1 Leꞌ Jesus mxen ned nda yiꞌ Olib. 2 Senꞌ mduxni tedib wiz, mbere Jesus tenꞌ ndob yodoꞌ tedib gob nde reta men yez mbyeꞌd lo Jesus, zyasa mdob Jesus nde mbloꞌ Jesus xkiꞌs Dios lo men. 3 Xija re xaꞌ nak maestr ndloꞌ ley xkiꞌs Dios nde re xaꞌ fariseo ndeno xaꞌ ti ngol ngoga naxno ngol ti mbiꞌ naꞌnakta salꞌ ngol; sa mto xaꞌ ngol xtowꞌ reta men nzi tya, 4 nde nchab xaꞌ lo Jesus:

—Maestr, ngol reꞌ ngoga naxno ti mbiꞌ naꞌnakta salꞌ ngol. 5 Nde ley chanꞌ Moisés nyebeꞌ lo náꞌ ndablo gadke náꞌ re ngol ta ndli jwanꞌ reꞌ.*8:5 Lv. 20:10; Dt. 22:22-24. ¿Lu, cho kwan nyea?

6 Ta nchab xaꞌ lo Jesus sa libeꞌ xaꞌ Jesus nde zyal mod keꞌ xaꞌ yalke yek Jesus. Leꞌ Jesus mbleng izyo nde nkeꞌ xaꞌ letr lo izyo kon kwenyaꞌ Xaꞌ. 7 Leꞌ re xaꞌ ya tatka ndonabdiꞌs xaꞌ lo Jesus, zyasa mdoli Jesus nde nchab Jesus lo xaꞌ:

—Tez nzo goꞌ xija naꞌngenta xken naꞌ, ner xaꞌ ya tyobte gadke ngol.

8 Zya bere mbleng Jesus izyo tedib gob nde tatka ngekeꞌ Xaꞌ letr lo izyo. 9 Leꞌ re xaꞌ ta nkeꞌ yalke yek ngola, senꞌ mbin xaꞌ ta nchab Jesus lo xaꞌ, zyasa tib tiba xaꞌ ngo ned ndya xaꞌ, tak mne xaꞌ nzoꞌb xken xaꞌ, nerla re xaꞌ gox ngo ned xisa mdonke masraꞌ xaꞌ; thipta Jesus mbyanꞌ nde kon ngol ndota tya, 10 Senꞌ mxit yek Jesus, mbwiꞌ Jesus ngenta cho men nak, benꞌta thib ngol ndo tya, zyasa nchab Jesus lo ngol:

—Ngol, ¿Ma re xaꞌ ta nkeꞌ yalke yek la ya? ¿Cho nek thib xaꞌ na'mnabe'da gaj la?

11 Leꞌ ngol nchab:

—Nek thib xaꞌy nye go'.

Zyasa nchab Jesus lo ngol:

—Nek na na'nyebet na gaj la; bya nde naꞌlitra lu jwanꞌ narax.

12 Jesus mni lo reta men tedib gob nde nchab Jesus:

—Na nak xni lo reta men lo izyo;†8:12 Mt. 5:14; Jn. 9:5. men jwanꞌ tyonke xis na, naꞌketed xaꞌ lo yalꞌkow, cheꞌla tyono xaꞌ xni ndaꞌ yalnaban.

13 Zyasa re xaꞌ fariseo nchab lo Jesus:

—Lu, lega jwanꞌ ndlia ndej la; nde re jwanꞌ ndlia naꞌnaktey jwan' li.‡8:13 Jn. 5:31.

14 Jesus mkab nde nchab Jesus lo re xaꞌ:

—Teꞌnye lega re jwanꞌ ndlin ndej na, per li re jwanꞌ ndlin, tak mnen plo mbro'n nde plo ndan; per goꞌ naꞌnyed goꞌ plo mbro'n nde plo ndan. 15 Goꞌ ngoxyo men a xa nak xgab goꞌ; leꞌ na, naꞌngoxyot na nek thib men; 16 Nde tez na goxyon, galꞌ nak jwanꞌ ndlin, tak naꞌndlida thib nay, rop náꞌ Xud na ndliy, Xaꞌ jwanꞌ mtelꞌ na. 17 Tak lo ley goꞌ nchab, tez chop men thita jwanꞌ ndej rop xaꞌ, xaꞌ ya ndej jwanꞌ li. 18 Jwanꞌ nasa, leꞌga na ndotej re jwanꞌ ndlin, nde Xud na Xaꞌ jwanꞌ mtelꞌ na, ndeja Xaꞌ jwanꞌ ndlin.

19 Zyasa nchab xaꞌ lo Jesus:

—¿Ma xud la?

Leꞌ Jesus mkab lo xaꞌ:

—Nek na naꞌnzolod goꞌ, tagaꞌ pa yolo goꞌ Xud na; tak tezka yolo goꞌ na, tagaꞌ tyolo goꞌ Xud na.

20 Reta diꞌs reꞌ mni Jesus lo ndo Xaꞌ plo tenꞌ ndlya tmi yon chanꞌ yodoꞌ, tya mbloꞌ xaꞌ xkiꞌs Dios lo men; nde ngenta' cho xaꞌ nden Jesus, tak teraꞌ sin beꞌ yoga Jesus.

21 Bere nchab Jesus lo xaꞌ:

—Na ndya, nde kwanꞌ goꞌ na, per lo xken goꞌ gaj goꞌ; tak plo tenꞌ ndan, naꞌlid goꞌ gan yeꞌd goꞌ tya.

22 Zyasa re xaꞌ judí nchab:

—¿Cho leꞌ kuj Xaꞌ lazoꞌ Xaꞌ, jwanꞌ nasa mbez Xaꞌ: Plo tenꞌ ndan naꞌlid goꞌ gan yeꞌd goꞌ tya?

23 Jesus nchab lo xaꞌ:

—Goꞌ nak men nzo'b xken', jwan' xa nak re men narax lo izyo. Le' na naꞌnakta na Xaꞌ lo izyo, tak le'n nak Xa' nde lo be'. 24 Jwanꞌ nasa mbez na lo goꞌ, lo xken goꞌ gaj goꞌ, tak tez naꞌlid lazoꞌ goꞌ leꞌ Na Nak Xaꞌ Mtelꞌ Dios, lo xken goꞌ gaj goꞌ.

25 Zyasa nchab xaꞌ lo Jesus:

—¿Choga nak la sa?

Leꞌ Jesus mkab lo xaꞌ:

—Leꞌy nia na lo goꞌ neraꞌ. 26 Nzo toz jwanꞌ tej na nde goxyon jwanꞌ nak goꞌ; per Xaꞌ jwanꞌ mtelꞌ na li jwanꞌ ndej Xaꞌ, nde jwanꞌ mbin na ndej Xaꞌ lon, jwanꞌna ndyodiꞌs na lo re men.

27 Nde naꞌngyenta men leꞌ Jesus ndotej Xud Xaꞌ Dios. 28 Jwanꞌ nasa nchab Jesus lo xaꞌ:

—Senꞌ ke' goꞌ Xinꞌ Mbiꞌ lo kruz, zyasa yolo goꞌ, Na Nak Xa' Mtel' Dios, nde ngenta kwan lin le'ga na, cheꞌla xata ndloꞌ Xud na lon, jwanꞌna ndyodiꞌs na. 29 Tak Xaꞌ jwanꞌ mtelꞌ na, ndono Xaꞌ na; naꞌndlad Xud na na thib na, tak na thiblaꞌ ndlin jwanꞌ ndryoꞌ lazoꞌ Xaꞌ.

30 Senꞌ ndotodiꞌs Jesus re jwanꞌ reꞌ, bro toz men mbli lazoꞌ xaꞌ Jesus.

31 Leꞌ re xaꞌ judí ta mblila lazonꞌ Jesus, nchab Jesus lo xaꞌ:

—Tez yoto goꞌ lo xkiꞌs na, nak goꞌ Xinꞌ teꞌdpa na; 32 Nde yolo goꞌ jwan' lipa, nde jwan' lipa ya, li lya' goꞌ.

33 Zya mkab re xaꞌ lo Jesus, nchab xaꞌ:

—Náꞌ nde lo bin chanꞌ Abraham§8:33 Mt. 3:9; Lc. 3:8. nde naꞌnzot náꞌ lo yaꞌ nek thib men; ¿Cho kwan liy mbez la lo náꞌ, lya' náꞌ? 34 Le' Jesus mkab lo xaꞌ:

—Gal' di's nipa na lo go', reta men ndli jwanꞌ narax, lo yaꞌ jwanꞌ narax nzo xaꞌ. 35 Tak ti mos pa yanꞌ mos thiptane liz xaꞌ jwanꞌ nge mos sinꞌ, per ti xinꞌ biꞌ xaꞌ tyanꞌ or thiptane lo xud or. 36 Jwanꞌ nasa, tez Xinꞌ Dios tola' goꞌ, zyasa lipa mblyaꞌ goꞌ. 37 Mnen lo bin chanꞌ Abraham nde goꞌ; per ncholaꞌs goꞌ kuj goꞌ na, tak naꞌnchotuda xkiꞌs na lazoꞌ goꞌ. 38 Na ndyodiꞌs re jwanꞌ ngwiꞌn ndli Xud na, nde leꞌ goꞌ ndli re jwanꞌ nchon goꞌ ndej xud goꞌ.

39 Re men mkab nde nchab xaꞌ lo Jesus:

—Lo bin chanꞌ Abraham nde náꞌ.

Leꞌ Jesus nchab lo xaꞌ:

—Tez liga lo bin Abraham nde goꞌ, re jwanꞌ mbli Abraham ndadlo li goꞌ. 40 Leꞌ go', che'la ncholaꞌs goꞌ kuj goꞌ na, lo ta mdej na jwanꞌ li lo goꞌ, ke Dios ndlo' re jwan' lon, ¡nde Abraham naꞌmblid xaꞌ jwanꞌ ta ndli goꞌ ba! 41 Goꞌ ndli re jwanꞌ ndli xud goꞌ.

Zyasa nchab xaꞌ lo Jesus:

—Naꞌnakta náꞌ mbed wan; ngeno náꞌ thipta xud náꞌ, Xaꞌ ya nak Dios!

42 Zyasa nchab Jesus lo xaꞌ:

—Tez liga xud goꞌ nak Dios, ndablo keꞌ lazoꞌ goꞌ na, tak na mbroꞌ tenꞌ ndob Dios sa mzin na ncheꞌ; tak naꞌndalta na por kwent chanꞌ na, leꞌn ndal tak Dios mtelꞌ na. 43 ¿Cho kwan liy naꞌyenta goꞌ jwanꞌ mbez na? Jwanꞌ ndliy nak, naꞌncholaꞌsta goꞌ gon goꞌ xkiꞌs na. 44 Xud goꞌ nak maxuꞌ, nde re jwanꞌ ndryoꞌ lazoꞌ xud goꞌ jwanꞌ na ncholaꞌs goꞌ li goꞌ. Maxuꞌ nak xaꞌ nguj men xata mdobte mdoxkwa' Dios izyo, nde naꞌnchotod xaꞌ lo jwanꞌ li, tak ngenta jwanꞌ li lenꞌ lazoꞌ xaꞌ. Senꞌ ndyodiꞌs xaꞌ yalkwinꞌ, jwanꞌna nak xkiꞌs xaꞌ; tak nakwinꞌ toz xaꞌ, xaꞌ nak xud yalkwinꞌ. 45 Mbay na, lo ndej na jwanꞌ lipa, naꞌlid lazoꞌ goꞌ na. 46 ¿Cho nzo xanya goꞌ toyal koxo'b ke nchap na yalke? Nde tez li jwanꞌ ndej na, ¿Cho kwan liy naꞌlid lazoꞌ goꞌ na sa? 47 Men jwanꞌ nak xinꞌ Dios, xkiꞌs Dios nchon xaꞌ; Jwanꞌ nasa nanchonta goꞌy, tak naꞌnakta goꞌ xinꞌ Dios.

48 Zyasa mkab re xaꞌ judí nde nchab xaꞌ lo Jesus:

—Cho nawenka mbez náꞌ, leꞌ lu nak Xaꞌ lo xyon Samaria, nde xbi chanꞌ maxuꞌ ndonoa.

49 Leꞌ Jesus mkab lo xaꞌ:

—Naꞌndonot na xbin maxuꞌ, cheꞌla leꞌn nxoꞌbyek Xud na; nde goꞌ naꞌnxobyekta goꞌ na. 50 Naꞌnkwanta na yalnaro chanꞌ na, per nzo Xaꞌ nkwanꞌna nde Xaꞌ ya nyaꞌb kwent. 51 Di's gal' nipa na lo go', men jwanꞌ kosaꞌ xkiꞌs na, na'wi'da xa' yalguj.

52 Zyasa re xaꞌ judí nchab lo Jesus:

—Naya mne náꞌ xbi chanꞌ maxuꞌ ndonoa. Abraham nde reta xaꞌ jwanꞌ mni Dios lonꞌ pola sa mdej xaꞌy lo men, nguj xaꞌ, nde lu mbez: “Men jwanꞌ xo'byek xkiꞌs na naꞌwi'da xaꞌ yalguj.” 53 ¿Cho mas naro nak la lo Abraham xaꞌ gox lo náꞌ ngo pola nde nguj xaꞌ? Nde noga re profet, nguj xaꞌ. ¿Cho men ro nak la ndyak la?

54 Jesus mkab lo xaꞌ:

—Tez li naron leꞌga na, naꞌndakta yalnaro chanꞌ na; Xud na nak Xaꞌ jwanꞌ ndli naron, Xaꞌ ta mbez goꞌ nak Dios goꞌ ba. 55 Leꞌ goꞌ, naꞌnzolod goꞌ Xaꞌ, benꞌta na nzolon Xaꞌ, nde tez gab na lo goꞌ naꞌnzolot na Xaꞌ, ngekwinꞌ na xaja nak re goꞌ ba. Per na, nzolon Xaꞌ nde ngosaꞌn xkiꞌs Xaꞌ. 56 Abraham xaꞌ gox ngo pola, nale toz ngo lazoꞌ xaꞌ wiꞌ xaꞌ wiz yal na; nde mbwiꞌ xaꞌy, nale toz ngo lazoꞌ xaꞌ.

57 Zyasa nchab re xaꞌ judí lo Jesus:

—Teraꞌ yoa chopsiꞌ linꞌ ¿Nde mbwiꞌa la Abraham?

58 Jesus nchab lo xaꞌ:

—Gal' di's nipa na lo go', senꞌ teraꞌ gal Abraham ndola na zya.

59 Zyasa mxen re xaꞌ ke keꞌ xaꞌ cho Jesus, leꞌ Jesus mkaꞌslo nde mbroꞌte Jesus tenꞌ ndob yodoꞌ; nde mbriꞌd Jesus xij reta xaꞌ, nda Jesus.