9
Jesus mtodanꞌ ti mbiꞌ xata ngol xaꞌ mkow lo xaꞌ
1 Senꞌ ndaridnda'b Jesus, mbwiꞌ Jesus ti mbiꞌ xata ngol xaꞌ nkow lo xaꞌ. 2 Leꞌ re xinꞌ teꞌd Jesus mnabdiꞌs lo Jesus, nchab xaꞌ:
—Maestr, ¿Cho kwan ndliy sa xata ngol mbiꞌ reꞌ nkow lo xaꞌ? ¿Cho leꞌga xken xaꞌy ota xken xud xaꞌy?
3 Jesus mkab:
—Naꞌnakte xken xaꞌ nekla xken xud xaꞌ, ta ngol xaꞌ sa ryoꞌxob yalnaro jwanꞌ li Dios lo xaꞌ. 4 Laj benꞌ nani nya nakinꞌ lin rsinꞌ Xaꞌ jwanꞌ mtelꞌ na; tak senꞌ nde yalꞌ ngenta cho ke sinꞌ. 5 Laj ngete'n xij re men lo izyo, nak na xni lo reta men.*9:5 Mt. 5:14; Jn. 8:12.
6 Senꞌ ngolo ta nchab Jesus, mzuk Jesus izyo nde mbli ben Xaꞌ lud yo kon xit suk Xaꞌ, nde mdaꞌb Xaꞌ ben xis rop ngudlo mbiꞌ ta naꞌngwiꞌda ya. 7 Nde nchab Jesus lo mbiꞌ:
—Wa ptach ngudloa nit nzo lenꞌ tank Siloé, diꞌs ya nak, Xaꞌ mtelꞌ na.
Zyasa ngwa mbiꞌ, mtach xaꞌ ngudlo xaꞌ nde senꞌ mbere xaꞌ, nawe ngwiꞌ xaꞌ. 8 Zyasa re men jwanꞌ nzo gax cho liz xaꞌ nde re men jwanꞌ mbwiꞌ nkow lo xaꞌ neraꞌ, ndolo nchab men:
—¿Cho naꞌnakta xaꞌ reꞌ ta thiblaꞌ ndyob nyaꞌb gona?
9 Pla xaꞌ nchab:
—Xaꞌ reꞌy.
Nde tipla xaꞌ nchab:
—Taxa nya xaꞌ.
Leꞌ mbiꞌ ya nchab:
—Na jwanꞌ na.
10 Nde nchab re men lo xaꞌ:
—¿Xomodka toyal wiꞌa sa?
11 Leꞌ mbiꞌ mkab nde nchab mbiꞌ lo xaꞌ:
—Xaꞌ ta ndole Jesus, Xaꞌ ya mtoxkwaꞌ lud ben nde mdaꞌb Xaꞌy xis rop ngud lon, nde ne Xaꞌ: “Waꞌ Siloé, nde ptach ngudloa.” Zya ngwan nde mtach na ngudlon nde zyasa mxoyal ngwiꞌn.
12 Zyasa nchab re men lo xaꞌ:
—¿Ma Xaꞌ ya?
Leꞌ mbiꞌ ya nchab:
—Naꞌnyet nay.
Re xaꞌ fariseo mnabdiꞌs toz xaꞌ lo mbiꞌ ta mxyalꞌ ngud lonꞌ ya
13 Zyasa mbeꞌ xaꞌ mbiꞌ ta ngok men mkow lonꞌ ya lo re xaꞌ fariseo. 14 Tak le'xa wiz jwanꞌ ndryoxkwen men senꞌ ta mdoxkwaꞌ Jesus ben nde mtodanꞌ Jesus ngudlo mbiꞌ ya. 15 Jwanꞌ nasa, re xaꞌ fariseo bere mnabdiꞌs xaꞌ lo mbiꞌ ya nyenꞌ xomod mxyalꞌ ngudlo mbiꞌ. Leꞌ mbiꞌ ya nchab lo xaꞌ:
—Lud ben mdaꞌb Xaꞌ rop ngudlon, xisa mtach nay, nde naya ngwiꞌn.
16 Zyasa pla xaꞌ fariseo nchab:
—Mbiꞌ ya, pa ak Xaꞌ men mbroꞌ lo Dios, tak naꞌnxobyekta Xaꞌ wiz ndryoxkwen men.
Leꞌ tipla xaꞌ nchab:
—¿Xomod ti men nzoꞌb xkenꞌ toyal li yalnaro?
Nde anta chepa ngok xgab reta xaꞌ. 17 Zyasa bere nchab xaꞌ lo mbiꞌ ta naꞌakta wiꞌ neraꞌ:
—¿Cho kwan nyea, cho Xaꞌ ta mbli mxyalꞌ ngud loa ba?
Leꞌ mbiꞌ ya nchab:
—Xaꞌ ya nak ti mbiꞌ ni Dios lonꞌ sa ndej Xaꞌy lo men.
18 Per re xaꞌ judí naꞌndlid lazoꞌ xaꞌ cho mbiꞌ ya ta nkow lonꞌ neraꞌ nde naya ngwiꞌ xaꞌ, zyasa axta mbrez xaꞌ rop ta xud mbiꞌ ta mxyalꞌ ngud lon ya. 19 Nde mnabdiꞌs xaꞌ lo rop ta mena, nchab xaꞌ:
—¿Cho xaꞌ reꞌ ta nak xinꞌ goꞌ ya, xaꞌ ta mbez goꞌ xata ngol xaꞌ nkow lo xaꞌ? ¿Xomodka naya ngwiꞌ xaꞌ sa?
20 Zyasa mkab rop ta xaꞌ nak xud mbiꞌ ya, nchab xaꞌ:
—Mne náꞌ, xinꞌka náꞌ nak mbiꞌ reꞌ, nde xata ngol xaꞌ nkow lo xaꞌ; 21 Per naꞌnyet náꞌ xomod sa ngwiꞌ xaꞌ naya nde naꞌnchenta cho mbli sa mxyalꞌ ngud lo xaꞌ. Per gox la xaꞌ, leꞌ mnabdiꞌs goꞌ lo xaꞌ, xaꞌ toyal teja lo goꞌ.
22 Tamod nchab rop ta xud mbiꞌ ya tak nzyeb xaꞌ re xaꞌ nak sinꞌ lo men judí, tak re xaꞌ judí mbyanꞌdiꞌsla xaꞌ, nchab xaꞌ; tez nzo men tej leꞌ Jesus nak Xaꞌ mtelꞌ Dios, kote xaꞌ men ya lenꞌ yo tenꞌ ndyop men Israel.†9:22 jwanꞌ reꞌ nak sinagoga = yo jwanꞌ ndyop men israel. 23 Jwanꞌ nasa nchab rop ta mena: “Narola xaꞌ, mnabdiꞌs goꞌ lo xaꞌ.”
24 Zyasa bere mbrez xaꞌ mbiꞌ ta nkow lonꞌ neraꞌ, nde nchab xaꞌ lo mbiꞌ:
—Dios ndowiꞌ, ptaꞌ kwent galꞌ lo náꞌ; tak mne náꞌ, nzoꞌb xken Xaꞌ ta ndej la ba.
25 Zyasa mkab mbiꞌ ya, nchab mbiꞌ:
—Tez nak Xaꞌ men nzoꞌb xken naꞌ, naꞌnyet na jwanꞌna; jwanꞌ mnen nak, pola nkow lon, per naya toyal wiꞌn.
26 Zya mnabdiꞌs xaꞌ lo mbiꞌ ya tedib gob:
—¿Cho kwan mblino Xaꞌ ya lu? ¿Xomod mbli Xaꞌ sa ngoni loa?
27 Leꞌ mbiꞌ mkab lo xaꞌ:
—Mdejla nay lo goꞌ, per nancholaꞌsta goꞌ ngon goꞌy. ¿Cho kwan ndliy sa ncholaꞌs goꞌ gon goꞌy tedib gob? ¿Cho no goꞌ ncholaꞌs ak xinꞌ teꞌd Xaꞌ?
28 Zyasa mbrezno xaꞌ mbiꞌ ya, nde nchab xaꞌ:
—Lu ta nak xinꞌ teꞌd Xaꞌ ya; per náꞌ, xiꞌn teꞌd Moisés nak náꞌ. 29 Mne náꞌ, Dios mniga lo Moisés pola; per Xaꞌ ta ngeteba, naꞌnyed náꞌ plo mbroꞌ Xaꞌ.
30 Mkab mbiꞌ ya nde nchab mbiꞌ lo xaꞌ:
—¡Nzoyen men jwanꞌ reꞌ! Tak goꞌ, naꞌnyed goꞌ plo mbroꞌ Xaꞌ nde leꞌ na, mxalꞌ Xaꞌ ngud lon. 31 Nde mnenꞌ, leꞌ Dios naꞌnchonta Xaꞌ xkiꞌs ti men nzoꞌb xken naꞌ; per tez ti men nzeb lazoꞌ xaꞌ Dios, nde ndli xaꞌ jwanꞌ ncholas Dios, xkiꞌs xaꞌ ya nchon Dios. 32 Axta pola nanchonta men yo ti xaꞌ nxalꞌ ngudlo ti men nkow lonꞌ xata ngol men. 33 Tezka naꞌnakta Dios mtelꞌ mbiꞌ reꞌ, ngen cho kwan ak li Xaꞌ.
34 Zyasa mkab re xaꞌ lo mbiꞌ ya nde nchab xaꞌ:
—¡Xata ngol la nzoꞌb xken la! ¿Nde ncholaꞌs la toteꞌd la náꞌ?
Nde thiptane mbloꞌte xaꞌ mbiꞌ ya lenꞌ yo tenꞌ nteꞌd xaꞌ xkiꞌs Dios.
Re xaꞌ jwanꞌ nak sinꞌ lo men judí nkow lo xaꞌ
35 Mbin Jesus mbloꞌte xaꞌ mbiꞌ ta mxyalꞌ lonꞌ ya; nde senꞌ mzyalꞌ Jesus mbiꞌ ya, nchab Jesus lo mbiꞌ:
—¿Cho ndli lazoꞌa Xinꞌ Dios?
36 Leꞌ mbiꞌ ya mkab nde nchab mbiꞌ:
—¿Cho Xaꞌ, sa li lazoꞌn Xaꞌ?
37 Jesus nchab lo xaꞌ:
—Xaꞌ ya ndowiꞌa naya, leꞌ Xaꞌ ta ndodiꞌsnoa reꞌ.
38 Zyasa nchab mbiꞌ ya:
—Ndli lazoꞌn lu, Xaꞌ Nyebeꞌ.
Nde mdoxub mbiꞌ lo Jesus.
39 Leꞌ Jesus nchab lo xaꞌ:
—Ndal na lo izyo sa nyaꞌb na kwent lo re men, sa re men nkow lonꞌ, wiꞌ xaꞌ, nde re men jwanꞌ ngwiꞌ, kow lo xaꞌ.
40 Zyasa pla xaꞌ fariseo jwanꞌ ndo tya, senꞌ lo mbin xaꞌ jwanꞌ reꞌ, nchab xaꞌ lo Jesus:
—¿Cho noga náꞌ nak men nkow lonꞌ?
41 Jesus mkab lo xaꞌ:
—Tez ngak goꞌ men nkow lonꞌ, pa keno goꞌ xken goꞌ; per naya ta mbez goꞌ ngwiꞌ goꞌ, jwanꞌ nasa nzoꞌb xken goꞌ.