1 ’Zyasa nchab Jesus:

—Nipa na lo go', xaꞌ jwanꞌ naꞌnchoteda tenꞌ nge yala ro yalo chanꞌ mbakxilꞌ, xagaꞌ tenꞌ nchote xaꞌ, xaꞌ ya nak wanꞌ nde xaꞌ xkap. 2 Leꞌ xaꞌ nchote tenꞌ nge yala ro yalo, xaꞌ ya nak xaꞌ ngenap mbakxilꞌ. 3 Leꞌ xaꞌ jwanꞌ ngenap ro yala chanꞌ yalo, nxalꞌ xaꞌy lo xaꞌ jwanꞌ ngenap mbakxilꞌ nde re mbakxilꞌ ntakbeꞌ maꞌ xkiꞌs xaꞌ, nde ndej xaꞌ thiba le mbakxilꞌ, nde ngote xaꞌ maꞌ. 4 Senꞌ ngolo mbloꞌte xaꞌ re manꞌ xa', zya mbiblo xaꞌ lo maꞌ, nde ndyonke maꞌ xis xaꞌ tak ntakbe' maꞌ xki's xaꞌ. 5 Per xaꞌ jwanꞌ naꞌnzolod maꞌ, naꞌtyonked maꞌ xis xaꞌ, nxyonꞌ maꞌ lo xaꞌ, tak naꞌntakbe'd maꞌ xkiꞌs xaꞌla men.

6 Kwent nabix reꞌ mni Jesus lo re men; per naꞌngyenta xaꞌ xamod nak jwanꞌ ndej Jesus lo xaꞌ.

7 Zya bere nchab Jesus lo re xaꞌ tedib gob:

—Nipa na lo goꞌ: Na nak yala chanꞌ re mbakxilꞌ. 8 Reta xaꞌ jwanꞌ mbyeꞌd senꞌ lo tera yal na, xaꞌ ya nak xaꞌ wanꞌ nde xaꞌ xkap; per naꞌngonta re mbakxilꞌ xkiꞌs xa'. 9 Na nak yala, men jwanꞌ yote tenꞌ ndon, tlaꞌ xaꞌ. Nde men ya ak xaja mbakxilꞌ ta nchote maꞌ nde ndryoꞌte maꞌ sa nzyal maꞌ yix naye.

10 ’Leꞌ xaꞌ wanꞌ, benꞌta ndeli wanꞌ xaꞌ, kuj xaꞌ men nde tolux xaꞌ men; leꞌ na, ndal na sa keno men yalnaban nde sa brotosa keno men. 11 Na nak Xaꞌ nabeꞌz ngenap mbakxilꞌ.*10:11 Ez. 34:11-12. Tak Xaꞌ jwanꞌ nabeꞌz ngenap maꞌ, ndayaꞌ Xaꞌ yalnaban chanꞌ Xaꞌ por re mbakxilꞌ. 12 Leꞌ xaꞌ nchax nka, nakta xaꞌ men ngenap mbakxilꞌ, tak naꞌnakte mbakxilꞌ xaꞌ, senꞌ lo mne xaꞌ nde lob, ndlaꞌ xaꞌ re mbakxilꞌ nde nxyonꞌ xaꞌ, zyasa nkeꞌ loba cho mbakxilꞌ nde nchaꞌz lob reta maꞌ. 13 Jwanꞌ nasa leꞌ xaꞌ nchax nka nxyonꞌ xaꞌ, tak benꞌta nkelo xaꞌ yax ka xaꞌ, nde nandyod xaꞌ re mbakxilꞌ.

14 Na nak Xaꞌ nabeꞌz ngenap mbakxilꞌ nde nzolon re mbakxilꞌ na nde tagaꞌ re mbakxilꞌ na nzolo maꞌ na 15 ’Ta xa nzolo Xud na na, taga nzolon Xud na,†10:15 Mt. 11:27; Lc. 10:22. nde tayan yalnaban chanꞌ na por re mbakxilꞌ. 16 Ngenon tipla mbakxilꞌ jwanꞌ naꞌnzoda yalo reꞌ; no re maꞌ ya ndablo yaxin, nde gon maꞌ xkiꞌs na sa thipta yalo yo re maꞌ nde thipta Xaꞌ kenap maꞌ.

17 ’Jwanꞌ nasa nkeꞌ lazoꞌ Xud na na, tak tayan yalnaban chanꞌ na nde bere kayane tedib gob. 18 Ngenta cho kib yalnaban chanꞌ na, cheꞌla leꞌga na tayay. Tak ngenon yalne tayane nde ngenon yalne sa kayane tedib gob. Yalnyebeꞌ reꞌ mdaꞌ Xud na lon mkayan.

19 Zyasa bere ngok rol re xaꞌ judí tedib gob senꞌ mbin xaꞌ diꞌs reꞌ. 20 Naꞌr toz xaꞌ nchab:

—Mbi narax nzo lazo' Xaꞌ, ncholꞌ yek Xaꞌ ¿Cho kwan liy ndli lazo' goꞌ Xaꞌ?

21 Leꞌ ti pla xaꞌ nchab:

—Naꞌtaꞌda nak mod ndyodiꞌs xaꞌ jwanꞌ nzo mbi narax lozon'. ¿Cho tli mbi naraxa gan xyalꞌ ngudlo ti men jwanꞌ na'ngwida?

22 Be' sen' nxyo'b yop, yez Jerusalen tya re xa' judí nzi li xaꞌ ni chanꞌ yodoꞌ jwan' nte'la's xa' lo mdaya' xa' yodo' lo Dios. 23 Leꞌ Jesus ngete plo ndob yodoꞌ, tenꞌ ndaꞌb koredor chanꞌ Salomón. 24 Zyasa re xaꞌ judí mtowꞌ xaꞌ lo Jesus nde nchab xaꞌ:

—¿Axta pol ndlia xgab tej la jwanꞌ galꞌ lo náꞌ? Tez luga nak Crist, galꞌ pteja lo náꞌ.

25 Jesus mkab lo xaꞌ:

—Leꞌy nia na lo goꞌ nde naꞌndlid lazoꞌ goꞌy. Leꞌ re jwanꞌ ndlin kon yalnyebeꞌ chanꞌ Xud na, jwanꞌna ndej kwent chanꞌ na. 26 Per naꞌlid lazoꞌ goꞌy, tak naꞌnakta goꞌ mbakxilꞌ na, ta xa niga na lo goꞌ. 27 Leꞌ re mbakxilꞌ na nxo'b yek or xki's na, nzolor na, nde ndyonker xis na, 28 nde na nda yalnaban adiꞌ lor; sa thiptane naluxta or, nde ngen cho kib or lo yaꞌn. 29 Xud na jwanꞌ mdaꞌ re mbak xil' reꞌ lon nde naro toz nak yalne chanꞌ Xud na, ngen cho kib rer lo yaꞌ Xud na. 30 Na nde Xud na thita náꞌ.

31 Zyasa re xaꞌ judí bere mxen xaꞌ ke tedib gob sa gadke xaꞌ Jesus, 32 Leꞌ Jesus nchab lo xaꞌ:

—Naꞌr re sin' wen jwan' mbro' lo Xud na mbloꞌn lo goꞌ; ¿Xanya thi jwanꞌna nak yalke sa gadke goꞌ na?

33 Zya mkab re xaꞌ judí, nchab xaꞌ:

—Naꞌgadked náꞌ lu por re jwanꞌ wen ndlia, gadke náꞌ lu tak narax nia xis Dios;‡10:33 Lv. 24:16. men nak la nde mbez la Dios nak la.

34 Jesus mkab lo xaꞌ:

—¿Cho na'ngenida lo ley goꞌ: “Na nchab, leꞌga goꞌ dios nak go'?§10:34 Sal. 82:6. 35 Nde mne wen goꞌ leꞌ jwanꞌ ngeni lo ley naꞌnyeda kiꞌs mena, jwanꞌ nasa tez yub Dios, dios mblole Xaꞌ re men jwanꞌ mkayaꞌ xkiꞌs Xaꞌ. 36 ¿Cho kwan ndliy sa mbez goꞌ: Nixin na xis Dios senꞌ ndej na lo men leꞌ na nak Xinꞌ Dios? Nde Dios jwanꞌ mbli nayon Xaꞌ na nde mtelꞌ Xaꞌ na lo re men nzi lo izyo. 37 Tez naꞌndlít na re jwanꞌ ndli Xud na, naꞌlid lazoꞌ goꞌ na. 38 Per tez ndli nay, nde teꞌnye naꞌlid lazoꞌ goꞌ na, masa bli lazoꞌ goꞌ re jwanꞌ ndlin, sa yolo goꞌ nde li lazoꞌ goꞌ leꞌ Xud na ndono na nde na ndono Xud na.

39 Zya bere ncholaꞌs xaꞌ nden xaꞌ Jesus, per mblyaꞌ Jesus lo yaꞌ xaꞌ.

40 Yaja mbere Jesus tedib lad ro yoꞌ Jordán, plo tenꞌ mblole ner Juan men;*10:40 Jn. 1:28. nde tya mbyanꞌ Jesus. 41 Nde bro toz men mbyeꞌd lo Jesus tya, nde nchab men:

—Juan, liga, nek thib yalnaro namblid xaꞌ, per reta jwanꞌ ta mdej Juan kwent chanꞌ Xaꞌ reꞌ, liy.

42 Nde bro toz men mbli lazo xaꞌ Jesus tya.