2
Nawthlia pawtah raering pehnah
1 Macawtaco, a pingpaly lang kaa seisua ly nápawtah kaa thuipaw bia khah a cy vy tah kaa tle hrahring ruapaw a cang. 2 Taico vaiming sahlo tei aa pehpaw phungbia hmai khah pacysah cang tah a zui lypaw le a cakahpaw cawh a tlahpaw dangtahnah khah peh a cang caco, 3 ma tluh pachahnah rungnawpaw heh zerei lytah ung my peh seh la, zekhatamaw hrehnah cawh kaa saisai khy a? Ma pachahnah cawh a hmetawcai tah Abuipaw hrahring tah rei ka, a thuipaw maikaw tah a reipaw bia cawh kaa hai letah aa pacysah. 4 Khazing zong tah paching pakhanah le khuarawhanah le ningang chuipaw hming a phingphing tah le Ama a du pawtei hratah Thlawpaw Pathai lahsong a pehnahpaw khei thawngchawbia cawh a dih tatah a palang.
Zisu cawh a uny sahlo hratah a tua
5 A va chuh lepaw alui, atotei a kong kaa rei leimeipaw heh vaiming sahlo tah aa uhpaw cang be. 6 Canghrasala zeletah tlong maw, ma hrahei a rei bang,
“Khazing, mehnung heh zeky cang ka maw na thui paria thlang?
Cawngsaw Sawcapaw heh ze cang ka maw a zawng na rawh?
7 Ama cawh vaiming sahlo navy tah a nai vy thehpaw tah tua ceh ka,
rungnawnah le palawngpalinah khah na khusah,
8 zezong vytei khah a phe rai letah na chia,”
tatah a tah. A phe rai letah zezongpui a chia tih taco, Khazing tah a nawhnuinah rai letah a chia lypaw zehmai ung be. Canghrasala ato lehei co, nawhnuinah zezongpui a phe rai letah a ung tahpaw hmuh balang bei peh.✡Hlaw 8:4-6 9 Canghrasala kaa hmuhpaw cawh Zisu, vaiming navy tei a nai vy theh tei tuapaw a cangpaw khah atoheh palawngpalinah le rungnawnah cawh a khusah a cang. Zecawtamaw tatah thihnah khah ing ka, Khazing ningdonah thongtah ming vytei cawtah thihnah khah a pateh pah thlu he.
10 Sawtei a hlupui khah rungnawnah lang phah sá pawtah Ama a cawtah le Ama a thongtah zezongpui a ungpaw Khazing tah pachahnah a tuatupaw khah tai-ingnah thongtah mehtling tah a tuapaw cawh a tlahpaw a cang. 11 Mehnung suanah a pathaisahtu le suanah pathaisah a cangpaw sahlo cawh ingchungkho kheh a cang he. Ma navai taco Zisu tei ka uny sahlo tatei a ypaw he khah a ningzeh be. 12 Ama tah,
“Ka uny sahlo hai letah na ming cawh ka palang a,
a pungpaw sahlo he aa hmekaw letah nama reithai tah hlaw ka sá a,”✡Hlaw 22:22
tatah Khazing khah a tah. 13 Taico,
“Ama letah ka ngepainah ka chia a,”✡Isai 8:17
a tah. Mataico,
“Ma lehei Khazing tei a pa pehpaw sawtei sahlo khatah ka ung,”✡Isai 8:18
tatah a tah vy.
14 Mataico, sawtei sahlo cawh thi le saw tei a hringpaw mehnung aa cangnah cawtah Zisu zong cawh cawngsaw cangnah khah a hrong hrah. Ma hraco a cangnah cawh thihnah cung letei, naw a hnuitu Setan khah Ama a thihnah thongtah a hlyde khy nápawtah le, 15 thihnah cinah thongtah aa hring chung vytei sae hratei a ungpaw vytei khah a pachah nápaw he cawtah a cang. 16 Zecawtamaw tahpaw co, a bongpaw he cawh vaiming khah cang ly he tah Abraham pathlah sahlo hrahring khah a cang hri he. 17 Ma rawng tahei, Ama cawh a uny sahlo hratah kawngting letah tua a hypaw cang ka, Khazing raihrenah letah zingchuipaw le zawngepaw tlangbui alaicaipaw a cang khy nápawtah le cawngsaw cawtah sua ngethainah a tuapah ruapaw tah a cang. 18 Ama hrahring takhei tuhsonah khah a ing thahnah cawtah tuhsonah aa ingpaw sahlo he khah a bong khy he.