1 Jò Apram jah hachìn jàt hachìn hanam, Chuaq Jêhowa mahnu rađeh ka haq rai doe: Au kô raq Boc Plình I cwìang Rìm trong; ìh drah lam enh ngèa ka au đòeq broq mangai gêh geo. 2 Kô èh au broq tajao ka ìh, broq ka nang noe ìh bàc tam raya. 3 Apram bla op deh hadrò ta haqneq; Boc Plình doe ka haq: 4 Da au kô èh hòm, au broq tajao ka ìh, qmang aih èh ìh jah wìa kan cadraq bàc diac. 5 Phù cròng pi oe creo ka ìh Apram hòm, mahaq Apraham aìh èh yiniq da ìh, majah qmang aih au yŏc ìh broq baq bàc diac. 6 Au broq ka ìh chèch lòe tam bàc pi cajaq, broq ka ìh wìa bàc diac; èh ƀài bùa dìq loh enh ìh. 7 Au broq tajao ka ìh, xam xinoe ìh enh qnhòng kô trùh qnhòng tau; aih la tajao mòeq đòe, đòeq au hu broq Boc Plình da ìh xam da xinoe ìh. 8 Au am ka ìh xam xinoe ìh gùng ìh ma qnang oe manòeq, aih la dìq dŏng taneh gùng Cana-an, broq kùng hang mòeq đòe. Aih èh au broq Boc Plình da wì haq.

9 Khoe aih, Boc Plình doe ka Apraham: Da ìh xam xinoe ìh, enh qnhòng kô trùh qhòng tau, ep wèq tajao da au. 10 Rìm ngai calô ta pì qmat ep broq ramènh kat akia; aih raq ramènh pì ep wèq, aih la tajao broq taqne au xam pì, xam xinoe trùh atìq ka p. 11 Pì ep chìuq kat akia; ramènh aih èh jah broq teo hadro da kan tajao taqne au xam pì. 12 Enh qnhòng kô trùh qnhòng tau rìm ngai calô taqne pì, yac ka haq ha-uang tahnim pì yac ka qnoh bac rot enh mangai diac wì, ùh xài nang noe da pì, waq toq hi jah rahem hì, dìq ep chìuq kat akia. 13 Ùh dùh cađac broq ramènh kat akia mangai ma ha-uang ta hnim, yac ka rot ahlài xi bac; kan tajao da au jah broq mòeq đòe oe ta xech akia pì. 14 Mòeq ngai calô leq ma ùh ùh waq broq ramènh kat akia ta xech akia cla rađeh, haq aih ep qnoh đac gùng ka mangai da au; aih la mangai khoe broq tagoh bàu tajao da au.

15 Boc Plình doe ka Apraham: Qmang ka Sarai, mai ìh, pi dùh creo Sarai hòm; mahaq creo Sara aih la yiniq haq. 16 Au hi am ka haq xôq ramot, èh hòm ajang haq au jah am ka ìh mòeq toq kon calô. Au am ka haq xôq ramot, aih èh haq jah broq miq ƀài diac; ƀài bùa loh enh haq aih èh. 17 Apraham kùp dèh hadrò ta haqneq; haq do rai capoch atùng ta manoh: Mangai khoe ten bình ka hrinh hanam kô ùac ka oe jah i kon qmòh? Da Sara hòm, hanam khoe hachìn jàt, oe jah ha-uang qmòh?. 18 Apraham doe ka Boc Plình: Chop Ich ma-ên jah rìh enh ngèa ka ìh! 19 Boc Plình hi doe: Joq qnàng Sara mai ìh èh haq ha-uang mòeq ngai kon calô, khoe aih ìh yiniq am ka haq la Ysac. Èh au broq tajao ti haq, đòeq broq tajao mòeq đòe ka xinoe haq. 20 Au hanoh dì bàu ìh ma creo dang am ka Ich ma-ên. Kô au am ka haq xôq ramot, broq ka haq jah chèch lòe tam ka bàc; haq jah broq kan cadraq da mòeq jàt baiq ngai cla craq, au broq ka haq wìa mòeq diac kàn. 21 Mahaq au broq tajao ti Ysac, dàng kô hanam èh Sara ep ha-uamg kon ka ìh. 22 Jò Boc Plình hêq ka capoch Boc Plình talah ka Apraham hu tŏc dèh ta trŏc.

23 Hì aih raq, Apraham thê Ich ma-ên, kon calô rađeh xam dìq ka mangai calô ta hnim, yac ka ƀài mangai ha-uang ta aih yac ka mangai ma rot hlài xi bac, đòeq broq ramènh kat akia wop tiaq bàu Boc Plình ma khoe tanap thê. 24 Apraham khoe hachìn jàt hachìn hanam jò haq broq ramènh kat akia, 25 Ich ma-ên kon da haq khoe jah mòeq jàt piq hanam. 26 Apraham xam Ich ma-ên kon haq dìq baiq broq ranenh kat akia ta hì aih. 27 Xam dìq dŏng ƀài mangai calô ma ha-uang ta hnim haq, hloe xam ƀài mangai ma rot enh mangai diac wì, dìq chìuq kat akia ti haq.