1 Jò aih, Sarai mai da Apram dua ùh i ka kon, haq i moeq toq hapŏng cadrì mangai Êdip, yiniq haq Aga. 2 Sarai doe ka Apram: Ngan kô, Chuaq Jêhowa khoe broq ka au xon, manòeq kô ìh lam acaq oe ti mangai hapŏng au aih, broq braiq canòm ka haq aih loq i kon am ka au. Apram hi tàng tiaq bàu Sarai.

3 Jò Apram oe ta gùng Cana-an khoe jah mòeq jàt hanam, Sarai mai haq yŏc deh hapŏng am deh ka ŏng broq yang. 4 Haq kùi oe ti mangai hapŏng, mangai hapŏng aih hi hadràp. Jò mangai hapŏng cadrì aih hnoq đeh khoe hadràp, haq hi jù đac dèh craq. 5 Sarai anoe ka Apram: Kan camaih xep au ma pòq kô èh ta-ùc hlài ta gàu cla ìh. Au khoe phùq haq am ka ìh, yàng pang haq ma hi hnoq rađeh khoe hadràp, aih haq jù cađac au. Waiq Chuaq Jêhowa hadrah taqne ba kô èh. 6 Apram tèu Sarai rameh: kô, mangai hapŏng aih oe ta tì cla raq, enh broq qmang leq mac da cla. Khoe aih Sarai hi baxa haƀo ka Aga, qmang aih Aga hi cadàu mot khoe ka mat haq.

7 Mahaq ƀình plình da Jêhowa hnoq haq oe nòe đùng hawit haten ka diac kon, roc haqmai trong hlài ta Suro, 8 hi bòch haq rameh: Aga hapŏng da Sarai, ìh trùh enh leq qmat èh ìh hlài taleq? Haq padreo bàu: Au cadàu clôn ka mat Sarai, craq au, 9 Ƀình plình da Jêhowa thê haq: Ìh drah hlài dèh ta cla craq ìh rai chìuq enh qneq ka tì kŏng haq aih. 10 Ƀình plình da Jêhowa doe hòm ka haq: Kô èh au tam ka xinoe ìh jah bàc, jaq wì loh ka pi hlàt rèn. 11 Ƀình plình da Jêhowa doe tam: Ìh qnang hadràp, kô èh ìh ha-uang mòeq toq kon calô, ìh yiniq ka haq la Ich ma-ên, majah qmang aih Chuaq Jêhowa i tàng kan mangò ìh. 12 Kon qyoh aih èh jah tìah ka kon lùa ta rôm wang, tì kŏng haq taqnìq dèh ka oh daq, tì kŏng wì hadai taqnìq chau ka haq. Haq oe pah mat mahì loh, tajraq hadrò dìq ka wì oh daq.

13 Haq creo ka Jêhowa ma khoe doe ka rađeh, yiniq haq la “Boc Plình loq ngan hnoq”, majah qmang aih haq doe: Ma ùh joq ta kô raq au ma khoe jah hnoq Mangai loq ngan hnoq au qmòh? 14 Aih ìq wì majah creo ka adràm kô ta adreo qne Cađe xam Ƀêre, aih la adràm Lachairoi

15 Atìq ka aih, Aga ha-uang mòeq toq kon calô, Apram yiniq ka haq Ich ma-ên, 16 Jò Aga ha-uang Ich ma-ên ka Apram, aih Apram khoe jah rahem jàt tadràu hanam.