1 Senꞌ mbridla reta jwanꞌ reꞌ, Jesus ngete lo xyon Galilea; nde naꞌncholasta Xaꞌ kete Xaꞌ lo xyon Judea, tak tya re xaꞌ judí ncholaꞌs xaꞌ kuj xaꞌ Jesus. 2 Ndosin gaxla ni chanꞌ re xaꞌ judí jwanꞌ ntaꞌb xaꞌ ramad,*7:2 Jwanꞌ reꞌ nak sa ntelaꞌs xaꞌ xamod mdo re xaꞌ gox ned pola kon Moisés. 3 leꞌ re wes Jesus nchab lo Jesus:

—Broꞌte ncheꞌ nde gwa lo xyon Judea, sa wiꞌ re xinꞌ teꞌd la re yalnaro jwanꞌ ndlia. 4 Tak nek thib xaꞌ ta ncholaꞌs yolo men xa', naꞌndlinagaꞌsta xa' re jwan'. Leꞌa ta ndlila re jwan' re', wa liy xij reta men.

5 Ta nekla re wes Jesus nandlid lazoꞌ xaꞌ Jesus. 6 Zyasa nchab Jesus lo xaꞌ:

—Teraꞌ yoxoꞌb beꞌ li nay, leꞌ goꞌ one choja beꞌ li goꞌy. 7 Re men lo izyo re' naꞌyiꞌnoda xaꞌ goꞌ, leꞌ na, ngiꞌno xaꞌ na, tak leꞌn ndej narax nak re jwanꞌ ndli xaꞌ. 8 Wa goꞌ lo ni, na'yat na tak teraꞌ yoxoꞌb wiz na.

9 Senꞌ lo ta nchab Jesus, mbyanꞌ Jesus yez Galilea.

10 Senꞌ ndyala re wes Jesus lo ni, zyasa no Jesus ndya, per nalasta nkete Xaꞌ sa nawi'da men Xa'. 11 Nde re xaꞌ judí mkwanꞌ xaꞌ Jesus lo ni, nchab xaꞌ:

—¿Ma Xaꞌ ya?

12 Nde nyaga ndyodiꞌs re xaꞌ xis Jesus tya, nzo xaꞌ nchab: “Wen nak Xaꞌ”; Nde nzo xaꞌ nchab: “Nakta xaꞌ men wen; benꞌta ngetekwinꞌno Xaꞌ re ma yez”

13 Reta men nagaꞌsta ndej xaꞌ kwent chanꞌ Jesus, tak nzyeb men re xaꞌ judí.

14 Senꞌ ndala rolja ni, Jesus ngoxo'b tenꞌ ndob yodoꞌ †7:14 lo le cho yodoꞌ.,nde tolo mdobte mtoteꞌd Xaꞌ re men. 15 Leꞌ re xaꞌ judí nzoyen xaꞌ, nchab xaꞌ:

—¿Xomod taja nchak mbi reꞌ, nde namteꞌdta Xaꞌ?

16 Leꞌ Jesus mkab:

—Jwanꞌ ta ndloꞌn reꞌ naꞌnaktey chanꞌ na, leꞌy nak chanꞌ Xaꞌ jwanꞌ mtelꞌ na. 17 Men ndyen li jwanꞌ nchola's Dios, men ya yolo nyenꞌ cho chanꞌ Dios ndloꞌn o jwanꞌ nak xgab na ndloꞌn. 18 Men ndyodiꞌs jwanꞌ nak leꞌga xgab men, yalnaro chanꞌ xaꞌ nkwanꞌ xaꞌ; leꞌ Xaꞌ jwanꞌ nkwanꞌ yalnaro chanꞌ Xaꞌ jwanꞌ mtelꞌ Xaꞌ, Xaꞌ ya ndej jwanꞌ li nde naꞌndejta Xaꞌ yalkwinꞌ.

19 ’¿Cho naꞌmdayaꞌda Moisés ley lo goꞌ nde nek thib goꞌ naꞌnxobyekta ley. ¿Cho kwan liy sa ncholaꞌs goꞌ kuj goꞌ na?

20 Leꞌ reta men mkab nde nchab xaꞌ lo Jesus:

—¡Xbin maxuꞌ nzoa, ¿Cho ncholaꞌs kuj la?

21 Jesus mkab lo xaꞌ:

—Len wiz ndryoꞌxkwen men mblin thi yalnaro, jwanꞌna taja nzoyen goꞌ. 22 Mbay liga, Moisés mnabeꞌ tyob be' lad men biꞌ ba‡7:22 Lv. 12:3. (tenye naꞌnakte jwanꞌ mnabeꞌ Moisés, naka jwanꞌ mtanꞌ re xaꞌ gox mbre pola).§7:22 Gn. 17:10. sa leꞌ goꞌ lenꞌ wiꞌz ndryoꞌxkwen men ntob go' be' lad men biꞌ ba. 23 Nde sa naꞌyaꞌnta goꞌ narax lo ley ndyak goꞌ, ntob goꞌ be' lad or biꞌ lenꞌ wiz ndryoꞌxkwen men, ¿Kwanka liy sa nayiꞌ goꞌ lon lo thiptane mtodan' na ti mbiꞌ lenꞌ wiz jwanꞌ ndryoxkwen men?*7:23 Jn. 5:9. 24 Naꞌkoxyod goꞌ jwanꞌ nzoꞌb xis ta ngwiꞌ goꞌ. Bloxyo goꞌ, per bli goꞌy xa nakpaꞌy.

25 Zyasa pla xaꞌ yez Jerusalén nchab xaꞌ lo ta xaꞌ:

¿Cho naꞌnakta mbiꞌ reꞌ ta nkwanꞌ xaꞌ kuj xaꞌ ya? 26 Bwiꞌ goꞌ, galꞌ ndoni Xaꞌ lo reta men, nde ngenta kwan mbez men lo Xaꞌ. ¿O mbli lazo' re xaꞌ nak sinꞌ, liga Xaꞌ reꞌ nak Crist? 27 Per nzolonꞌ Xaꞌ reꞌ, mnenꞌ plo nde Xaꞌ, nde senꞌ lo yeꞌd Crist, ngenta cho men nye plo ryoꞌ Xaꞌ.

28 Leꞌ Jesus nkeloꞌ xkiꞌs Dios lo re men tenꞌ ndob yodoꞌ, nde ne mbrez Jesus nchab Xaꞌ:

—¡Nzolo goꞌ na nde mne goꞌ plo ndal na! nde naꞌndalta na por kwent chanꞌ na, Xaꞌ jwanꞌ mtelꞌ na galꞌ nak Xaꞌ, nde naꞌnzolod goꞌ Xaꞌ. 29 Leꞌ na, nzolon Xaꞌ, tak lo Xaꞌ mbroꞌn, nde Xaꞌ mtelꞌ na.

30 Zyasa nchola's re xaꞌ tyen xaꞌ Jesus; per nek thib xaꞌ naꞌngoꞌda yanꞌ tak teraꞌ sin hor chanꞌ Jesus. 31 Nde bro toz men jwanꞌ nzi tya mbli lazoꞌ xaꞌ Jesus, nde nchab xaꞌ:

—Senꞌ yeꞌd Crist, ¿Chon mas bro yalnaro li Xaꞌ ya ke lo Xaꞌ reꞌ?

32 Senꞌ mbin re xaꞌ fariseo jwanꞌ ndyodiꞌs re men xis Jesus, zyasa thita ngok xaꞌ kon re ngwleyꞌ jwanꞌ nyebeꞌ sa mtelꞌ xaꞌ re xaꞌ nkenap yodoꞌ sa yaxen xaꞌ Jesus. 33 Zyasa nchab Jesus:

—Tud benꞌ ndonon goꞌ, tak leꞌn bere lo Xaꞌ jwanꞌ mtelꞌ na. 34 Kwanꞌ goꞌ na, nde naꞌzyalta goꞌ na; nde tenꞌ ton, naꞌlid goꞌ gan sin goꞌ tya.

35 Leꞌ re xaꞌ judí nchab xaꞌ lo ta xaꞌ:

—¿Plo ya Xaꞌ, sa naꞌyasalta naꞌ Xaꞌ? ¿Cho nyea nda Xaꞌ lo re men Israel jwanꞌ ngete xij re xaꞌ grieg, sa ndatoteꞌd Xaꞌ re men grieg†7:35 Xaꞌ grieg nak re xaꞌ jwanꞌ naꞌnakta judí.? 36 ¿Xomod nak diꞌs ta mbez Xaꞌ: “Kwanꞌ goꞌ na, nde naꞌzyalta goꞌ na, nde tenꞌ ton, naꞌlid goꞌ gan sin goꞌ tya”?

37 Lenꞌ wiz ro senꞌ yoto ni,‡7:37 Lv. 23:36. mdoli Jesus nde ne mbrez Xaꞌ, nchab Xaꞌ:

—Tez cho goꞌ nchek lazonꞌ, deꞌ goꞌ lon sa gu goꞌ nit. 38 Men jwanꞌ ndli lazonꞌ na, xa nchabka lo xkiꞌs Dios: "Lenꞌ lazoꞌ xaꞌ siꞌblen re yo' nda' nit naban".§7:38 Ez. 47:1; Zac. 14:8.

39 Jesus ndej Mbi Nayon jwanꞌ kayaꞌ re men li lazonꞌ Xaꞌ, leꞌ zya tera yeꞌd Mbi Nayon, tak benꞌ ngete Jesus lo izyo.

40 Leꞌ pla xaꞌ jwanꞌ nzo xij men toza, senꞌ mbin xaꞌ xkiꞌs Jesus, nchab xaꞌ:

—Xaꞌ reꞌ liga nak ti Xaꞌ ni Dios lonꞌ sa tej Xaꞌy lo men.

41 Leꞌ ti pla xaꞌ nchab:

—Xaꞌ reꞌ nak Crist.

Per nzo xaꞌ nchab:

—¿Cho lo xyon Galilea ryo' Crist? 42 ¿Cho naꞌnchabta lo xkiꞌs Dios, lo bin David nde yez Belén*7:42 Mi. 5:2. plo tenꞌ ngol David tya ndablo ryoꞌ Xaꞌ nak Crist?

43 Zyasa ngok rol men por diꞌs jwanꞌ nchab Jesus. 44 Nzo xaꞌ xija ncholaꞌs nden xaꞌ Jesus per nek thib xaꞌ naꞌngoꞌda yanꞌ lad Jesus.

45 Senꞌ lo mbere re xaꞌ ta ngenap yodoꞌ mzin xaꞌ lo re ngwleyꞌ ro nde lo re xaꞌ fariseo; leꞌ re ngwleyꞌ ro nde re xaꞌ fariseo mnabdiꞌs xaꞌ lo re xaꞌ ta ngenap yodoꞌya, nchab xaꞌ:

—¿Cho kwan liy sa naꞌngyednod goꞌ Xaꞌ?

46 Leꞌ re xaꞌ jwanꞌ nkenap yodoꞌ, nchab:

—¡Ngen cho ti mena tera' todiꞌs xa ndyodiꞌs mbiꞌ ya!

47 Zyasa nchab re xaꞌ fariseo lo xaꞌ:

—¿Cho noga' yek goꞌ mtokan Xaꞌ? 48 Cho naꞌnyed goꞌ nek thib xaꞌ nak sinꞌ nde nek thib xaꞌ fariseo naꞌndlid lazoꞌ xaꞌ mbiꞌ ya. 49 ¡Leꞌ re men ta naꞌnyeda cho kwan nchab ley, xa' de xaꞌ!

50 Zyasa mkab Nicodem, xaꞌ ta ngwa todiꞌsno Jesus thi yalꞌla,†7:50 Jn. 3:1-2. tak no xaꞌ nak fariseo, sa nchab xaꞌ:

51 —¿Cho ngeni ley naꞌ, toyal koxyonꞌ ti mbiꞌ tez teraꞌ gon naꞌ xkiꞌs Xaꞌ nde nekla nyeꞌn cho kwan mbli Xaꞌ?

52 Zyasa mkab re xaꞌ lo Nikodem, nchab xaꞌ:

—¿Cho no lu nak men yez Galilea? Pteꞌd yeꞌs nge xkiꞌs Dios, sa nyea nek thib profet, naꞌndryoꞌd xaꞌ yez Galilea.

53 Zyasa thiba xaꞌ ngo ned ndya xaꞌ liz xaꞌ.