8
Biahrai tha tlangbui laicaipaw
1 Kaa rei leimeipaw chung letah reihnang caipaw a cangpaw cawh ma heh a cang. Ma hapaw tlangbui alaicaipaw cawh hnui peh ka, Ama cawh vaicung letei Cungnungcai abui dyching a cacang lang tei a typaw khah a cang. 2 Hming pathai caipaw lekhei tlangbui alaicaipaw rai khah hre ka, ma a hrenahpaw cawh mehnung tei sahpaw cang lytah Abuipaw tei a sahpaw thlangda hmuisui lekhei a cang.
3 Tlangbui alaicaipaw vytei cawh Khazing khatei pehlainah le athuihlainah tua pawtah rai peh aa cangpaw hratah ma kaa tlangbui alaicaipaw caw zong taco, pehlai ruapaw hnui khah a hia. 4 Ama cawh aluicung leco cang seh la, tlangbui cang a be. Zecawtamaw tatah phungbia naning tah a thuihlainah a peihlaitu he tlangbui sahlo aa ung thahnah cawtah. 5 Ma sahlo cawh hminghmaw a pathaipaw hming lekhei hre he ka, ma hminghmaw cawh vaicung letei a ungpaw behnah ing ningpahli a cang. Moses tah thlangda a tuaning tah Khazing tah raeringnah a pehpaw cawh, “Tlaang cung letei a hmuisang ka ca hmuhsah pawtei hrakhei zezongpui khah na tua thlu he,”✡Piachua 25:40 a tah. 6 Ahringpaw tlangbui sahlo pehpaw tlangbui rai navy tah Zisu kha pehpaw tlangbui rai cawh alai vy sylypaw a cang. Ma hraco Zisu tah Khazing taitah a cawngsaw sahlo khatah a va chuakhuipaw biahrai thapaw cawh a paringpaw navy tah alai vypaw a cang. Biahrai thapaw cawh achaw vypaw biakangnah cung letah a dawpaw a cang.
7 Biahrai a hmetaw caipaw takhei tling lynah zehmai za hnui ly khei ung my seh la, a thapaw ahianah zehmai ung be. 8 Canghrasala Khazing tah a cawngsaw sahlo aa dinglynah khah hmuh ka,
“Abuipaw tah Israel mingphing le
Judah phing sahlo khatah
biahrai thapaw ka tua nápaw
ningcai a vong leimei.
9 Izipt raang chung taitah
aa mapaw sahlo khah chuakhui rua pawtah
aa bang tah ka za hrui ning he tei,
ka tuapaw biahrai hapaw khah cawh cang be.
Aaning cawh biahrai ka tuapaw cung lekhei
zingchui tah aa ung lynah cawtah ka huisai he,
tatah Abuipaw tah a tah.
10 Ma heh hmelang letah Israel mingphing khatei ka tua lepaw biahrai cawh a cang a,
tatah Abuipaw tah a tah.
Ka phungbia cawh aa thinglung chung letah chia neh ka,
aa lungchung letah ka cia a.
Kama cawh aa Khazing cang neh ka,
aaning cawh ka cawngsaw a cang he a.
11 Mataico ahotahmai tah a ingpaw le a uny khah cawngpah a hy be ca he ka,
‘Abuipaw khah hni tua o,’ tatah ching zong a hy a bei he,
zemaw tah pawco, a chia caipaw taitah
alaicaipaw tai aa pa hni thlu a.
12 Macawtaco aa chahlynah cawh ngethai he neh ka,
aa suanah cawh a thui paria thlang khawh bei neh,”✡Jere 31:31-34
tatah a tah.
13 Khazing tah biahrai thapaw kong a reinah cawtah hei, a hmetaw teipaw khah cawh chahnai be ca ka, a paringpaw le a chahnai lypaw cawh a ly palangpaw a cang.