3
Zisu cawh Moses navy tah a rungnaw vy
1 Macawtaco uny pathaipaw sahlo Khazing tah a mehpathai cang pawtah ca tlawng myca he ka, macawtaco apostol le tlangbui alaicaipaw kaa tahpaw Zisu kong khah rawh tua my lo. 2 Moses cawh Khazing ingchungkho sahlo letah zingchui teitah a ungpaw hratah Zisu cawh Ama rai a siatupaw cung letah zing a chui hrah. 3 Ing a sahtu cawh a sahpaw ing navy tah alai vypaw hmezawnah a hmuhpaw hratah Zisu cawh Moses navy tah a rungnaw vypaw le hmezaw a chui vypaw a cang. 4 Ing maikaw cawh cawngsaw tah aa sah, canghrasala zezongpui a sahtu cawh Khazing a cang. 5 Moses cawh Khazing ingchungkho vytei lekhei zingchuipaw raihretu cang ka, hmelang letah Khazing tah a rei ruapaw zong khah a langsah. 6 Canghrasala Khri cawh Khazing ingchungkho letah naw a hnuipaw Sawcapaw zingchuipaw a cang. Kaa palaikhuipaw peh hnabeisuinah le kaa raechahnah khah kaa tle thlang caco, a ingchungkho kaa cang he peh.
Zing lynah cawtah raering pehnah
7 Macawtaco Thlawpaw Pathai tei a reipaw hrakhei,
“Atoning heh a o naa thui caco,
8 raangcaa letei hnehsah aa cangning cai letei
Khazing aa za dy ning tei aa lung a khongpaw hrakhei,
naa lung a khongsah khe lo.
9 Ma lekhei naa mapaw sahlo tah kung songli chung
aa cawtah ka tuapaw aa hmuh thlang naná teitah pa dy he ka, aa pa pase.
10 Ma rawng tahei ma pathlah sahlo cung leco ka thingae ka,
‘Aa lungthing cawh lang pave leimei thlang ka,
ka langpui khah hnih bei he,’ tatah ka tah.
11 Macawtaco ka thingae hmotah chia ka sah,
‘Ka hianah leco a nae by bei he,’ ka tah,”✡ Hlaw 95:7-11
tatah a tah.
12 Ka uny sahlo a singkang my lo. Ma lypaw co Khazing hring cawh bangsai pawtah naa hrong letah aho chung letah maw zing lynah lungthing sua a ung pang a. 13 Canghrasala naaning cawh suanah dungkhei thainah tah pakheh hmai naa lung a ca khongsah ly nápaw he tah atoning tah chung vytei, ning tating tah pakheh le pakheh a pasy my lo. 14 Zecawtamaw tatah a hmasaw tei, kaa hnuipaw zingnah khah a changnah tai cyky tah ka tle thlang caco peh Khri letah tingvy kaa hnui cy hra a. 15 Capathai tei a ciapaw hrakhei,
“Atoning heh a o khah naa thui caco,
Khazing aa za dy ning tei aa lung a khongpaw hrakhei,
naa lung a khongsah khe o.”✡ Hlaw 95:7-8
16 Aho sahlo maw Khazing o cawh thui he ka, Khazing a za dypaw cawh a cang he? Moses tah Izipt raang chung taitei a piakhuipaw vytei khah a cang he. 17 Aho sahlo cung letah maw Khazing cawh kung songli chung a thing a ae? Suanah a tuapaw, raangcaa letei a thipaw sahlo cung lekhei a cang. 18 “Ka hianah leco a nae by bei he,” tatah Khazing tah chia a sahpaw he khah aho sahlo maw aa cang? Ama a naw a nge lypaw sahlo khah a cang he. 19 Macawtaco, aa zing lynah cawtah a za nae khy bei he, takhah kaa hni.