1 Jwan' nasa, lo na'nxekta' ná', ta nchala's ná' wi' ná' go', mbli ná' xgab yan' le'ta ná' yez Atenas, 2 nde mtelꞌ náꞌ wes naꞌ Timoteo, xaꞌ ndli sinꞌ lo Dios nde ta rsinꞌ náꞌ, jwanꞌ ndej diꞌs wen chanꞌ Jesucrist, sa laꞌsto xaꞌ goꞌ ak ne xgab goꞌ nde kwes xaꞌ yek goꞌ lo jwanꞌ ndli lazoꞌ goꞌ, 3 sa naꞌganta xgab nek thib goꞌ por re yalti reꞌ, tak leꞌga goꞌ mne ndabloga ri'd naꞌy. 4 Tak tagaꞌ, senꞌ benꞌ nzino náꞌ goꞌ, mdej la náꞌ lo goꞌ leꞌ naꞌ triꞌdka naꞌ yalti, nde taga ngoka, ta xa mnela goꞌy. 5 Jwanꞌ nasa tagaꞌ na, naꞌmbetra na sa mtel na Timoteo sa nyen nenꞌ xa ndo goꞌ lo jwanꞌ ndli lazoꞌ goꞌ, tak ndaga mtokilꞌ Maxuꞌ goꞌ lo jwanꞌ narax, nde rsinꞌ náꞌ ngencho sinꞌ ndliy.

6 Per lo mbere Timoteo ngwatna xaꞌ goꞌ nde mdaꞌ xaꞌ kwent lo náꞌ leꞌ goꞌ tatka ndli lazoꞌ goꞌ Dios nde nkeꞌ lazoꞌ go' ta go'. Nde senꞌ ntelaꞌs goꞌ náꞌ, thiblaꞌ ncho nale lazoꞌ goꞌ, nde ndonke toz goꞌ wiꞌ goꞌ náꞌ ta xa ndonke toz náꞌ wiꞌ náꞌ goꞌ. 7 Jwanꞌ nasa, wes náꞌ nde ptanꞌ náꞌ, xij reta yalti nde pen toz taja ndorid ná', ngo nale lazo' ná' lo mbin ná' ne ndo go' lo jwan' ndli lazo' go'. 8 Naya taxa ngone lazoꞌ náꞌ lo mne náꞌ ne ndo goꞌ lo xkiꞌs Xaꞌ Nyebeꞌ. 9 Jwanꞌ nasa, ¿axta naꞌnye naꞌ xomod taꞌ toz náꞌ dyux lo Dios por goꞌ lo taja nale toz nzo nale lazoꞌ náꞌ lo Dios por goꞌ? 10 Ndlyabe nde yalꞌ nyaꞌb toz náꞌ lo Dios sa taꞌ Xaꞌ diꞌs wiꞌ náꞌ goꞌ, nde laꞌsto náꞌ goꞌ sa masraꞌ ak ne xgab goꞌ lo jwanꞌ ndli lazoꞌ goꞌ.

11 Naya na, yub Xud naꞌ Dios, nde Jesucrist Xaꞌ Nyebeꞌ lonꞌ koꞌb Xaꞌ ned lo náꞌ sa yatna náꞌ goꞌ. 12 Xaꞌ Nyebeꞌ li sa xyen goꞌ lo yalnkeꞌ lazoꞌ sa masraꞌ keꞌ lazoꞌ goꞌ re men ndli lazonꞌ Dios nde keꞌ lazoꞌ goꞌ reta men, tak tamod nkeꞌ lazoꞌ náꞌ goꞌ. 13 Xaꞌ Nyebeꞌ li ne lazoꞌ goꞌ, nayon nde nambi ak goꞌ lo Dios Xaꞌ nak Xud naꞌ, senꞌ lo bere Jesús Xaꞌ Nyebeꞌ kon reta men nayon chanꞌ Xaꞌ.