15
1 Khoe ka ƀài yiniq aih, ta kan mahnò i bàu Chuaq Jêhowa doe ka Apram:
“Apram! Ìh apaq yùq cleq; Au kô raq khìan da ìh, kùng baha da ìh kàn raya”. 2 Apram padreo bàu: Waiq Chuaq Jêhowa, Ìh am ka au cleq? Au kô èh cachìt mahaq ùh i đeh kon, mangai ma haqmot đòeq wèq kùng hang aih la Êli-êse, mangai Đamat. 3 Apram anoe hòm: Hacô Ìh broq ka au lùch ka noe; mòeq ngai hapŏng ha-uang tahnim au broq mangai haqmot hujah kùng hang au.
4 Chuaq Jêhowa hi doe ka Apram: Mangai aih ùh xài mangai jah da ìh kùng hang, mahaq mangai leq loh enh cliac clèm ìh, aih èh mangai ma hu haqmot da ìh kùng hang. 5 Khoe aih Haq ajèn Apram loh enh gùng rai doe: Ìh qngoc ngan ta trŏc beq, tàng joq ìh jah rèn ƀài halŏng aih rèn beq! Haq doe tam: Xinoe ìh hanoh qmang èh diq. 6 Apram lùi bàu Jêhowa, aih ìq Jêhowa hi tình aih raq kan taq atoq ka Apram.
7 Chuaq Jêhowa doe hòm ka Apram: Au kô raq Jêhowa, Mangai ma khoe qnoh ìh loh enh Uro, gùng Canđê, hu am ka ìh gùng kô đòeq broq kùng hang. 8 Apram padreo bàu: Waiq Chuaq Jêhowa i cleq đòeq au jah loq đeh jah gùng kô broq kùng hang? 9 Chuaq Jêhowa doe: Ìh rùp aràng ka au moeq toq ƀo cadrì ma khoe jah piq hanam, mòeq toq bubi cadrì piq hanam, mòeq toq trìu calô piq hanam, mòeq toq trù braih xam mòeq toq kon trù hnim. 10 Apram rùp tôm ka ƀài yiniq aih. 12 Jò mahì bu clìh Apram kùi pi hmàng, jò meh i kan cadròt trùh, kan clam cluiq mùt ta chac haq. 13 Chuaq Jêhowa doe ka Apram: Ep loq rameh, xinoe ìh ep oe đeh tanòe gùng ùh xài da cla wì haq, broq dìc ka mangai gùng aih, mangai gùng aih padit tacaq ka wì haq tapôn hrinh hanam. 14 Mahaq au tah hadrah ka diac, xinoe ìh ma broq hapong dìc aih, jò loh enh diac aih èh wì haq jah kùng hang haraya đac. 15 Ìh kô èh hòm jah catèm hlài dèh ta kan cadraq, jah dèh xôq ramot craq jah xuàng, èh hi catùh. 16 Trùh qnhòng pôn, xinoe ìh hi hlài ta kô, majah qmang aih yiniq lui da mangai Amôrit qnhòq bình gêh. 17 Jò mahì khoe clìh kan clam ma hapinh loh ta aih, jò aih i tanùh ùnh kàn plôh nhòe, i mòeq pla ùnh blè qngah pagat tanòe jam ma khoe xah.
18 Hì aih, Jêhowa broq tajao ka Apram, rai doe: Au am gùng kô ka xinoe ìh, enh cròng diac Êdip trùh cròng diac kàn tau, aih la cròng diac Ôphorat. 19 aih la gùng da ƀài mangai Kênit, kênesit, Camônit, 20 Hêtit P, hêresit, Rêpha-im, 21 Amôrit, Cana-an, Girêgasit xam mangai Jêbusit.