1 Apram enh gùng Êdip qnung deh mai xam ƀài kùng hang rađeh hloe xam Lot, hadai drông tŏc ta Nêgep. 2 Jò meh, Apram padrŏng pi cajaq i haraya rayùc ƀài ngè ban ta hnim, wang ƀac. 3 Haq rai lam rai broq traiq, enh Nêgep hlài trùh ta Ƀêtên, trùh nòe haq ma broq traiq yàng ma baxèm, oe ta adreo Ƀêtên xam Ahi. 4 Aih la nòe nèh haq, haq ma khoe broq prang tadreo. Oe ta aih Apram waiq dang yiniq Jêhowa.

5 Jò aih, Lot mangai ma hadai lam ti Apram, hanoh bàc trìu, ƀo, traiq. 6 Gùng aih pi anòh ka wa oe pajùm, majah qmang aih kùng hang bàc hrình loh ka pi jah oe moeq qmang. 7 Jò mangai Cana-an xam mangai Phêrêsit oe ta aih, loh ka bìac tajênh ka mangai ban trìu da Apram xam mangai ban trìu da Lot. 8 Apram doe ka Lot: Apaq dôq i kan talech taqne ba mìh mon kô, yac ka taqne mangai ban trìu da mon yac ka mangai ban trìu da au hadai ùh dùh ta taqmiaq dèh ti dabau, majah qmang aih ba kô xài hadròng ka daba. 9 Dìq ka gùng kô ma ùh xài oe dŏng enh ngeà mon? Qmang aih talah ma khoe ka au beq; tàng joq mon yŏc ƀè qngeo, au yŏc enh qma; tàng joq mon yŏc enh qma; au jah yŏc pah qngeo. 10 Lot qngoc ngan, hnoq jàp ka tamang pah tau cròng diac jôđan, aih la nòe (adroe ka Chuaq Jêhowa ma raliang đac Sôđôm xam Gômôro) dìq i diac cadàu pùc jàp trùh qmòe ta Xoa; tamang aih tìah qmòe ka wuàn da Jêhowa èh ùh loe ka gùng Êdip diq. 11 Lot hi ràih yŏc ka rađeh dìq dŏng ka tamang pah tau cròng diac Jôđan rai lam cwa ƀè mat mahì loh. Qmang aih wa haq hi talah ka dabau. 12 Apram oe tagùng Cana-an, Lot oe plài ta tamang èh qnhac deh traiq lam oe ta Sôđôm. 13 Jò aih mangai Sôđôm ngang hi raya, aih la ƀài mangai broq yiniq lui kàn ka Chuaq Jêhowa.

14 Hi khoe ka Lot ma talah ka Apram, Jêhowa doe ka Apram rameh: Qngoc mat ngan beq, ngan enh nòe ìh ma oe qmat trùh tagùng apah qngeo, apah qma, apah mahì tŏc xam apah mahì clìh. 15 Majah qmang aih dìq dŏng gùng leq ìh hnoq, au jah am hloe ka ìh xam xinoe ìh gùng aih mòeq đòe. 16 Au hi broq ka xinoe ìh bàc tìah ka blo ta taneh, aih èh cabô jah rèn dìq ka blo ta taneh aih èh hadai jah rèn dìq ka xinoe ìh. 17 Yòng beq! lam ma jàp tagùng kô, dang yôh, dang gat; majah qmang aih au hi am ka ìh gùng kô.

18 Khoe aih Apram qnhac dèh traiq lam oe ajang xèm long rayai ta Mamrê, gùng Hêpron, ta aih haq mòeq toq prang tadreo ka Jêhowa.