1 Jò aih, Chuaq Jêhowa doe ka Apram rameh: Ìh drah loh ma khoe ka gùng cla, oh daq cla hloe xam enh hnim baq ìh, đòeq lam tagùng au ma hu patô am. 2 Au jah broq ka ìh wìh wìa moeq xinoe kàn; au jah am ka ìh xôq ramot rai broq ka ìh jah i tìang i ƀang, ìh jah wìa tamŏc xôq ramot. 3 Au am xôq ramot ka cabô ma waiq xôq ramot ka ìh, hamaiq ka cabô ma ra-òh hamaiq ka ìh, rìm xinoe ta crŏng taneh dìq canòm ka ìh đòeq hujah xôq ramot.

4 Khoe aih, Apram loh lam, tiaq mang ka bàu Jêhowa khoe thê; Lot hadai lam paùm ti haq. Jò Apram loh enh Charan haq khoe jah tapèh jàt padam hanam hloe xam ƀài hapŏng đeh khoe jah ta Charan, loh enh aih đòeq lam ta gùng Cana-an; khoe aih dìq ka wì hi trùh ta Cana-an. 6 Apram pagat gùng kô trùh ajang xèm long rayai da Môrê, oe ta Xichem. Jò aih mangai Cana-an oe raq gùng aih.

7 Jêhowa loh glàm Apram rai doe ka haq: Au jah am ka xinoe ìh taneh kô! Ta aih Apram broq mòeq toq prang tadreo ka Jêhowa, aih la Yiang ma khoe mahnu đeh am ka haq.

8 Enh aih haq trùh ta trong wang enh pah mat mahì loh da Ƀêtên, broq traiq ta aih, enh pah mat mahì clìh i Ƀêtên, enh pah mat mahì tŏc i Ahi. Khoe èh, ta aih haq broq mòeq toq prang tadreo ka Jêhowa rai waiq dang yiniq haq 9 Khoe ka aih Apram rai lam rai broq traiq rai èh rai jùa ta pah qma trùh tagùng Nêgep

10 Jò aih, gùng aih i kan pangot, kan pangot hrah aih kàn, dài aih Apram majah loh oe ta Êdip. 11 Jò ten mùt ta taneh Êdip, Apram doe ka Sarai, mai rađeh rameh: Kô, au loq gè kô la mangai gucadrì lem. 12 Glàm jò mangai Êdip hnoq gè wì doe: Qmat raq mai haq, aih èh wì hi jêh đac au, mahaq rong gè rìh. 13 Gè doe đeh kô oh au đòeq canòm ka gè au jah rìh, aih dôq wì jah alàng ka au rai jah wèq deh kan rìh au. 14 Apram bu trùh Êdip, mangai Êdip hnoq mangai cadrì aih lem joq qnàng. 15 Ƀài cwan da Phara-ôn hadai toq manè kan lem da haq; wì hi qmùt mangai cadrì aih mùt ta hnim Phara-ôn. 16 Taiq mangai cadrì aih dài Phara-ôn majah pachàuq hang ka Apram, èh Apram jah bàc haƀo trìu, ƀo, lùa cadrì lùa calô, lŏcđa, hapŏng cadrì hapŏng calô. 17 Mahaq Sarai aih mai da Apram dài Jêhowa majah tabroq ka Phara-ôn xam hnim haq glàm kan ranàc kàn. 18 Phara-ôn creo ka Apram đòeq bòch: Ìh khoe haƀo dèh ka au qmang qmat? Gleq ùh doe ka au loq haq qmat mai ìh? 19 Gleq majah khoe doe: haq qmat oh au? Jaq au mech khoe yŏc haq broq mai. Manòeq, mai ìh kô; drah yŏc hlài khoe aih drah lam beq. 20 Khoe aih Phara-ôn hi thê ƀài cwan ƀài lình ajèn wa ŏng mai Apram xam dìq dŏng kùng hang haq lam.