1 Melkhizedek cawh Salem khuapui buipaw le Cungnungcai Khazing tlangbui a cang. Abui sahlo dy he katei, tenah chitah a va sei kawpaw Abraham khah a tong ka, bonghnang a song. 2 Abraham tah hrangcho a lahpaw chyhraw chykheh khah a peh. Melkhizedek ming a silang sangkhehnah cawh, “Dingnah Buipaw,” tah a cang. Taico, a ming hringpaw cawh Salem Abuipaw cang ka, a silang cawh, “Denah Buipaw,” tah a cang. 3 A no le a paw kong cangseh, ama aa pathlahtu sahlo aa kong cangseh, a chuakehnah kong le a thihnah kong cangseh, zehmai a cia be. Ama cawh Khazing Sawcapaw hratah cang ka, chaizaw tah tlangbui a cang.

4 Macawtaco, zetlua tamaw a rungnaw takhah pacang tua o. A ma pathlahtu Abraham tahmai hrangcho a lahpaw vytei taitah chyhraw chykheh khah a peh. 5 Taico Levi teisaw a cangpaw tlangbui sahlo khah phungbia tah Israel cawngsaw sahlo taitah chyhraw chykheh khah naa la he tatah a tah he. Israel sahlo cawh Abraham teisaw aa cang hrah naná teitah aa lah hrah he. 6 Ma cawngsaw heh Levi pathlah a cang ly naná teitah chyhraw chykheh khah Abraham taitah hmai law ka, Khazing biakangnah a hnuipaw Abraham khah bonghnang a song. 7 Canghrasala a chia vypaw cawh alai vypaw tah bonghnang song phung a cang tahpaw heh ei ruapaw zehmai ung beh. 8 Kaw kheh leco chyhraw chykheh khah a thi thaipaw tlangbui tah aa lah he. Kaw hringpaw leco, a hring thlang aa tahpaw tlangbui Melkhizedek tah a lah he. 9 Macawtaco Abraham tah Melkhizedek khah chyhraw chykheh a peh tihtah chyhraw chykheh a cy teipaw he Levi sahlo takhei zong aa peh hrah tah khy a cang. 10 Zecawtamaw tatah Melkhizedek tah Levi a pathlahtu Abraham a tong ning takhei Levi cawh a pathlahtu Abraham chung taitah chuh balang be.

11 Levi mingphing tlangbui cangnah thongtah mehtling cangnah cawh hmuh khy cangsehla caw (ma rai leco cawngsaw khah phungbia peh aa cang) Aron tlangbui cangnah ning tah cang lytah Melkhizedek tlangbui cangnah ning tah tlangbui ahringpaw aa chua a hy khaw a maw? 12 Tlangbui cangnah khah thlai a cang tihtah phungbia zong khah thlai a hy hrah. 13 Taico, ma a kong kaa rei leimeipaw heh kaa Buipaw a kong cang ka, a mingphing chung taitah dangnah siasang letah tlangbui rai a hrepaw ahohmai ung bang bei he. 14 Kaa Buipaw cawh Judah phing chung taitah a chuhpaw a cang takhah a sepaw tah hnipaw cang ka, ma phing kong lehei Moses tah tlangbui sahlo aa kong zehmai rei beh. 15 Melkhizedek hapaw tlangbui phingcangpaw a chuanah cawtah hei atotei kaa rei leimeipaw bia heh a se vy tima leimei. 16 Ama cawh phungbia tei a reipaw mingphing taitah tlangbui a cangpaw cang be, rorang khy a cang lypaw hringnah hmingtuakhynah thongtah tlangbui a cangpaw a cang. 17 Capathai tah a kong a reipaw cawh,

18 Phung paringpaw cawh a thaw a dianah cawtah le sang a tle lynah cawtah hneihly a cang myca. 19 Zecawtamaw tatah Moses phungbia taco zehming hmai khah a tlingsah khylynah cawtah cang ka, hnabeisuinah achaw vypaw cawh va chuh myca ka, ma thong co Khazing khah ka ne khy he peh.

20 Ma cawh Khazing biakangnah lytah cang beh. Ming hringpaw cawh tlangbui aa cang tihtah biakangnah zehmai ung be. 21 Canghrasala, Ama cawh biakangnah tua hmotah tlangbui tah tua a cang. Ama a kong leco Khazing tah,

23 Ahringpaw tlangbui a hlupui aa ung naná teitah aa thihnah rawng tah aa rai hre paria khy bei he. 24 Canghrasala, Zisu cawh chaizaw ahringpaw a cangnah cawtah chaizaw tah tlangbui a cang paria thlang. 25 Macawtaco, Ama a thongtah Khazing a pangepaw maikaw cawh a pachah khy paria thlang he, zecawtamaw tatah, aa cawtah nawpah a pawtah chaizaw tah a hring cawtah.

26 Ma hapaw tlangbui alaicaipaw cawh kaa hiapaw vytei a tlingsah khypaw cawh a cang. Ama cawh a pathaipaw, suise a kawh lypaw, suanah a hnui lypaw, mehsua sahlo taitei patlia ciapaw, avai a cung lang tai cuicaling ciapaw a cang. 27 Ama cawh ahringpaw tlangbui alaicaipaw sahlo khakhei a lo be, Ama a suanah cawtah le zawpui vytei suanah cawtah ning tating tah ahlainah tua khah hia be. Aa suanah cawtah uikheh athuihlainah takhei chaizaw cawtah a zawpaw tah a hlai thlu thah. 28 Moses phungbia taco a tling lypaw cawngsaw khah tlangbui alaicaipaw tah a tua he. Canghrasala phungbia a hninglang tei a vongpaw biatainah taco Khazing Sawcapaw khah thing ka, chaizaw cawpaw tah mehtling tah a tua.