1 Chuaq Jêhowa loh ti Apraham tanòe xèm long rayai da Mamrê, jò haq qnang haqngui ajang qmang traiq jò trŏc tôq dahì. 2 Apraham qngoc ngan hnoq piq ngai oe ajang ngèa rađeh. Jò bu hnoq, patep ajang trong qmang haq tùh loh enh ngèa wì piq ngai aih, bla op rađeh ta haqneq, 3 rai doe: Waiq Chuaq, tàng joq au jah xôq ramot enh ngèa Chuaq, joq au cali calo đeh qnàng, pì apaq lam hloe mahaq padòh mùt ta hnim hapŏng Chuaq. 4 Dôq wì qnoh toq xit diac qnheo jènh pì rai padài ajang yàp long kô. 5 Đòeq au qnoh mòeq calep ƀênh dôq pì acaq ka dràng cliac, khoe aih pì hi lam, xài aih raq pì majah thia ajang hnim mangai hapŏng pì kô. Wì aih doe: Broq beq, broq troeq bàu ìh ma khoe doe

6 Khoe aih Araham drah mùt ta traiq thiaq ajang Sara haq doe: Drah rênh yŏc piq cađap dàc ma habùat jràu malem, khoe aih broq ƀênh. 7 khoe aih haq drah cadàu trùh yŏc diac sùa pajòq, diac tôh ƀo maneo xam ƀo ma khoe pai; don qnoh enh ngèa ka wì aih. Wì aih hi acaq

9 Wì aih bòch Apraham: Sara mai ìh taleq? haq tèu: hatau haq oe ta traiq. 10 Mòeq ngai ta wì aih doe: Hanam èh wop jò kô, au wìh hlài tacô ti ìh, jò aih èh Sara mai ìh jah i mòeq toq kon. Sara oe jang qmang traiq enh rù ka wì aih, tàng ƀài bàu kô.

11 Jò aih Apraham xam Sara dìq baiq khoe craq, hanam khoe bàc; Sara pi oe i cleq tìah ka gucadrì qnoeq. 12 Sara do atùng ta manoh: Craq qmang ka au kô hlàu cleq ka oe jah kan lem bùi aih qmòh? Èh craq da au hanoh khoe craq!. 13 Chuaq Jêhowa creo bòch Apraham: Gleq Sara majah do rai doe: Ajoq au khoe craq qmang kô dua oe jah ha-uang qmòh? 14 i ka yiniq cleq Jêhowa ma broq ùh jah? Trùh jò ma khoe pajaq, ta mòeq hanam hòm, au wìh hlài ti ìh, èh Sara khoe i kon. 15 Pàng crè pi cajaq dài Sara majah hangah: Au i do đeh taleq! Mahaq Haq doe: Joq qnàng ìh i do.

16 Dìq ka wì aih yòng hulam, tangìa ta Sôđom. Apraham hadai đìh wì aih lam.

17 Jêhowa doe: Laiq au ma cadoc ka Apraham yiniq cleq đeh ma padon broq qmòh? 18 Majah qmang aih Apraham kô èh jah wìa mòeq diac kàn rai dêh raya; rìm diac ta crŏng taneh kô dìq canòm ka haq đòeq hujah xôq ramot. 19 Au khoe ràih haq đòeq hu hnài ƀài kon hloe xam hnim haq wèq tiaq trong da Jêhowa, broq ƀài yiniq taq atoq hnhoh jang; aih èh Jêhowa hi broq đòeq xìt dèh bàu khoe tèu am ka Apraham. 20 Chuaq Jêhowa doe: Bàu creo dang ta Sôđom ta Gômro joq khoe hrình hran, yiniq lui da wì gùng aih joq khoe gau. 21 Au enh loh đòeq ngan, đòeq hnoq wì haq acaq oe ajoq tìah ka bàu ma creo dang trùh ta au loq ùh; tàng joq aih èh au jah loq.

22 Èh, wì hi loh enh aih, lam ngèa ta Sôđom mahaq dua Apraham oe raq yòng enh ngeà ka Chuaq Jêhowa. 23 Araham thia haten rai anoe: Chuaq Ìh jêh đac mangai taq atoq hloe ti mangai dù qmòh? 24 Broq braiq ta plài loq i padam jàt ngai taq atoq, Chuaq dua jêh dŏng wì qmòh? Ma ùh xài ìh caqnaih ka plài aih taiq padam jàt ngai taq atoq oe ta plài aih qmòh? 25 Wìa ka Chuaq broq qmang aih, jêh đac hloe mangai taq atoq pajùm ti mangai ngang dù; loh ka mangai taq toq budàng mangai dù. Ùh! Chuaq ùh jò leq broq qmang aih. Mangai ma hadrah dìq dŏng crŏng taneh, wìa ka ùh broq kan taq atoq? 26 Chuaq Jêhowa tèu: Tàng au chaq jah padam jàt ngai taq atoq ta Sôđôm, taiq kan ha-och ka toq aih ngai au hi caqnaih dŏng dìq ka plài. 27 Apraham doe hòm: Hiloq ka au kô loh enh taneh blo mahaq dua kàn clèm hu anoe ka Chuaq. 28 Ta padam jàt ngai taq atoq aih troq capòch đac padam ngai, aih èh taiq padam ngai ma capòch aih Chuaq jêh dŏng mòeq plài qmòh Haq tèu bàu: Tàng au chaq jah pôn jàt padam ngai, au ùh jêh plài aih.

29 Apraham dua cachian: Beq ta plài aih, i pôn jàt ngai taq atoq raq, aih èh qmang leq?; Haq doe: Taiq kan loq waq ka pôn jàt ngai aih, au ùh palùng plài. 30 Apraham doe hòm: Au cali calo ka ìh, ìh apaq nòeh, aih èh au hu anoe: Broq braiq ta plài aih i piq jàt ngai raq, aih èh qmang leq? Haq doe: Tàng joq au chaq hnoq piq jàt ngai, aih èh au pi jêh đac hòm. 31 Apram doe hòm: Au kô dua kàn clèm hu anoe ka ìh: Tàng joq i baiq jàt ngai raq aih èh qmang leq? Haq doe: Taiq kan ha-och ka baiq jàt ngai aih, au ùh palùng plài aih. 32 Apraham doe hòm: Ìh apaq nòeh dôq au anoe tam mòeq yàng kô hòm: Tàng ta plài aih i padam ngai raq, aih ìh hèm qmang leq? Haq doe: Au dua pi jêh đac plài aih taiq kan ha-och ka padam ngai aih.

33 Jò Chuaq Jêhowa khoe hêq ka capoch tuàng ti Apraham, aih Haq hi tŏc ta trŏc, Apraham hlài dèh ta traiq.