1 Senꞌ ngolo jwanꞌ reꞌ ya, Jesus mbroꞌ nda tedib lad ro nit chanꞌ Galilea, jwanꞌ ndolegaꞌ re nit chanꞌ Tiberias. 2 Nde men toz tir mdonke xis Jesus, tak ngwiꞌ xaꞌ re yalnaro jwanꞌ ndli Jesus lo re men nayiz. 3 Zyasa ngwap Jesus tib yek yiꞌ nde mdob Xaꞌ tya kon re xinꞌ teꞌd Xaꞌ. 4 Nde ndeyenla nde Pask, ni chanꞌ re xaꞌ judí. 5 Senꞌ mblit Jesus lo Jesus, mbwiꞌ Jesus men toz tir nde lo Xaꞌ, zyasa nchab Jesus lo Blib:

—¿Plo yakanꞌ jwanꞌ wa reta men reꞌ?

6 Per ta nchab Jesus lo xa' sa li be' Jesus xa', tak mnea Jesus cho kwan li Jesus. 7 Leꞌ Blib mkab lo Jesus:

—Tmi jwanꞌ nzinaꞌ men ti chop ayoꞌ wiz*6:7 Thib denario tmi plat ndli xaꞌ gan ti wiz, ndeja chop ayoꞌ denario, tagaꞌ chop ayoꞌ wiz ke tib xaꞌ sinꞌ. naꞌgalta tmi ya tyuꞌ jwanꞌ wa re men reꞌ, tenye nchep nchepay dinꞌ thiba xaꞌ.

8 Leꞌ ti xinꞌ teꞌd Jesus ndole Ndrés wes Simón Pedr, nchab:

9 —Ncheꞌ ndo ti mbyo, ngeno gayꞌ pan sebad nde chop mbel; ¿xa gal jwanꞌ reꞌ wa labaja men?

10 Zyasa nchab Jesus lo xaꞌ:

—Gus goꞌ lo reta men sa tyob xaꞌ.

Tak tya jwan' toz nzo yix naye, nde mer nye ti gayꞌ mil men biꞌ jwanꞌ mdob. 11 Zyasa mxen Jesus re pan ya, nde senꞌ ngolo mdaꞌ Jesus dyux lo Dios, mdaꞌ Xaꞌy lo re xinꞌ teꞌd Xaꞌ, nde leꞌ xinꞌ teꞌd Xaꞌ mdiꞌda lo reta men nzi tya; tagaꞌ mod mdiꞌd Xaꞌ mbel, nde mda re xaꞌ axta kebeꞌ mze xaꞌ. 12 Senꞌ ngolo mze reta men, zyasa nchab Jesus lo re xinꞌ teꞌd Jesus:

—Bthop goꞌ reta jwanꞌ ta mbroxoꞌba, sa nekluda naꞌaktida.

13 Nde lo re gayꞌ pan sebad, mze tibsen chokwid ngo re pedas bix pan jwanꞌ mbroꞌxoꞌb mthop xaꞌ, lo jwanꞌ ta mda reta men. 14 Senꞌ lo mbwiꞌ re men yalnaro jwanꞌ mbli Jesus, nchab xaꞌ:

—Liga Xaꞌ reꞌ nakpa profet, Xaꞌ ta nakla diꞌs yeꞌd lo izyo.

15 Leꞌ Jesus mbyénla Xaꞌ, leꞌ reta men ya ncholaꞌs xaꞌ we xaꞌ Jesus sa ak Jesus rey lo xaꞌ, jwanꞌ nasa mbere Jesus nde thib Jesus nda yek ti kox ro.

16 Senꞌ ndela yalꞌ, re xaꞌ nak xinꞌ teꞌd Jesus mdola xa' mzin xaꞌ ro nittoꞌ, 17 ngwap xaꞌ lo ti bark nde nda xaꞌ lo nit sa sin xaꞌ yez Capernaum. Senꞌ mkowla izyo, teraꞌ sin Jesus tenꞌ nda re xinꞌ teꞌd Xaꞌ. 18 Nde jwanꞌ toz ngwap bde tak mbi toz mxyo'b lo nittoꞌ. 19 Senꞌ ndatela xaꞌ gayꞌ mil metr o xop mil metr lo nit, zya mbwiꞌ xaꞌ leꞌ Jesus ndeni lo nittoꞌ nde ndobike gax Jesus tenꞌ nda bark, zya mzyeb toz re xaꞌ nak xinꞌ teꞌd Xaꞌ. 20 Leꞌ Jesus nchab lo xaꞌ:

—¡Nay, naꞌzyepta goꞌ!

21 Zyasa nale ngo lazoꞌ re xaꞌ senꞌ ngwap Jesus lo bark, nde naban mzin re xaꞌ tenꞌ nda xaꞌ.

22 Senꞌ tedib wiz, re men jwanꞌ mbyanꞌ tedib lad ro nittoꞌ mne xaꞌ thipta bark jwanꞌ mdob ro nit, nde Jesus naꞌngwapta Xaꞌ lo bark ya kon re xinꞌ teꞌd Xaꞌ, leꞌta re xinꞌ teꞌd Jesus nda. 23 Xisla zyaraꞌ mzin ti pla bark jwanꞌ mbroꞌ yez Tiberias, mzina gax tenꞌ ta mdaꞌ Jesus dyux lo Dios nde mda re men pan. 24 Senꞌ mne re mena naꞌngenta Jesus tya, neka re xinꞌ teꞌd Jesus naꞌngenta, zyasa reta xaꞌ ngwap lo bark ta mzina nde nda xaꞌ yez Capernaum, nda kwanꞌ xaꞌ Jesus.

25 Senꞌ mzin reta xaꞌ tedib lad ro nittoꞌ, tya ngosi'b xaꞌ Jesus nde nchab xaꞌ lo Jesus:

—Maestr, ¿Pol mzin la ncheꞌ?

26 Leꞌ Jesus nchab lo xaꞌ:

—Nipa na lo goꞌ, nangetekwanꞌta goꞌ na tak mbyen goꞌ re yalnaro mblin, leꞌ goꞌ ngetekwanꞌ na tak mda goꞌ pan nde mze lenꞌ goꞌ. 27 Naꞌkwaꞌnta goꞌ jwanꞌ ta ncha men nde ndluxa, leꞌ goꞌ pkwan jwanꞌ naꞌndluxta nde jwanꞌ ndaꞌ yalnaban adiꞌ lo goꞌ. Jwanꞌ reꞌ jwanꞌ ta ndaꞌ Xinꞌ Mbiꞌ mbyeꞌd lo izyo lo goꞌ, tak yalnyebeꞌ reꞌ mdaꞌ Xud na Dios lon.

28 Zyasa nchab re xaꞌ lo Jesus:

—¿Cho kwan ndablo li náꞌ sa tyobte ak rsinꞌ Dios?

29 Mkab Jesus nde nchab lo xaꞌ:

—Jwanꞌ reꞌ nak rsinꞌ Dios, ndablo li lazoꞌ goꞌ Xaꞌ jwanꞌ mtelꞌ Dios. 30 Zyasa nchab re xaꞌ lo Jesus:

—¿Cho yalnaro loꞌa lo náꞌ, sa wiꞌ náꞌy, nde li lazoꞌ náꞌ lu? ¿Cho kwan lia? 31 Re men gox lo naꞌ ngo pola mda xa' maná senꞌ ndo xaꞌ izyo bis,†6:31 Ex. 16:4, 15. jwanꞌ xa chabka lo xkiꞌs Dios: “Lo be' mbroꞌ pan mdaꞌ Dios mda reta men.”‡6:31 Sal. 78:24.

32 Leꞌ Jesus nchab lo xaꞌ:

—Gal' di's nipa na lo goꞌ: Naꞌnakta Moisés jwanꞌ mdaꞌ pan mbroꞌ lo beꞌ mda re xaꞌ, Xud na jwanꞌ ndaꞌ leꞌpa pan ndryoꞌ lo beꞌ. 33 Tak pan jwanꞌ ndaꞌ Dios, nak Xaꞌ jwanꞌ mbroꞌ lo beꞌ, nde ndaꞌ Xaꞌ yalnaban lo re men lo izyo.

34 Zya nchab re xaꞌ lo Jesus:

—Xaꞌ Nyebeꞌ, thiblaꞌ ptaꞌ pan reꞌ wa náꞌ.

35 Jesus nchab lo xaꞌ:

—Na nak pan ndaꞌ yalnaban; nde men jwanꞌ nde lon, nek lud naꞌlyaꞌntra xaꞌ; nde men jwanꞌ li lazonꞌ na, nek lud naꞌyektraꞌ lazoꞌ xaꞌ. 36 Xa niga na lo goꞌ, teꞌnyega ngwiꞌ goꞌ na, naꞌlid lazoꞌ goꞌ na. 37 Reta men jwanꞌ ndaꞌ Xud na lon, nde xaꞌ lon, nde re xaꞌ jwanꞌ nde lon, naꞌgotet na xaꞌ le. 38 Tak nambroꞌt na lo be' sa lin jwanꞌ ncholas na, leꞌn ndal sa lin jwanꞌ ncholaꞌs Xaꞌ jwanꞌ mtelꞌ na. 39 Nde jwanꞌ reꞌ nak jwanꞌ nchola's Xud na, Xaꞌ jwanꞌ mtelꞌ na; leꞌ reta men jwanꞌ mdaꞌ Xaꞌ lon, naꞌtabta na nek tib xaꞌ, cheꞌla goꞌxban na re men ya senꞌ yoxo'b wiz blus. 40 Nde jwanꞌ reꞌ nchola's Xaꞌ jwanꞌ mtelꞌ na; leꞌ reta men jwanꞌ wiꞌ Xinꞌ Dios, nde li lazoꞌ men Xaꞌ, men ya keno yalnaban adiꞌ nde goꞌxban na xaꞌ senꞌ yoxoꞌb wiz blus.

41 Zyasa re xaꞌ judí mdobte mbloxyo xaꞌ Jesus, tak nchab Jesus: “Na nak pan mbroꞌ lo beꞌ.” 42 Jwanꞌ nasa nchab re xaꞌ:

—¿Cho naꞌnakta Xaꞌ reꞌ nak Jesus xinꞌ José, nzolonꞌ xud xaꞌ nde xnaꞌ xaꞌ? ¿Xomod sa mbez Xaꞌ: "Lo beꞌ mbroꞌn"?

43 Jesus mkab nde nchab Jesus lo xaꞌ:

—Naꞌkoxyotra goꞌ na xij goꞌ. 44 Nek thib men naꞌlida gan yeꞌd lon, tez Xud na Xaꞌ mtelꞌ na naꞌyednod Xaꞌ men lon; nde na goꞌxban men senꞌ yoxoꞌb wiz blus. 45 Lo yeꞌs jwanꞌ mkeꞌ re profet, nchaba: "Tatu wiz toteꞌd Dios reta men."§6:45 Is. 54:13. Jwanꞌ nasa, reta men jwanꞌ nchon xkiꞌs Xud na nde mteꞌd xaꞌ lo Xud na, men ya nde lon.

46 ’Naꞌngenta nek thib men jwanꞌ mbwiꞌla Xud na, benꞌta Xaꞌ jwanꞌ mbroꞌ tenꞌ ndob Dios, Xaꞌ ya mbwiꞌ Xud na. 47 Gal' di's nipa na lo goꞌ: Xaꞌ jwanꞌ li lazonꞌ na, xaꞌ ya ngeno yalnaban adiꞌ. 48 Na nak pan ndaꞌ yalnaban. 49 Re xaꞌ gox lo goꞌ jwanꞌ mbre pola, tenye mda xaꞌ maná senꞌ nzi xaꞌ izyo biz, nde ngujka xaꞌ. 50 Leꞌ na ndej pan mbroꞌ lo beꞌ, nde xaꞌ jwanꞌ wa pan reꞌ, naꞌgajta xaꞌ. 51 Na nak pan naban, jwanꞌ mbroꞌ lo beꞌ; tez nzo men wa pan reꞌ, thiptane ban xaꞌ. Leꞌ pan jwanꞌ tan naka belꞌ na, taꞌyaney sa keno men yalnaban.

52 Zyasa re xaꞌ judí mkodi's xa', nchab xaꞌ lo ta xa':

—¿Xomod sa belꞌ mbiꞌ reꞌ taꞌ mbiꞌ wanꞌ?

53 Jesus nchab lo xaꞌ:

—Gal' di's nipa na lo goꞌ, tez nawad goꞌ belꞌ Xinꞌ Mbiꞌ mbyeꞌd lo izyo, nde nagud goꞌ ren Xaꞌ, naꞌkenod goꞌ yalnaban. 54 Leꞌ men jwanꞌ wa belꞌ na nde gu xaꞌ ren na, xaꞌ ya keno yalnaban adiꞌ, nde na goꞌxban xaꞌ senꞌ yoxo'b wiz blus. 55 Tak belꞌ na nak jwanꞌ wapa men nde ren na nak jwanꞌ gupa men. 56 Xaꞌ jwanꞌ ncha belꞌ na nde nchuꞌ xaꞌ ren na, xaꞌ ya thiblaꞌ ndono na, nde na ndono xaꞌ. 57 Leꞌ Xud na, Xaꞌ jwanꞌ mtelꞌ na, naban Xaꞌ nde benꞌta Xaꞌ sa naban na, nde taga' men jwanꞌ wa belꞌ na, benꞌta na sa ban xaꞌ. 58 Pan reꞌ mbroꞌ lo beꞌ, men wa pan reꞌ keno xaꞌ yalnaban adiꞌ, nakte xa nak mana jwanꞌ mda re xaꞌ gox lo go' jwan' mbre pola, nde ngujka xaꞌ.

59 Reta jwanꞌ reꞌ nchab Jesus, mdoteꞌd Xaꞌ re men lenꞌ yo tenꞌ ndyop re xaꞌ Israel lenꞌ yez Capernaum.

60 Naꞌr toz re xinꞌ teꞌd Jesus mbin xaꞌ jwanꞌ reꞌ nde nchab xaꞌ:

—Nagan nak diꞌs reꞌ ¿Cho li gan yena?

61 Zyasa mne Jesus leꞌ re xaꞌ nak xinꞌ teꞌd Jesus nzi goxyo xaꞌ diꞌs jwanꞌ ta mdej Jesus, zyasa nchab Jesus lo xaꞌ:

—¿Cho ngwa'd go' xkiꞌs na? 62 ¿Xomodka li goꞌ tez wiꞌ goꞌ Xinꞌ Mbiꞌ mbyeꞌd lo izyo yap Xaꞌ tenꞌ nzoga Xaꞌ? 63 Xbi jwanꞌna ndaꞌ yalnaban, leꞌ belꞌ ngen cho sinꞌ liy, nde re diꞌs jwanꞌ ndyodiꞌs na Xbi naka nde ndaꞌy yalnaban. 64 Per nzo pla goꞌ xija naꞌndlid lazoꞌ goꞌy.

Tak axta xanꞌ naꞌy, mnela Jesus xanya men naꞌlid lazonꞌ Xaꞌ, nde cho xa' ta tayaꞌ Jesus. 65 Nde nchab Jesus:

—Jwanꞌ nasa mbez na lo goꞌ, nek thib men naꞌlida gan yeꞌd lon, tez Xud na nataꞌda diꞌs.

66 Xata zya, bro toz re xaꞌ nak xinꞌ teꞌd Jesus mbere xaꞌ xis, naꞌngetenketra' xaꞌ xis Jesus. 67 Zyasa nchab Jesus lo re thib sen xinꞌ teꞌd Xaꞌ:

—¿Cho no goꞌ nchola's ndya?

68 Leꞌ Simón Pedr mkab:

—Xaꞌ Nyebeꞌ, ¿Cho lo ya náꞌ? Nde lu nkeno diꞌs nda' yalnaban adiꞌ. 69 Nde náꞌ, mbli lazoꞌ náꞌ lu nde mne náꞌ leꞌ lu nak Crist, Xinꞌ Dios naban.*6:69 Mt. 16:16; Mr. 8:29; Lc. 9:20.

70 Jesus nchab lo xaꞌ:

—¿Cho naꞌnakta na jwanꞌ mbli re thib sen goꞌ nde thib goꞌ nzo xija nak maxuꞌ?

71 Leꞌ Jesus ndej Judas Iscariot, xinꞌ Simón; tak xaꞌ ya tayaꞌ Jesus, nde no xaꞌ nzo xij re tib sen xinꞌ teꞌd Jesus.