꞌ, le nazëdaꞌ gdzag ladxaꞌa le dëz quiaꞌ. 12 Chgdödaꞌ lu yöl‑laꞌ yechiꞌ len lu yöl‑laꞌ tsahuiꞌ. Nazëdaꞌ soaꞌ náctiꞌtëz, zal‑laꞌ nöljdaꞌ o nabí l rdunaꞌ, len zal‑laꞌ dë quiaꞌ szxöni o zoa bi ryadzj quiaꞌ. 13 Yúguꞌtë huazáquiꞌdaꞌ le rutipëꞌ ladxaꞌa Cristo. 14 Benliꞌ dxiꞌa catiꞌ niꞌ gúclenliꞌ nedaꞌ, butipliꞌ ladxaꞌa catiꞌ gzxacaꞌ gdiꞌa.
15 Lbiꞌiliꞌ, bönniꞌ Filipos, nö́ziczliꞌ ca guc quiaꞌ dza niꞌ catiꞌ buzáꞌa luyú Macedonia, yjenaꞌ lban qui didzaꞌ dxiꞌa. Tsca nacuáꞌ bunách queëꞌ Cristo, nutur nu guclen nedaꞌ, san lbiꞌizliꞌ gúclenliꞌ nedaꞌ. Bsö́laꞌliꞌ quiaꞌ bi bunödzjliꞌ, le gzxiꞌ lu naꞌliꞌ lban benaꞌ nedaꞌ. 16 Tsal niꞌ gzoaꞌ Tesalónica, tu chop lzu bsö́laꞌliꞌ quiaꞌ le bunödzjliꞌ catiꞌ niꞌ byadzj quiaꞌ. 17 Cutu ruiꞌ ladxaꞌa bi siꞌa, san rëꞌndaꞌ gataꞌr queëliꞌ le uziꞌliꞌ xbey yehuaꞌ yubá. 18 Rëpaꞌ lbiꞌiliꞌ: Chgzxiꞌa yúguꞌtë lë naꞌ bsö́laꞌliꞌ quiaꞌ, atiꞌ gdödti bëꞌi tsca le byadzjdaꞌ. Ben ga nac cni lë naꞌ bsö́laꞌliꞌ lu naꞌbiꞌ biꞌi Epafrodito. Lë naꞌ bunödzjliꞌ nac ca tu le rlaꞌ zxix rdxintë lahuëꞌ Dios, len ca tu le rguꞌruꞌ lahuëꞌ Dios le rdzag ladxëꞌë. 19 Dios gunnëꞌ queëliꞌ yúguꞌtë le ryadzj queëliꞌ, tsca nac yöl‑laꞌ tsahuiꞌ röꞌ yehuaꞌ yubá, le nacliꞌ tuz len Jesucristo. 20 Gactecz queëꞌ Xuzruꞌ Dios yöl‑laꞌ ba. Caꞌ gac.
Tuꞌgáp Dios lzaꞌgac bunách queëꞌ Cristo
21 Uláz quiaꞌ nedaꞌ, gul‑gáp Dios nup niꞌ náquigac queëꞌ Dios le nacgac tuz len Jesucristo. Tuꞌgapëꞌ lbiꞌiliꞌ Dios böchiꞌ lzaꞌruꞌ ni nunquëꞌ nedaꞌ tsazxö́n. 22 Lëzcaꞌ tuꞌgáp lbiꞌiliꞌ Dios yúguꞌtë nup ni náquigac queëꞌ Dios, len lëzcaꞌ cni, tuꞌgapëꞌ lbiꞌiliꞌ Dios yuguꞌ huen dxin nacuꞌë lidxëꞌ bönniꞌ rna bëꞌë gdu luyú Roma.
23 Rnabdaꞌ‑nëꞌ Xanruꞌ Jesucristo uzáꞌ ladxëꞌë queëliꞌ yúguꞌtëliꞌ. Caꞌ gac.