1 Jwanꞌna ndli sa mtolin xgab na, naꞌyatwiꞌtra na goꞌ sa naꞌkonabilta na lazoꞌ goꞌ. 2 Tak tez na ndli ncho nabil lazoꞌ goꞌ, ¿cho konale lazoꞌn? Goꞌ ta mblo nabil na lazo' na'y. 3 Jwanꞌ nasa tamod mkeꞌn yeꞌs lo goꞌ, tak naꞌncholasta na senꞌ yatwiꞌn goꞌ benꞌ konabil goꞌ lazoꞌn, tak go' jwan' ndablo konale lazoꞌn. Nde mnepa na senꞌ nale nzo lazoꞌn, noga goꞌ, nale nzo lazoꞌ goꞌ. 4 Tak lo yalti toz jwan' ndyak na nde nabil toz nzo lazoꞌn axta nchon' na mke'n yeꞌs re' lo goꞌ, na'nakte par konabil na lazo' go', cheꞌla sa nye goꞌ plopa nkeꞌ lazoꞌn goꞌ.

5 Tez nzo xanya xaꞌ mblo nabil lazoꞌn, naꞌnakte benꞌta lazoꞌn mblo nabil xaꞌ, tagaꞌ mblo nabil xaꞌ lazo' reta goꞌ, “nakte jwan' ambez na” tak naꞌncholasta na li naron jwanꞌ reꞌ. 6 Per leꞌley jwan' ta mkox go' xaꞌ ba. 7 Jwanꞌ nasa, cheꞌla ndablo ptoriꞌd go' yek goꞌ re jwanꞌ narax mbli xaꞌ nde blone go' lazoꞌ xaꞌ, tak yoloba naxlux xaꞌ lo yalnabil. 8 Jwanꞌ nasa nyaꞌb na lo goꞌ bere pkeꞌ lazoꞌ goꞌ xaꞌ tedib gob. 9 Tak jwanꞌ re'ga sa mke'n ye's lo goꞌ neraꞌ, sa libeꞌn goꞌ nyenꞌ cho liga nxobyek goꞌ lo reta jwanꞌ nyebe'n lo goꞌ. 10 Leꞌ xaꞌ jwanꞌ mtoriꞌd goꞌ yek goꞌ jwan' narax mbli xa', noga na mtoriꞌd nay yek na. Tez nzo thi jwan' ndablo tori'd na yek na, ndliney por yalwen lo go' nde ndowi' Crist. 11 Sa tamod naꞌlid maxuꞌ gan lon', tak mnela na' xa nak xgab maxuꞌ.

12 Senꞌ mzin na yez Troas sa tej na diꞌs wen chanꞌ Jesucrist, tenyega ngo mod sa lin rsin' Xaꞌ Nyebeꞌ, 13 nawenta nzo lazo'n tak naꞌnzalꞌta na wes Tito. Jwanꞌ nasa nchab na lo re men nzi tya, ndyan, nde ndan lo xyon Macedon.*2:13 He. 20:1.

14 Dyuxkix Dios, tak Dios ndli sa thibla ndli naꞌ gan kon Crist Jesús, nde ndlirsinꞌ Xaꞌ naꞌ sa ncha's naꞌ xkiꞌs Xaꞌ reta ten' nda na' ta xa ndrya's bes nit naxe' ba. 15 Tak xaja nak bes naxeꞌ jwan' nda' Crist lo Dios ta nak na' lo Dios, nde bes ya ndya's xij re men lyaꞌ nde xij re men naꞌlyaꞌda. 16 Leꞌ lo re men jwanꞌ naꞌlyaꞌda, yalguj nak beza lo xaꞌ, leꞌ lo re men jwanꞌ lyaꞌ, yalnaban nak bez lo men. Nde reta jwanꞌ reꞌ ¿cho mte'dla li jwan' re'? 17 Tak naꞌndlit náꞌ xa ndli tedib ned xaꞌ jwanꞌ ntho xkiꞌs Dios, cheꞌla dib nzo lazoꞌ náꞌ ndej náꞌ xkiꞌs Xaꞌ xajka men jwanꞌ mtel' Dios, nde ndowiꞌ Dios, ndej náꞌ xkiꞌs Jesucrist lo re men.