HEBRU
KHRISAWBU KHATEI CAKUAPAW
1
Vaiming navy tah Sawcapaw alai vy
1 Cai a sei ciapaw leco Khazing tah a khuavang sahlo khah hmang he ka, khuahlai a ma pathlahtu sahlo hai lekhei uihlupui a phingphing khei bia a za rei tei. 2 Canghrasala atochai cai hning caipaw lehei co, a Sawcapaw hmang tah kaaning khatah bia a rei. Ama cawh zezong vytei ry cytu ruapaw tah thingpaw a cang. Ama thongtah alui le avai le zezong vytei heh tuapaw a cang. 3 Sawcapaw cawh Khazing rungnawnah khainah cang ka, Khazing cangnah a palangsahtu hmuisuipaw a cang. A bia thawtlungná tah zezong vytei khah a tlechui. Suanah vytei pathaisahnah a tua khy taitah vaicung letah Cungnungcai cacang lang letah a ty. 4 Macawtaco Khazing Sawcapaw cawh vaiming sahlo cypaw navy tah a rungnaw vypaw ming a cytu a cangpaw hratah vaiming sahlo navy tah a rungnaw vy sylypaw a cang.
5 Zemaw tah pawco Khazing tah a vaiming sahlo khah ahomaw,
“Nama cawh ka Sawcapaw cang ceh ka,
atoning heh na Paw ka cang myca,”✡Hlaw 2:7
tatah a tah bang? Taico,
“Kama cawh a Paw cang neh ka,
Ama cawh ka Sawcapaw a cang a,”✡2 Sam 7:14; 1 Chairei 17:13
tatah tah bang hrah be. 6 Mataico, Khazing tah a sa-uthui khah khazaw letah a za thlaw ning tah,
“Khazing vaiming vytei tah beh he seh,”✡Biary 32:43
a tah. 7 Mataico vaiming sahlo kong leco,
“Ama taco a vaiming sahlo cawh thli tah tua he ka,
a raihretu sahlo cawh melui tah a tua he,”✡Hlaw 104:4
tatah a rei. 8 Canghrasala, Sawcapaw kong leco,
“Vy Khazing, na buidyching cawh chaizaw tah chaizaw tai a hming a,
dingnah cawh na painah cungcahrei a cang a.
9 Dingnah cawh du ceh ka, chahlynah cawh na hua,
macawtaco Khazing, na Khazing tah alawngnah sathy ca thu ka,
na vesaw sahlo navy tah a ca pasang vy,”✡Hlaw 45:6-7
tatah a tah. 10 Mataico,
“Vy Abuipaw, athoning tah Nama tah alui a pahnianah cawh tua ceh ka,
avai kheh na kih chuh a cang.
11 Ma sahlo cawh a rawh thlu he ka, canghrasala Nama cawh na hming paria a,
ma sahlo vytei cawh chaichi hratah a cai thlu he.
12 Taico angki pasuapaw hratah pabi he ceh ka, chaichi hratah a thlai thlu tae he.
Canghrasala Nama cawh chaizaw tah Nama ialia cang ceh ka,
na kungkhua zong chang thai beh,”✡Hlaw 102:25-27
tatah a tah. 13 Canghrasala Khazing tah a vaiming sahlo khah ahomaw,
“Na caraepaw cawh na pherai letah
ka chiahlai vytei ka cacang lang hei a ty tua,”✡Hlaw 110:1
tatah a tah bang he? 14 Canghrasala vaiming sahlo cawh Khazing a raihretu longlong a cang he. Pachahnah a tingpaw cawngsaw sahlo bawkhang pawtah Khazing taitah tawpaw thlary a cang he.