1 Qnhòng Amraphên, bùa Sêni-a, Ari-oc, bùa Êlê-asa, Ketrô Laome, bùa Êlam xam Tiđan bùa Gô-im, 2 pôn bùa aih taqmùt ti dabau hu tablah ka Bêra bùa Sôđôm, Birêsa bùa Gômôro, Sinê-ap bùa Acma, Sêmeƀe bùa Xêƀô-im xam bùa Ƀêla aih la Xoa. 3 Ƀài bùa kô tagop ti dabau trong dahông Siđim (aih la Diac raxìq cachìt) 4 ta mòeq jàth baiq hanam ƀài bùa kô dìq oe enh qneq ka bùa Ketrô Laome, yàng èh trùh hanam mòeq jàt piq, wì haq hi yòng tablêq. 5 Wop ta hanam mòeq jàt pôn, Ketrô Laome xam ƀài bùa ma mòeq bua da haq qnung ƀình lam tablah ka mangai Rêpha-im oe gùng Actêrot Cana-im, mangai Xuxin oe gùng Ham, mangai Ênim oe ta tamang Kiri-ata-im, 6 xam mangai Hôrit oe trong wang Sê-iro, trùh hloe ta Ênbaran, ten ka đùng hawit. 7 Khoe aih ƀài bùa qnung dèh ƀình wìh hlài, trùh ajang thòng diac kon yiniq haq la diac Hadrah, aih la Cađe, wì tàt jêh jàp trong gùng mangai Amalec, hloe xam mangai Amôrit oe ta Hasasôn Thama. 8 Ƀài bùa Sôđom, Gômoro, Acma, Xêbô-im, xam bùa Ƀêla aih la Xoa, hi qnoh ƀình wì hi tàt rai broq traiq trong dahông Siđim. 9 hu tablêq hlài ka Ketrô Laome, bùa Êlam, Tiđan bùa Gô-im, Amraphên bùa Sinêa xam Ari-oc bùa Êlê-asa. Pôn bùa tablêq ka padam.

10 Jò aih ta dahông Siđim i bàc ƀài hlŏng nhùaq gam; bùa Sôđôm xam bùa Gômôro ùh blêq, cadàu clìh ta hlŏng aih, mangai leq ma claih hi cadàu tŏc tawang. 11 Ƀè ma khoe blêq hi blah yŏc dìq dŏng kùng hang xam dahwèq da Sôđôm xam da Gômoro, khoe aih hi lam. 12 Wì haq hadai rùp qnung hloe Lot aih mon da Apram, oe ta Sôđom. 13 I mòeq ngai ma claih cadàu lam doe ka Apram, aih la mangai Hêbru. Apram oe tanòe xèm long rayai da Mamrê, mangai Amôrit, daq da Êcôn xam Ane; wì piq ngai kô i taƀan ka Apram. 14 Jò Apram hìa doe mon rađeh wì khoe rùp, haq ràih yŏc dèh 318 ngai ma ha-uang hnim ta hnim haq ƀài mangai ma khoe tàp yôt, đòeq hu hnan tiaq ƀài bùa aih trùh hloe ta taneh Đan. 15 Khoe aih Apram lah deh ƀài hapŏng, gòm jò damang hi canàt ƀài lình wì, hnan jêh trùh ta taneh Hôƀa oe ƀè qngeo ka Đamat. 16 Haq gop yŏc hlài tôm dŏng kùng hang wì ma khoe blah atùng yŏc rai qnung ahlài dèh mon aih la Lot hloe kùng hang haq, xam ƀài gucadrì xam ƀài mangai qnoeq hlài.

17 Atìq ka Apram jêh blêq Ketrô Laome xam ƀài bùa ma moeq bua ka haq, jò khoe blêq dang hlài, i bùa Sôđôm loh đìh haq ta dahông Sabe aih la dahông bùa.

18 Mênchi Xêđec, bùa Jêrusalem, thê qnoh ƀênh xam alac. Jò aih, bùa kô aih la pajàu da Boc Plình Dìq jaq Haqnhèq, 19 Waiq xôq ramot am ka Apram haq doe rameh: Waiq Boc Plình Dìq jaq Haqnhèq, aih la Mangai ma broq plình crŏng taneh, am xôq ramot ka Apram! 20 Joq troq ka manè qnàng Boc Plình Dìq jaq Haqnhèq khoe hataq mangai tablêq mùt ta tì kŏng ìh! khoe aih Apram yŏc mòeq phàn mòeq jàt ta ƀài ngè haq khoe blah yŏc jò khoe blêq wì tau hu dèch ka bùa aih. 21 Bùa Sôđôm doe ka Apram: Drah jao mangai am ka au, kùng hang aih ìh hi yŏc. 22 Apram padreo bàu rameh: Au dèch tì enh ngeà Boc Plình Dìq jaq Haqnhèq, Cla craq da plình crŏng taneh đòeq hapah; 23 Waq toq dahwèq leq da bùa, yac ka mòeq hadrang brai, mòeq hadrang caxi jai, dua au ùh yŏc; yùq èh ìh loq doe: Canòm ka au kô Apram ma khoe jah padrŏng. 24 enh gùng ka dahwèq leq wì kon qyoh khoe acaq, èh phàn da ƀài mangai ma lam ti au aih la Ane, Êcon xam Mamrê, da wì aih, wì haq yŏc deh ngè da wì haq.