1 Na Pab, nak na apóst chanꞌ Jesucrist jwanꞌ xa ncholaꞌs Dios, rop náꞌ wes Timoteo ni náꞌ dyux lo re goꞌ ta nak yodoꞌ chanꞌ Dios nzi yez Corint,*1:1 He. 18:1. nde dyux lo re goꞌ jwanꞌ nak yez nayon chanꞌ Dios nzi lo xyon Akaya. 2 Pkayaꞌ goꞌ yalwen nde yalnabeꞌz chanꞌ Xud naꞌ Dios nde chanꞌ Jesucrist Xaꞌ Nyebeꞌ.

3 Nayon nak Dios, Xud Jesucrist Xaꞌ Nyebeꞌ lonꞌ, Xud na' ta ndlat lazoꞌ Xa' na' nde Dios ta thiblaꞌ ngone Xaꞌ lazon'. 4 Xaꞌ jwan' ngone lazo' ná' lo reta yalti ndriꞌd náꞌ, sa nogaꞌ náꞌ toyal kone náꞌ lazoꞌ re men jwanꞌ ndyak yalti, ta xa ngone Dios lazo' náꞌ, tagaꞌ kone náꞌ lazoꞌ re men. 5 Tak ta xa ndoro re yalti jwanꞌ ndri'd náꞌ lo ndej ná' xki's Jesucrist, tagaꞌ ndoro ngone Crist lazo' náꞌ. 6 Mbay tez ndriꞌd náꞌ yalti, ndriꞌd náꞌy sa yone lazoꞌ goꞌ nde lyaꞌ goꞌ; mbay tez ngone Dios lazoꞌ náꞌ, jwanꞌna ndli nchone lazoꞌ goꞌ nde lyaꞌ goꞌ, tamod sa xek goꞌ rid goꞌ leꞌga re yalti jwanꞌ ndriꞌd náꞌ. 7 Ndob toz xgab ná' kon go', tak mne náꞌ, ta xa thita yalti ntori'dnda'b ná' taga' thita kone Dios lazoꞌ go'.

8 Wes na, ptan na, ncholas na nye goꞌ re yalti toz jwanꞌ mbriꞌd náꞌ lo xyon Asia;†1:8 1 Co. 15:32. tak ne toz tir mxaknono náꞌy, jwanꞌ naꞌlitra náꞌ gan xek náꞌ lo neꞌy, nde axta mbli náꞌ xgab rop di's lya' náꞌ tya. 9 Per le'ga ná' mxak nakwentla gaj ná', per ta sa teꞌd náꞌ, leꞌta náꞌ ngen kwan ak li ná', cheꞌla nakinꞌ tob xgab náꞌ lo Dios, Xaꞌ ta ngoꞌxban re men nguj. 10 Xaꞌ ya mtolaꞌ náꞌ nde ntolaꞌ Xaꞌ náꞌ nde ngembed náꞌ taga' tolaꞌ Xaꞌ náꞌ lo yalnathoz toz, 11 thibka pta' ya' go' lo ná' mnaꞌb goꞌ lo Dios por náꞌ. Tez bro toz men nyaꞌb lo Dios por náꞌ, tagaꞌ bro men taꞌ dyux lo Dios por reta yalwen jwanꞌ ndaꞌla's Dios lo náꞌ.

12 Tak jwanꞌ reꞌ ngonale lazo' náꞌ: leꞌga xgab náꞌ ndeja nambi ngete ná', kon yalnado' nde jwan' lí chan' Dios, na'nakte yalnchak chanꞌ ná', cheꞌla kon yalwen chan' Dios, ngete ná' xij re men, nde xij go' jwan' mas ngete ná'. 13 Re ye's jwan' mke' ná' lo go', na'mket náꞌ di's nagn che'la mke' ná' re jwan' toyal lab goꞌ nde yen goꞌy. Nde ngembed na yoloba jwin yen goꞌy, 14 ta xa noga ndoyenla goꞌ lud ke náꞌ nak yalnaro chan' go', nde taga' nak go' par ná', senꞌ tsin wiz yeꞌd Jesucrist Xaꞌ Nyebeꞌ lonꞌ.

15 Xgab reꞌ ndonon ndablas na nerla goꞌ yatwiꞌn, sa keno go' yalwen chan' Dios tedib gob; 16 mblin xgab nerla riꞌdndaꞌb na winꞌ goꞌ lo ndan lo xyon Macedonia‡1:16 He. 19:21. nde lo senꞌ beren zya riꞌd na winꞌ goꞌ tedib gob, sa koned go' na ndan lo xyon Judea. 17 Senꞌ mblin xgab jwanꞌ reꞌ, ¿Cho ndyak goꞌ nayen toz mblin xgaba? ¿Cho ndyak goꞌ re jwanꞌ ta ndlin xgab lin, benꞌ xgab naka, sa naya mbez na li ney nde yeꞌ naꞌlit nay? 18 Dios galꞌ nak Xaꞌ nde ndowi' Xa', jwanꞌ ta mbez náꞌ lo goꞌ, naꞌnakte naya gab náꞌ, li náꞌy nde napa naꞌlit náꞌy. 19 Tak Jesucrist Xinꞌ Dios, Xaꞌ ta ndej Silvan, Timoteo nde na,§1:19 He. 18:5. naꞌnchak ropta xgab Xaꞌ, cho tli Xaꞌy o naꞌlit Xay, cheꞌla lí reta jwanꞌ ndej Xaꞌ. 20 Tak reta jwanꞌ ta mkeꞌyek Dios por Jesucrist nchaka, jwanꞌ nasa senꞌ lo ndanꞌ dyux lo Dios, mbez naꞌ “Ta aka” ndli naron' Dios por Jesucrist. 21 Le' Xa' ta ndli sa galꞌ ndonꞌ lo Crist nde Xaꞌ ta mbli yon na', Xa' ya nak Dios. 22 Nde noga mdob be' Xaꞌ naꞌ, nde mda' Xa' Mbi Nayon len' lazon' jwan'na ndlo' jwan' kayan'.

23 Le' na ntob Dios sa Xa' ndowi' jwan' ndlin, tak lo nke'lazo'n go' jwan' nasa na'nkatwit na go' yez corint. 24 Naꞌnyebe'd náꞌ lo jwanꞌ ndlipa lazoꞌ goꞌ, che'la laꞌsto náꞌ goꞌ sa masraꞌ yo nale lazoꞌ goꞌ, tak gal' ndo goꞌ lo jwanꞌ ndli lazoꞌ goꞌ.